དེ་གལ་ཏེ་བདག་ལ་འཁྲུགས་པར་གྱུར་ན། དེས་བདག་སངས་རྒྱས་ཀྱི་གསུང་ཉན་པར་གྱུར་པ་ན་ནི་གཉིད་སྐྱེད་པར་བྱེད་དོ། །ཀུན་ནས་ཉོན་མོངས་པ་ཅན་མི་དགེ་བར་གྱུར་པ་རྣམས་ཉན་ན་ནི་གཉིད་མི་སྐྱེད་དོ། །དེ་སེམས་ཅན་གྱི་རྒྱུན་རྣམ་པར་གཡེང་བ་ཉིད་དུ་ཡང་བྱེད་དོ། །མཚན་མོ་ཡང་ཡིད་ལ་བྱེད་པ་ཡང་དག་པར་མི་འགྱུར་རོ། །བདག་མང་དུ་མངོན་པར་བརྗོད་པར་འགྱུར་རོ། །ཕྱོགས་སུ་གྱུར་པ་རྣམས་ན་ཡང་བདག་གིས་སྐྲ་ཤད་འཛིངས་པར་མཐོང་བར་འགྱུར་རོ། །དེས་ཉལ་བས་རྣམ་པར་གཡེངས་པ་རྣམས་སྟོན་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། རླུང་གཞན་གང་དག་བདག་གི་ལུས་ལ་རབ་ཏུ་གནས་པ་ཡིན། དེས་ལས་ནི་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། མི་བཟོད་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་བདག་ལ་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ལས། གལ་ཏེ་བདག་གི་མི་བཟོད་པའི་རླུང་འཁྲུགས་པར་གྱུར་ན། དེས་བདག་གླེང་གཞི་ཆུང་ངུ་ཙམ་གྱིས་ཀྱང་རབ་ཏུ་ཁྲོ་བར་བྱེད་དོ། །དེས་ཁྲོ་བའི་དབང་དུ་གྱུར་པར་ཡང་ལེགས་པར་སྟོན་པར་བྱེད་དོ། །སོ་སོའི་སྐྱེ་བོ་རྣམས་ལ་ཁྲོ་བ་སྐྱེད་པར་འགྱུར་བ་ཡང་ཡིན་ནོ། །སྤུ་རྣམས་ཀྱང་ལངས་པར་བྱེད་དོ། །སྙིང་ལ་གནས་པའི་རླན་རྣམས་སྐྱེད་པར་ཡང་བྱེད་དོ། །བདག་གིས་ཉེ་བ་ན་གནས་པའི་གཟུགས་རྣམས་ཀྱང་རིང་བ་ན་གནས་པ་བཞིན་དུ་མཐོང་ངོ་། །བདག་གིས་ཉི་མ་དང་ཟླ་བ་དག་གི་དཀྱིལ་འཁོར་ཡང་ཕྱིན་ཅི་ལོག་ཏུ་མཐོང་བར་འགྱུར་རོ། །ཟླ་བ་ཡང་ཉི་མ་ལྟར་བདག་གིས་མཐོང་བར་འགྱུར་ཏེ། རླུང་དེ་རབ་ཏུ་འཁྲུགས་པར་གྱུར་པའི་སྐྱོན་གྱིས་ཡིན་ནོ། །དེས་མི་བཟོད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ།