ལུས་ལ་གནས་པར་གྱུར་པའི་ཟོས་པ་དང་འཐུངས་པ་དང་། འཆོས་པ་དང་། མྱངས་པ་རྣམས་ཐམས་ཅད་ཀྱང་བདག་གིས་བདེ་བར་འཇུ་བར་མི་འགྱུར་རོ། །ལུས་ཀྱི་མདོག་ཀྱང་བཟང་བར་མི་འགྱུར་རོ། །ལྟོ་རྣམ་པར་འགྱུར་བར་བྱེད་དོ། །སྤྲོ་བར་བྱེད་པའི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྒྱུས་པ་སྐྱོད་པར་བྱེད་པ་ཞེས་བྱ་བའི་བདག་གི་རླུང་དེ་འཁྲུགས་པར་གྱུར་པ་དང་མ་འཁྲུགས་པ་ན་ཡང་ལས་ཅི་ཞིག་བྱེད་པ་ཡིན་ན། ཉལ་བ་དང་སད་པ་དང་དབང་པོ་ཡིད་གཞན་གང་དག་གི་ལུས་ལ་གནས་པར་གྱུར་པའི་བྱ་བ་དེ་དག་རྣམས་ཐམས་ཅད་ཀྱང་འདིས་བྱེད་དོ། །རྒྱུས་པ་དང་ལྡན་པའི་རླུང་གིས་བྱིན་གྱིས་རློབ་པར་མི་བྱེད་ན་ནི་བདག་གི་ལུས་འཁྲུགས་པར་མི་འགྱུར་རོ། །བདག་གི་ལུས་ལ་ཚོར་བས་གཟིར་བར་ཡང་མི་འགྱུར་རོ། །ཞ་བོར་ཡང་མི་འགྱུར་ཏེ། དེའི་རླུང་འཁྲུགས་པར་མ་གྱུར་ནའོ། །གལ་ཏེ་ཡང་རྒྱུས་པ་སྐྱོད་བྱེད་ཀྱི་རླུང་འཁྲུགས་པར་གྱུར་ན་ནི། ཉལ་བ་དང་སད་པ་དང་ཡིད་གཞན་དུ་གྱུར་ཅིང་དབང་པོ་གཞན་ལ་ཡེངས་པར་གྱུར་པའི་བདག་གི་ལུས་ཀྱི་བྱ་བ་དེ་དག་རྣམས་ཐམས་ཅད་ནི་བདག་གིས་བརྗོད་པར་མི་ནུས་ཏེ་རླུང་དེའི་མཐུ་ལས་གྱུར་པ་ཡིན་ནོ། །དེས་རྒྱུས་པ་སྐྱོད་བྱེད་ཀྱི་རླུང་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བར་ལུས་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་ལུས་ལ་གནས་པར་གྱུར་པའི་རླུང་གཞན་གང་དག་གིས་ལས་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། འགྲོ་བ་རྣམ་པར་ཟློག་པར་བྱེད་པ་ཞེས་བྱ་བའི་རླུང་བདག་གི་ལུས་ལ་གནས་པ་ཡིན་ན། འཁྲུགས་པར་གྱུར་པ་ནའམ་འཁྲུགས་པར་མ་གྱུར་ན་བདག་ལ་ལས་ཅི་ཞིག་བྱེད་པ་ཡང་། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ་ན། ལུས་སུ་གྱུར་པ་ཐམས་ཅད་ཀྱི་ལུས་ཀྱི་ལམ་གང་ཡིན་པ་དེ་དག་རྣམས་ལ་འདིས་གེགས་བྱེད་དོ།