དེས་ཐོས་པ་ལས་བྱུང་བའི་ཤེས་རབ་ཀྱིས་སམ། ལྷའི་མིག་གིས་མཐོང་བར་གྱུར་པ་སྲིན་གྱི་རིགས་བཅུ་བདག་གི་རྟུག་པ་ལ་རྒྱུ་བར་བྱེད་པ་རྣམས་ནི་འདི་ལྟ་སྟེ། བེའུ་སྣབས་པ་དང་ཁབ་ཀྱི་ཁ་དང་ཕི་སྤི་སྐྱེས་པ་དང་རྐང་པ་མེད་པ་དང་བཤང་བ་རྣམ་པར་འཐོར་བྱེད་དང་སྐོམ་པས་གདུང་བ་དང་རྒྱུ་མ་འབྱེད་བྱེད་དང་རྣམ་པར་རེངས་བྱེད་དང་མདོག་བཟངས་དང་གཞང་སྨིན་བྱེད་དང་། སྲིན་གྱི་རིགས་བཅུ་བདག་གི་རྟུག་པ་ལ་རྒྱུ་བ་རྣམས་ལ་སོ་སོར་རྟོག་པར་བྱེད་དེ། བདག་གི་སྲིན་གང་དག་གིས་རང་བཞིན་དུ་གནས་པའམ། རང་བཞིན་དུ་མི་གནས་པ་ཅི་ཞིག་བྱེད་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་བམ། ལྷའི་མིག་གིས་མཐོང་བར་གྱུར་པ་ནི། བེའུ་སྣབས་པ་ཞེས་བྱ་བའི་སྲིན་བཤང་བ་ལ་རྒྱུ་བར་བྱེད་པ་ཡིན་ཏེ། གལ་ཏེ་ལུས་འདིའི་མེ་དྲོད་ཉམས་པར་གྱུར་ན་ནི་དེས་བདག་གི་ལུས་ཀྱི་མེ་དྲོད་ཤིན་ཏུ་ཡང་ཉམས་པར་བྱེད་དོ། །དེས་ཤ་སྐྱེས་པར་བྱེད་དེ་བཤང་བ་རྣམས་འཇིག་པས་མདོག་སྐྱ་བོར་འགྱུར་རོ། །བདག་འདིར་འཕེལ་བར་འགྱུར་བ་ཡང་མ་ཡིན་ནོ། །ངའི་ཁ་གདོང་སྐྱ་བོར་ཡང་འགྱུར་རོ། །དེས་བེའུ་སྣབས་པའི་སྲིན་ལ་སོ་སོར་བརྟགས་པར་གྱུར་པས་ཀྱང་ལུས་ཡང་དག་པ་ཇི་ལྟ་བ་བཞིན་དུ་སོ་སོར་རིག་པར་བྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ན། དེས་ཐོས་པ་ལས་བྱུང་བའི་ཤེས་རབ་དག་གིས་སམ། ལྷའི་མིག་གིས་མཐོང་བར་གྱུར་པ། ཁབ་ཀྱི་ཁ་ཞེས་བྱ་བའི་བདག་གི་སྲིན་ཡིན་ཏེ། དེ་ནི་ངའི་བཤང་བའི་ནང་ན་སྤྱོད་པ་དང་སྦོམ་པ་དང་རིང་བ་དང་ཕོ་བ་དང་ལོང་ཀ་དག་ན་རྒྱུ་བ་ཡིན་ཏེ། སྲིན་རྣམས་ཐམས་ཅད་ཀྱིས་གཟུང་བར་མི་ནུས་པ་ཡིན་ནོ། །དེའི་ངའི་ཕོ་བ་དང་ལོང་ཀ་དག་ཀྱང་གྱེན་ལ་བཟློག་ནས་བད་ཀན་དང་ལྷན་ཅིག་ཏུ་ཁར་འབྱིན་པར་བྱེད་དོ། །བདག་གི་སྙིང་ལ་ཡང་ལྡག་པར་བྱེད་དོ། །ལྐུགས་པའམ་མེ་དྲོད་ཉམས་པར་ཡང་བྱེད་དོ། །ཡང་གང་དག་ལུས་ཀྱི་ཕྱི་རོལ་དུ་འགྲོ་བར་འགྱུར་བ་རྣམས་ནི་མེ་ཏོག་དང་ལྷན་ཅིག་ཏུ་ཡུད་ཙམ་ཅིག་འཚོ་བར་འགྱུར་རོ། །དེས་ཁབ་ཀྱི་ཁའི་སྲིན་ལ་སོ་སོར་བརྟགས་པར་གྱུར་པས་ཀྱང་ཡང་དག་པ་ཇི་ལྟ་བ་བཞིན་དུ་ལུས་ལ་སོ་སོར་རྟོག་པར་བྱེད་དོ།