།བདག་གི་རྒྱུས་པས་སྦྲེལ་བར་གྱུར་པའི་རུས་པའི་སྒལ་ཚིགས་རྣམས་ཐམས་ཅད་མ་ལུས་པ་ནས་ཐུག་ཏུ་མཐོང་བར་གྱུར་པས་དེས་བདག་གི་ལུས་ལ་རྒྱུས་པ་ལས་གྱུར་པའི་ཚོར་བ་རྣམས་སྐྱེད་པར་བྱེད་དོ། །ངས་ཟས་དང་བྲལ་བར་གྱུར་པས་གལ་ཏེ་ནང་ལྟོགས་པར་གྱུར་ན། དེ་བདག་གི་རྒྱུས་པ་ལ་གནས་པའི་ཁྲག་རྣམས་འཐུང་བར་བྱེད་དོ། །དེས་ངའི་རྩོལ་བ་རབ་ཏུ་ཉམས་པར་འགྱུར་རོ། །གལ་ཏེ་ཤ་ཟ་བར་བྱེད་ན་དེས་བད་ཀན་སྨུག་པོ་ང་ལ་སྐྱེད་དོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། རྒྱུས་པ་སྒུལ་བ་ཞེས་བྱ་བའི་སྲིན་དེ་ངའི་རྩ་ཀུན་ཐམས་ཅད་ཀྱི་མཐར་རྒྱུ་ཞིང་གསེབ་ཏུ་རྒྱུ་བར་བྱེད་པ་ཕྲ་བར་གྱུར་པས་ཤིན་ཏུ་ཐོགས་པ་མེད་པར་འགྲོ་བ་ཡིན་ནོ། །དེ་གལ་ཏེ་ངའི་ཟས་རྣམས་ཀྱི་སྟོབས་ཀྱིས་རྩ་རྣམས་འཇོམས་པར་བྱེད་དོ། །དེས་བདག་གི་ལུས་པོ་ཀུན་དུ་སྐམ་པར་འགྱུར་བའམ་ཡི་ཀ་མི་བདེ་བ་འབྱུང་བར་འགྱུར་རོ། །གལ་ཏེ་ཡང་ཆུ་རྒྱུ་བའི་རྩ་རྣམས་ལ་གནོད་པ་བྱེད་པར་གྱུར་ན། དེས་ངའི་རྐན་སྐམས་པར་འགྱུར་རོ། །གལ་ཏེ་ཡང་རྔུལ་རྒྱུ་བའི་རྩ་རྣམས་ལ་གནོད་པ་བྱེད་པར་གྱུར་ན་དེས་ཀྱང་ངའི་བ་སྤུའི་ཁུང་བུ་རྣམས་ནས་རྔུལ་ཀུན་དུ་འབྱུང་བར་འགྱུར་རོ། །ཡང་གལ་ཏེ་ཆུ་ངན་རྒྱུ་བའི་རྩ་རྣམས་ཀྱི་གསེབ་ཏུ་སོང་བར་གྱུར་ནས་སུན་འབྱིན་པར་བྱེད་ན་གཅིན་སྡོམ་པར་འགྱུར་རོ། །ཁུ་ཆུ་སུན་འདོན་པར་བྱེད་ན་ཡང་ཤིན་ཏུ་སྡུག་བསྔལ་མི་བཟད་པར་འགྱུར་རོ། །གལ་ཏེ་ཡང་རྟུག་པ་རྒྱུ་བའི་རྩ་རྣམས་ཀྱི་ནང་དག་ཏུ་རྒྱུ་བར་བྱེད་ཅིང་ཁྲོས་པར་གྱུར་ན་ནི་དེས་བདག་གི་རྟུག་པའི་གནས་རྣམས་སྡོམ་པས་འཆི་བ་ཙམ་གྱི་སྡུག་བསྔལ་བྱེད་དོ། །རྩ་སྒུལ་བར་བྱེད་པའི་སྲིན་དེ་ལ་སོ་སོར་བརྟགས་པར་གྱུར་ན་ཡང་དག་པ་ཇི་ལྟ་བ་བཞིན་དུ་སོ་སོར་ཤེས་སོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། པགས་པ་སྐྱོད་པར་བྱེད་པ་ཞེས་བྱ་བའི་སྲིན་པགས་པ་དྲུག་གི་གསེབ་ན་གནས་པ་རྣམས་གལ་ཏེ་ངའི་ཟས་ཀྱི་སྐྱོན་གྱིས་ཁྲོས་པར་གྱུར་ན་ནི། དེས་བདག་གི་པགས་པ་རྣམས་ཁ་དོག་ངན་པར་འགྱུར་རོ། །རྩུབ་པར་འགྱུར་བའམ་གཡེམ་པའམ་པགས་པ་རྣམས་དམར་བ་ཉིད་དམ་སྐྱ་བ་ཉིད་དམ་སྔོ་བ་ཉིད་དམ་རྡོལ་བར་འགྱུར་བའམ་སེན་མོ་དང་སྐྲ་དང་ཁ་སྤུ་དང་བ་སྤུ་རྣམས་དང་སྐྱི་རྣམས་ཉིལ་བར་འགྱུར་རོ།