།དེས་མངལ་འཇིག་པར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་རབ་ཏུ་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་དང་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། གལ་ཏེ་བདག་འགྲོ་བ་དང་། འོང་བ་དང་། རྒྱུག་པ་དང་། མཆོང་བར་བྱེད་པའི་རླུང་འཁྲུགས་པ་དང་མ་འཁྲུགས་པར་གྱུར་པ་ན་སྟེ། དེས་བདག་ཀྱོག་པོར་འགྱུར་རོ། །ལག་པ་དག་ཀྱང་འཁུམ་པར་འགྱུར་རོ། །སྒུར་པོར་ཡང་འགྱུར་རོ། །གནས་དང་གནས་སུ་ཡང་འགྲོ་བར་མི་ནུས་སོ། །བདག་གི་ཟས་དང་གནས་དང་ཀུན་དགའ་ར་བ་རྣམས་སུ་ཡང་འགྲོ་བར་མི་ནུས་སོ། །བདག་གི་ལུས་ཀྱི་དབང་པོའི་བློ་རྣམས་དང་ཡིད་ཀྱང་རབ་ཏུ་དང་བར་མི་འགྱུར་རོ། །གལ་ཏེ་འཁྲུགས་པར་མ་གྱུར་ན་ནི་དེས་བདག་གི་ལུས་འགྲོ་བ་དང་འོང་བ་རྣམས་ནུས་པར་འགྱུར་རོ། །བདག་གིས་རྒྱུག་པ་དང་། མཆོང་བ་དང་། འཛེག་པ་རྣམས་ཀྱང་ནུས་པར་འགྱུར་རོ། །དེས་འགྲོ་བ་དང་། འོང་བ་དང་། རྒྱུག་པ་དང་། མཆོང་བར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པའམ་འཁྲུགས་པར་མ་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། བདག་གི་མིག་དང་། རྣ་བ་དང་། སྣ་དང་། ལྕེ་དང་། ལུས་རྣམས་ཀྱི་སོ་སོར་ལས་བྱེད་པའི་རླུང་ལྔ་པོ་རྣམས་སོ་སོར་རྒྱུ་བར་བྱེད་དོ། །དེ་ལ་རླུང་གཅིག་ནི་མིག་དང་ལྷན་ཅིག་ཏུ་གྱུར་པའི་འབྱུང་བ་བཞི་ལས་ཤིན་ཏུ་གཡོ་བར་བྱེད་པས་ན་རླུང་ཡིན་ཏེ། དེས་ན་འདི་ལ་ནི་རླུང་ཞེས་བརྗོད་དོ། །དེས་གལ་ཏེ་བདག་གི་མིག་རབ་ཏུ་དང་བར་བྱེད་པར་གྱུར་ན་ནི་གང་གིས་བདག་གི་འབྱུང་བ་ཆེན་པོ་རྣམས་རབ་ཏུ་དང་བར་བྱས་པས་གཟུགས་རྣམས་ལྟ་བར་བྱེད་པ་ལ་ནུས་པ་དང་ལྡན་པར་འགྱུར་རོ། །རྣ་བ་ལ་ཡང་བདག་གི་རླུང་གཞན་རབ་ཏུ་གནས་པ་ཡིན་ཏེ། དེས་སྒྲ་རྣམས་འཛིན་པར་བྱེད་པ་ལ་བདག་ནུས་པ་དང་ལྡན་པར་འགྱུར་རོ།