གལ་ཏེ་རེ་རེ་ཡང་རླུང་བཀག་པར་གྱུར་ན་ཡང་དེས་ལུས་མཉམ་པར་ན་བར་བྱེད་དོ། །དབུགས་རྔུབ་པ་དང་འབྱུང་བ་ཡང་འདིས་ཤིན་ཏུ་སྡོམ་པར་བྱེད་དོ། །སྣ་བུག་ན་ཡོད་པའི་རླུང་གིས་ནི་ལུས་རྣམས་ཐམས་ཅད་ལེགས་པར་འཛིན་པར་བྱེད་པ་དང་། བདག་གི་ལུས་ཀྱི་གོང་བུ་འདི་ནི་རླུང་གི་དབང་དུ་གྱུར་པ་ཡིན་ཞིང་རླུང་ཡང་འཁྲུལ་འཁོར་བཞིན་ཏེ། རླུང་ནི་རླུང་ཉིད་ཀྱིས་སྐྱོད་པར་བྱེད་ཀྱི་གཞན་དག་འགའ་ཞིག་ཀྱང་ནི་མ་ཡིན་ནོ། །དེས་བུ་ག་དགུ་ན་བར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་རླུང་གཞན་གང་དག་གིས་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ། ལྷའི་མིག་གིས་མཐོང་བར་གྱུར་པ། ཡན་ལག་དང་ཉིང་ལག་ཐུང་བར་བྱེད་པ་ཞེས་བྱ་བའི་བདག་གི་རླུང་ཡིན་ན། དེ་འཁྲུགས་པར་གྱུར་པ་དང་། འཁྲུགས་པར་མ་གྱུར་པ་ན་བདག་ལ་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་ཀྱིས་སམ། ལྷའི་མིག་གིས་མཐོང་བར་གྱུར་པ་ནི་གལ་ཏེ་བདག་གི་ཡན་ལག་དང་ཉིང་ལག་རྣམས་ཐུང་བར་བྱེད་པའི་རླུང་འཁྲུགས་པར་གྱུར་ན་དེས་སོར་མོ་རྣམས་འཁུམ་པར་བྱེད་དོ། །གནད་རྣམས་འབིགས་པར་བྱེད་དོ། །དམན་ཞིང་ཐུང་བར་བྱེད་དོ། །རྐང་པ་དང་ལག་པ་ཡང་ཀུན་དུ་འཁུམ་པར་བྱེད་དོ། །སྟེང་གི་རུས་པ་རྣམས་གཟེར་ཟུག་བྱེད་དོ། །བརླའི་རྒྱུས་པ་རྣམས་འཁུམ་པར་བྱེད་དོ། །འོན་ཀྱང་རྒྱུ་མ་ལ་གནས་པ་རྣམས་སྦོམ་པོར་ཡང་མི་བྱེད་དོ། །སྐྲང་བ་དང་ལུས་རྣམས་ངལ་དུབ་སྐྱེད་པར་བྱེད་དོ། །ནད་འདི་དག་རྣམས་ནི་ཡན་ལག་དང་ཉིང་ལག་ཐུང་བར་བྱེད་པའི་བདག་གི་རླུང་གིས་བྱེད་དོ། །གལ་ཏེ་འཁྲུགས་པར་མ་གྱུར་ན་ནི་ཇི་སྐད་དུ་བཤད་པའི་ནད་དེ་དག་རྣམས་འབྱུང་བར་མི་འགྱུར་རོ། །ཡན་ལག་དང་ཉིང་ལག་ཐུང་བར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་ལ་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ།