དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བད་ཀན་ཀུན་ནས་སུན་འབྱིན་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་འཁྲུགས་པ་དང་མ་འཁྲུགས་པ་ན་བདག་ལ་ལས་ཅི་ཞིག་བྱེད་པ་ཡིན་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ནི་གལ་ཏེ་བདག་གི་བད་ཀན་སུན་འབྱིན་པ་ཞེས་བྱ་བའི་རླུང་འཁྲུགས་པར་གྱུར་ན་ནི་དེས་བདག་གི་ཁ་མངར་པོར་བྱེད་དོ། །སྙིང་འཕར་བ་དང་། དང་ཀ་མི་བདེ་བ་དང་། བསམ་གཏན་ལ་འགྲོ་བར་གྱུར་པ་ན་ཡང་གཉིད་དང་རྨུགས་པ་སྐྱེད་པར་བྱེད་དོ། །ལྕེ་ཡང་ལྕི་མོར་བྱེད་པ་དང་བདག་གི་མགུལ་པ་ལ་ཡང་ན་ཚ་སྐྱེད་པར་བྱེད་དོ། །ཁར་བླུག་པར་གྱུར་པ་རྣམས་ཀྱང་སྐད་ཅིག་ལ་མགྲིན་པའི་སྤུའི་ཡུལ་ཕྱོགས་ཀྱི་སྟེང་དུ་འོངས་པར་གྱུར་ན་དྲི་མི་ཞིམ་ཞིང་ཚོར་བ་དང་བཅས་པས་ཁ་ནས་ཀུན་དུ་འབྱུང་བར་འགྱུར་རོ། །ལྟོགས་པ་དང་སྐོམ་པ་དག་ཀྱང་སྟོབས་དང་ལྡན་པར་འགྱུར་རོ། བདག་གི་མགྲིན་པར་ཡང་འཁྱིག་པར་བྱེད་དོ། །གལ་ཏེ་ཡང་བདག་གི་བད་ཀན་ཀུན་དུ་སུན་འབྱིན་པར་བྱེད་པའི་རླུང་འཁྲུགས་པར་མ་གྱུར་ན་ནི་ཇི་སྐད་དུ་བཤད་པར་གྱུར་པའི་ནད་དེ་དག་རྣམས་རབ་ཏུ་རྒྱས་པར་མི་འགྱུར་རོ། །བད་ཀན་ཀུན་དུ་སུན་འདོན་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། གཞན་བདག་གི་རླུང་གང་དག་འཁྲུགས་པར་གྱུར་པ་དང་། འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ལྷ་བ་ཀུན་དུ་སུན་འབྱིན་པ་ཞེས་བྱ་བའི་རླུང་བདག་གི་ལུས་ལ་རབ་ཏུ་གནས་པ་ཡིན་ཏེ། དེ་གལ་ཏེ་འཁྲུགས་པར་གྱུར་ན་དེས་བདག་འདར་བར་འགྱུར་བ་དང་། ལས་ཅུང་ཟད་ཙམ་གྱིས་ཀྱང་ངལ་བར་འགྱུར་རོ། །རྟག་ཏུ་བདག་ནད་པར་འགྱུར་རོ། །བདག་གི་ངོ་བཞིན་མཛེས་པར་ཡང་མི་འགྱུར་ཞིང་བདག་གི་ལུས་ལ་རྐོ་རློག་ཏུ་བྱེད་པ་དང་། བདག་གིས་མང་དུ་སྨྲ་བར་ཡང་མི་ནུས་སོ། །བདག་གི་ཡིད་ཀྱང་བརྟན་པ་མ་ཡིན་པར་འགྱུར་རོ།