།དབང་པོ་རྣམས་ཐམས་ཅད་དང་ཤེས་པ་རྣམས་ཐམས་ཅད་ཀྱང་རྣམ་པར་དཀྲུག་པར་བྱས་ནས་ལུས་ཀྱང་འདོར་བར་བྱེད་དོ། །ལུས་ཡོངས་སུ་དོར་བས་ཀྱང་གསུམ་འཇོམས་པར་འགྱུར་ཏེ། སྲོག་དང་དྲོད་དང་དེ་ནས་ནི་རྣམ་པར་ཤེས་པའོ། །འདི་ལ་ཚིགས་སུ་བཅད་པ། སྲོག་དྲོད་དེ་ནས་རྣམ་པར་ཤེས། །གང་ཚེ་ལུས་འདི་བཏང་བ་ན། །ཇི་ལྟར་ཤིང་བཞིན་ས་ལ་ནི། །འགྱེལ་ནས་དེ་ཚེ་ཉལ་བ་ཡིན། །འཁྲུགས་པར་གྱུར་པའི་ལས་གཉིས་པ་ཡང་བྱེད་དོ། །དབུགས་ཐུང་ངུ་ན་འབྱུང་བར་བྱེད་ཀྱི་དབུགས་རིང་པོ་འབྱུང་བར་ནི་མི་བྱེད་དེ། དེ་ལས་ཀྱང་ལུས་རྣམས་ཐམས་ཅད་ལ་རྒྱུག་པའི་ཟུག་གཟེར་ཆེན་པོ་འབྱུང་བར་འགྱུར་རོ། །ཟུག་གཟེར་གྱིས་ཀྱང་ལུས་ཡོངས་སུ་བཏང་བར་འགྱུར་རོ། །འཁྲུགས་པར་འགྱུར་བའི་ལས་གསུམ་པ་རྣམས་བྱེད་དེ། དབང་པོ་རྣམས་ཐམས་ཅད་དང་ཤེས་པ་རྣམས་ཐམས་ཅད་ཀྱང་རྣམ་པར་གཡེང་བར་བྱས་པས་འདུ་ཤེས་མེད་པར་ཡང་བྱས་ནས་ལུས་འདོར་བར་ཡང་བྱེད་དོ། །འཁྲུགས་པར་འགྱུར་བའི་ལས་བཞི་པ་བྱེད་པ་ཡིན་ཏེ། བརྒྱལ་ན་དབུགས་འབྱུང་བ་སྟོབས་དང་ལྡན་པར་གྱུར་པས་སམ། གལ་ཏེ་ཤེད་ན་དམན་པར་གྱུར་པས་ཀྱང་ལུས་འདོར་བར་བྱེད་པའམ། མ་ཡིན་པའམ་ཉལ་བའི་འདུ་ཤེས་ཀྱི་དབུགས་དང་ལྡན་པར་གྱུར་པས་འཚོ་བ་འཛིན་པར་བྱེད་དོ། །དེས་སྟེང་འོག་གི་རླུང་རྣམས་རིག་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་འཁྲུགས་པར་གྱུར་པ་ན་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། ཀུན་རྫོགས་པར་བྱེད་པ་ཞེས་བྱ་བའི་རླུང་ལུས་ལ་རབ་ཏུ་གནས་ཏེ་ཚོ་བར་གྱུར་པ་དང་རྗུད་པར་ཡང་བྱེད་དོ། །སེམས་ཀྱི་རྒྱུད་བརྟན་པར་ཡང་བྱེད་དོ། །གལ་ཏེ་འཁྲུགས་པར་གྱུར་ན་ནི་དེས་ཀྱང་སེམས་ཀྱི་རྒྱུན་རྩབ་ཧྲལ་ཅན་དུ་བྱེད་དོ། །རྣམ་པར་ཤེས་པ་གོམས་པར་བྱས་པ་ཡང་ཉམས་པར་བྱེད་དོ། །ཐོས་པ་རྣམས་ཀྱང་གཞན་དུ་བྱེད་དོ། །དེས་མཐོང་བར་གྱུར་པ་རྣམས་ཀྱང་མི་མཐོང་བར་བྱེད་དོ། །དེ་བཞིན་དུ་རྣ་བས་ཀྱང་སྒྲ་རྣམས་མི་ཐོས་པར་བྱེད་དོ། །དེ་བཞིན་དུ་དྲི་སྣོམ་པར་མི་བྱེད་ཅིང་དེ་བཞིན་དུ་རོ་མྱོང་བར་མི་བྱེད་ལ་དེ་བཞིན་དུ་ལུས་ཀྱི་རེག་བྱ་རྣམས་འཛིན་པར་མི་བྱེད་དོ།