དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་གལ་ཏེ་བདག་གི་རོ་སྲེད་པར་བྱེད་པའི་རླུང་འཁྲུགས་པར་གྱུར་ན། དེས་བདག་གི་ལྕེའི་རྩེ་མོ་ལ་སྲིན་མངར་མོས་འདོད་པར་བྱེད་དོ། །དེ་ཡིས་བདག་ཐམས་ཅད་དུ་འདོད་པར་གྱུར་པ་དང་། ཐམས་ཅད་དུ་དགའ་བར་གྱུར་པ་དང་། ཐམས་ཅད་དུ་ཡིད་དུ་འོང་བར་གྱུར་པའི་ཟས་རྣམས་ལ་བདག་དགའ་བར་འགྱུར་རོ། །བདག་གིས་མིད་པར་ཡང་བྱེད་མི་ནུས་སོ། །བདག་ཟས་དེ་དང་བྲལ་བར་གྱུར་ན་ལུས་བསམ་གཏན་ལ་མཉམ་པར་འཇོག་པར་བྱེད་མི་ནུས་པར་འགྱུར་རོ། །དགེ་བའི་ཆོས་རྣམས་ལ་ཡང་ཤིན་ཏུ་སྤྲོ་བར་ཡང་མི་འགྱུར་རོ། །བདག་གི་ལུས་ཀྱི་སྐྱོན་གྱིས་ཡིན་ཏེ། གཟུགས་ནི་ཕན་ཚུན་གྱི་དབང་གིས་ཀུན་དུ་གནས་པའི་ཕྱིར་ན། ཇི་ལྟར་དབྱུག་གུ་གཉིས་ཕན་ཚུན་དུ་ལྟོས་པའི་དབང་གིས་འཛིན་པར་བྱེད་པ་ནི་ཕན་ཚུན་གྱི་སྟོབས་ཀྱིས་ཡིན་ནོ། །དེ་བཞིན་དུ་མིང་དང་གཟུགས་གཉིས་ཕན་ཚུན་གྱི་སྟོབས་ཀྱིས་དང་། ཟས་ཀྱི་དབང་གིས་ཀྱང་འཁོར་བའི་ཕུང་པོ་འདི་ཡིན་ནོ། །ཇི་ལྟར་ཕྱེ་དང་ཆུ་གཉིས་འདྲེས་པར་གྱུར་པ་དག་གི་ཕན་ཚུན་གྱི་སྟོབས་ཀྱིས་གོང་བུར་འགྱུར་རོ། །དེ་བཞིན་དུ་ཕན་ཚུན་གྱི་སྟོབས་ཀྱིས་མིང་དང་གཟུགས་དག་གནས་པ་ཡིན་ནོ། །དེས་རོ་སྲེད་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གལ་ཏེ་བདག་གི་མཆིན་པ་ཀུན་དུ་སུན་འབྱིན་པར་བྱེད་པའི་རླུང་འཁྲུགས་པར་གྱུར་ན། དེས་བདག་གི་ཟས་རྣམས་མཚན་མོ་འཇུ་བར་བྱེད་པ་ན་ལྷང་ཀྱོག་སྐྱེད་པར་བྱེད་པ་དང་ཟས་རྣམས་ཀྱང་སྐྱུར་པོར་བྱེད་དོ། །དེ་སྲིད་དུ་ལྷང་ཀྱོག་ཡོད་པར་གྱུར་པ་ཇི་སྲིད་པ་དེ་སྲིད་དུ་ཟས་རྣམས་ཀྱང་སྙོམས་པར་མི་འགྱུར་རོ། །བདག་གི་ཡན་ལག་དང་ཉིང་ལག་རྣམས་ཐམས་ཅད་ཀྱང་སྤྲོ་བ་མེད་པར་འགྱུར་རོ། །