།དེའི་ཕྱིར་ན་ལུས་ལ་གནས་པའི་སྲིན་རྣམས་བསྒོམས་པར་གྱུར་ནས་རོ་རྣམས་ལས་རྣལ་འབྱོར་སྤྱོད་པ་འདོད་ཆགས་དང་འབྲལ་ལོ། །འདོད་ཆགས་དང་བྲལ་བ་དེས་ཟས་ཀྱིས་ཀུན་དུ་འཁྲིད་པ་མ་ཡིན་ནོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ནས། རྒྱབ་ལ་སོ་སོར་རྟོག་པར་བྱེད་པ་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་ཡང་དག་པ་ཇི་ལྟ་བ་བཞིན་དུ་མཐོང་བར་གྱུར་པ། རྒྱབ་ཏུ་གྱུར་པའི་རུས་པ་རྣམས་ནི་ལྔ་བཅུ་རྩ་བཞིའོ། །བྲང་གི་ནི་བཅུ་བཞིའོ། །འདུས་པའི་བཅུ་གཉིས་སོ། །ལོགས་གཅིག་ལ་ནི་བཅུ་གཉིས་སོ། །ལོགས་གཅིག་ལ་ཇི་ཙམ་པ་གཉིས་པ་ཡང་དེ་ཙམ་ཁོ་ནའོ། །ཐང་བ་ཡང་ཇི་ཙམ་པ་དེ་ཙམ་སྟེ། རུས་པའི་གོང་བུ་རྣམས་སླར་ཡང་རུས་པའི་ཕུང་པོའི་ལུས་སུ་བྱས་ནས་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་སོ། །མགྲིན་པ་ནས་བཟུང་ནས་ཇི་སྲིད་འཕོངས་ཀྱི་བར་དུ་སོ་སོར་རྟོག་པར་བྱེད་དེ། ཤའི་དུམ་བུ་ཇི་ཙམ་ཅིག་ཡོད་པ་ཡིན་ན། ངོས་གཅིག་ལ་ཇི་ཙམ་པ་གཉིས་པ་ལ་ཡང་དེ་ཙམ་ཡིན་ནོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། དེ་དག་རྣམས་རྒྱུས་པ་ཇི་སྙེད་ཅིག་སྦྲེལ་བ་ཡིན་ན་མགྲིན་པ་ནས་བཟུང་ནས་ཇི་སྲིད་མཇུག་མའི་བར་དུ་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ། བདག་གི་རྒྱུས་པས་སྦྲེལ་བ་རྣམས་ནི་མགྲིན་པ་ནས་བཟུང་ནས་མཇུག་མའི་བར་དུ་ངོས་གཅིག་ལ་བརྒྱ། ངོས་གཞན་ལ་ཡང་བརྒྱ་ཉིད་ཡིན་ཏེ་རྒྱུས་པ་ཕྲ་མོ་རྣམས་ནི་མ་གཏོགས་སོ། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། བདག་གི་ཚིལ་གྱི་ཚད་ཇི་ཙམ་ཞིག་ཡིན་ཞེས་མགྲིན་པ་ལ་སོགས་མཇུག་མའི་བར་དུ། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བ་ནི། ཟས་བསོད་པའི་དབང་གིས་ཚིལ་རྣམས་འཕེལ་བར་འགྱུར་རོ། །འགྲིབ་པ་ཡང་སྟེ་བདག་གི་རྣམ་པ་ཐམས་ཅད་བྱས་པ་ལ་ཡང་མ་ག་དྷཱའི་སྲང་ལྔ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན་ངའི་ལུས་ཀྱི་ཆུའི་ཚད་ནི་ཅི་ཙམ་ཡིན་ཞེས་དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ།