།ཉེ་བར་འཕེལ་བྱེད་ཀྱི་སྲིན་དེས་ཀྱང་བདག་གི་ལུས་ལ་རྣམ་པ་གཉིས་སུ་འཕེལ་བར་བྱེད་པ་ཡིན་ཏེ། གལ་ཏེ་ཡང་ངའི་ཟས་ཀྱི་སྐྱོན་གྱིས་འཕེལ་བྱེད་ཀྱི་སྲིན་རྣམས་རབ་ཏུ་རྒྱས་པར་མ་གྱུར་ན་ནི་དེས་ང་སྤྲོ་བ་དང་རྣམ་པར་བྲལ་བར་འགྱུར་རོ། །འགྲོ་བ་དང་འོང་བ་ལ་ཡང་བདག་བདེ་བར་གནས་པར་འགྱུར་རོ། །མྱུར་ཞིང་བརྟད་པར་གཉིད་ཀྱི་རྒྱུན་འབྱུང་བར་འགྱུར་རོ། །དེ་ལས་ཀྱང་བདག་གི་སྟོབས་རབ་ཏུ་འཕེལ་བར་འགྱུར་ཏེ། བདག་གི་པགས་པ་དང་། ཁྲག་དང་། ཚིལ་དང་། ལྷ་བ་དང་། རུས་པ་དང་། ཁུ་ཆུ་དང་། སྟོབས་རྣམས་སྐྱེ་བར་འགྱུར་རོ། །དེས་འཕེལ་བྱེད་ཀྱི་སྲིན་ལ་སོ་སོར་བརྟགས་པས་ཀྱང་ལུས་ཡང་དག་པ་ཇི་ལྟ་བ་བཞིན་དུ་རིག་གོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། ངའི་སྲིན་དྲི་ངན་པ་ཞེས་བྱ་བ་ཤ་དང་བཤང་བ་དང་གཅིན་གྱི་གསེབ་ན་གནས་པ་ཡིན་ལ། གལ་ཏེ་ཟས་ཀྱི་སྐྱོན་གྱིས་ཁྲོས་པར་གྱུར་ན་ངའི་ཟས་དེ་དག་གི་སྐྱོན་གྱིས་དེས་ཕྱི་ས་དང་གཅིན་དང་མཆིལ་མ་དང་སྣབས་རྣམས་དྲི་མི་ཞིམ་པར་འགྱུར་རོ། །སྣའི་རྣག་དང་མིག་གི་རྣག་དག་ཀྱང་འབྱུང་ངོ་། །སྲིན་རྣམས་དང་ལྷན་ཅིག་ཀུན་དུ་ཚོགས་པར་འགྱུར་བ་དེ་དང་དེ་དག་རྣམས་ཀྱང་སྲིན་གྱིས་དྲི་ངན་པ་རྣམས་སུ་སྐྱེད་པར་བྱེད་དོ། །གང་ཡང་གོས་སམ་མལ་ཆ་དང་ནམ་ཟས་ཀྱི་རིགས་སུ་གྱུར་པ་རྣམས་ཀྱང་རུང་སྟེ་སོའི་གསེབ་ཏུ་སོང་བར་གྱུར་ན། དེ་དག་རྣམས་སྲིན་དེ་ཡིས་དྲི་ངན་པ་དང་ཆེས་དྲི་ངན་པར་འགྱུར་བར་བྱེད་དོ། །མཚན་མོ་ཉལ་བར་གྱུར་པའི་སྐྱོན་གྱིས་ཀྱང་ལྕེའི་དྲི་མ་དེ་ཤིན་ཏུ་དྲི་མི་ཞིམ་པར་འགྱུར་རོ། །ལྕེའི་དྲི་མ་རྣམས་ཤིན་ཏུ་སྐྱ་བར་འགྱུར་བ་དང་ལུས་དྲི་ངན་པ་དང་དྲི་མ་ཅན་དུ་ཡང་འགྱུར་རོ། །དེས་ཡང་དག་པ་ཇི་ལྟ་བ་བཞིན་དུ་དྲི་ངན་པའི་སྲིན་དེ་ལ་སོ་སོར་བརྟགས་པར་གྱུར་པས་ཀྱང་ལུས་ཡང་དག་པ་ཇི་ལྟ་བ་བཞིན་དུ་སོ་སོར་རབ་ཏུ་རིག་པར་འགྱུར་རོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། རྔུལ་ལ་རྒྱུ་བ་ཞེས་བྱ་བའི་སྲིན་གཤུལ་ཤའི་གསེབ་ན་རྒྱུ་བ་ཡིན་ཏེ། དེ་གལ་ཏེ་ངའི་ཟས་ཞུ་བར་གྱུར་ན། དེས་བདག་གི་རུ་ཤིང་གི་ཡུལ་ཕྱོགས་ཀྱི་རུས་པ་གསུམ་གྱི་བུ་གུ་གང་ཡིན་པར་ངའི་བཤང་བ་དྲངས་ནས་འཕོངས་ཀྱི་མདོར་འཇུག་གོ།