གཞང་སྨིན་པར་བྱེད་པ་ཞེས་བྱ་བའི་སྲིན་དེ་གལ་ཏེ་ལྟོགས་པར་གྱུར་ན། དེས་བདག་ལ་རྣམ་པ་སྣ་ཚོགས་པར་གཞང་སྨིན་པར་བྱེད་པའི་ནད་རྣམས་སྐྱེད་པར་བྱེད་དོ། །འདི་ལྟ་སྟེ་རློན་པ་དང་། སྐམ་པ་དང་། ལྷན་ཅིག་སྐྱེས་པ་དང་། སྔོན་གྱི་དུས་ན་སྐྱེས་པ་དང་། རླུང་ལས་གྱུར་པ་དང་། མཁྲིས་པ་ལས་གྱུར་པ་དང་། བད་ཀན་ལས་གྱུར་པ་དང་། གསུམ་གྱི་སྐྱོན་ལས་སྐྱེས་པའི་འདུས་པ་ལས་གྱུར་པའོ། །དེ་གལ་ཏེ་ལྟོགས་པར་གྱུར་ན་ངའི་བཤང་བ་རྒྱུ་བར་གྱུར་པའི་སྦུབས་སུན་འདོན་པར་བྱེད་དོ། །ཁྲག་རྒྱུ་བར་གྱུར་པའམ། ཁུ་བ་རྒྱུ་བར་གྱུར་པ་ཡང་རུང་སྟེ། བདག་གི་མེ་དྲོད་ཀྱང་ཉམས་པར་བྱེད་དོ། །བདག་གི་མེ་དྲོད་ཉམས་པ་དེས་གཞང་སྨིན་པར་བྱེད་པའི་སྲིན་ཁྲོ་བ་རབ་ཏུ་སྐྱེ་བར་འགྱུར་ཏེ། དེས་ངའི་གཞང་རྣམ་པ་སྣ་ཚོགས་པ་རྣམས་སུ་སྨིན་པར་བྱེད་དོ། །དེས་གཞང་སྨིན་པར་བྱེད་པའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་ལ་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ན་དེས་ཐོས་པ་ལས་བྱུང་བའི་ཤེས་རབ་ཀྱིས་སམ། ལྷའི་མིག་གིས་མཐོང་བར་གྱུར་པ། སྲིན་གྱི་རིགས་བཅུ་ལྷ་བ་ལ་རྒྱུ་བ་རྣམས་འདི་ལྟ་སྟེ། སྤུ་ལ་ཡོད་པ་དང་། ཁ་ནག་པ་དང་། སྤྲོ་བ་མེད་པ་དང་། ལུ་བའི་གཟེར་ཟུག་ཆེན་པོ་དང་། རྨོངས་པར་བྱེད་པ་དང་། མེ་མདོག་ཅན་དང་། འོག་ཏུ་འགྲོ་བ་དང་། ཨཽ་ཊྷིང་གཱ་དང་ཀུན་དུ་རྟོག་པ་དང་། དགའ་བ་པ་དང་རྣམས་སོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ། ལྷའི་མིག་གིས་མཐོང་བར་གྱུར་པ། སྤུ་ལ་ཡོད་པ་ཞེས་བྱ་བའི་ལུས་ཐམས་ཅད་ཀྱི་སྤུ་ལ་གནས་པ་ཡིན་ཏེ། དེ་གལ་ཏེ་ལྷ་བ་ངན་པར་གྱུར་ན་སྙོམས་པར་ལྷ་བ་རྣམས་སུན་འདོན་ནོ། །ལམ་དུ་འགྲོ་བར་ཡང་གྱུར་ནས་ཡན་ལག་དང་ཉིང་ལག་རྣམས་ཐམས་ཅད་ཀྱི་བདག་གི་ལྷ་བ་རྣམས་སུན་ཕྱུང་ནས་ཟ་བར་བྱེད་དོ། །དེའི་སྐྱོན་གྱིས་བདག་མདོག་ངན་པ་དང་། མཛེ་དང་རུས་པའི་གཟེར་བ་དང་། སྟོབས་ཟད་པར་ཡང་འགྱུར་རོ། །དེས་སྤུ་ལ་ཡོད་པའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་སོ་སོར་རིག་པར་བྱེད་དོ།