།གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཟོས་པ་དང་། འཐུངས་པ་དང་། འཆོས་པ་དང་། མྱངས་པ་རྣམས་ཡང་དག་པར་བདེ་བར་སྨིན་པར་གྱུར་ནས་འཚོ་བར་བྱེད་པའི་རྩ་རྒྱུན་བདག་གི་ལུས་ལ་ཇི་ཙམ་ཅིག་ཡོད་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། རྩའི་རྒྱུན་བཅུ་གསུམ་མོ། །ཡུར་བའི་ཆུ་གང་གིས་ཞིང་རྒྱས་པར་བྱེད་པ་ཇི་ལྟ་བ་དེ་བཞིན་དུ་ལུས་འདི་ཉིད་དེ་དག་རྣམས་ཉིད་ཀྱིས་རྒྱས་པར་བྱེད་དོ། །འདི་ལྟ་སྟེ་སྲོག་རྒྱུ་བའི་རྒྱུན་དང་མཐར་རྒྱུ་བའི་རྒྱུན་དང་། ཆུ་རྒྱུ་བའི་རྒྱུན་དང་། རྔུལ་རྒྱུ་བའི་རྒྱུན་དང་། གཅིན་རྒྱུ་བའི་རྒྱུན་དང་། རྟུག་པ་རྒྱུ་བའི་རྒྱུན་དང་། དངས་མ་རྒྱུ་བའི་རྒྱུན་དང་། ཁྲག་རྒྱུ་བའི་རྒྱུན་དང་། ཤ་རྒྱུ་བའི་རྒྱུན་དང་། ཚིལ་རྒྱུ་བའི་རྒྱུན་དང་། རུས་པ་རྒྱུ་བའི་རྒྱུན་དང་། ལྷ་བ་རྒྱུ་བའི་རྒྱུན་དང་། ཁུ་ཆུ་རྒྱུ་བའི་རྒྱུན་ནོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། རྩའི་རྒྱུན་དེ་དག་རྣམས་ཀྱིས་གཞི་ཅི་ལས་ལུས་ཀྱི་ཁམས་གང་དག་རྒྱས་པར་བྱེད་ཅིང་། སྲིན་རྣམས་ཀྱང་བདག་གི་ལུས་ཀྱི་ཡུལ་ཕྱོགས་དང་། ཡུལ་ཕྱོགས་རྣམས་ལ་ཀུན་དུ་རྒྱུ་བ་རྣམས་ཀྱིས་ཀྱང་འགལ་བའམ་འཚོ་བར་བྱེད་པ་ཡིན་ཞེ་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་འགྱུར་བ། སྲོག་རྒྱུ་བའི་རྒྱུན་རྣམས་ཀྱིས་ནི་སྙིང་གི་གཞི་ལས་སོ། །མཐར་རྒྱུ་བའི་རྒྱུན་རྣམས་ཀྱིས་ནི་རྩིབ་ལོགས་ཀྱི་གཞི་ལས་སོ། །ཆུ་རྒྱུ་བའི་རྒྱུན་རྣམས་ཀྱིས་ནི་ལོང་ཀ་དང་གློ་བ་དང་བད་ཀན་རྣམས་ཀྱི་གཞི་ལས་སོ། །རྔུལ་རྒྱུ་བའི་རྒྱུན་རྣམས་ཀྱིས་ནི་སྤུའི་ཁུང་བུ་རྣམས་དང་ཚིལ་གྱི་གཞི་ལས་སོ། །གཅིན་རྒྱུ་བའི་རྒྱུན་རྣམས་ཀྱིས་ནི་ལྒང་པག་དང་ཕོ་མཚན་གྱི་གཞི་ལས་སོ། །རྟུག་པ་རྒྱུ་བའི་རྒྱུན་རྣམས་ཀྱིས་ནི་ཕོ་བ་དང་ཚིལ་ཁྲ་དང་གཞང་རྣམས་ཀྱི་གཞི་ལས་སོ། །བདག་གི་དངས་མ་རྒྱུ་བའི་རྒྱུན་རྣམས་ཀྱིས་ནི་མཇིང་པའི་རྩ་བཅུ་དང་མཆིན་པ་དང་སྙིང་རྣམས་ཀྱི་གཞི་ལས་སོ། །ཁྲག་རྒྱུ་བའི་རྒྱུན་རྣམས་ཀྱིས་ནི་བདག་གི་མཆེར་པ་དང་མཆིན་པའི་གཞི་ལས་སོ། །ཤ་རྒྱུ་བའི་རྒྱུན་རྣམས་ཀྱིས་ནི་པགས་པ་དང་ཆུ་རྒྱུས་ཀྱི་གཞི་ལས་སོ། །ཚིལ་རྒྱུ་བའི་རྒྱུན་རྣམས་ཀྱིས་ནི་མཁལ་མ་དང་ཞག་རྣམས་ཀྱི་གཞི་ལས་ཏེ། གཞུག་རུས་ཀྱི་གཞི་ལས་དང་བདག་གི་རུས་པ་རྒྱུ་བའི་རྒྱུན་རྣམས་ཀྱི་གཞི་ལས་ནི་ལོགས་དང་ཟས་ཀྱི་གནས་དང་པོ་དང་གློ་བ་རྣམས་ལས་ཡིན་ལ།