དེས་བདག་ལ་རང་བཞིན་དུ་གནས་པའམ་རང་བཞིན་དུ་མི་གནས་པ་ཅི་ཞིག་བྱེད་པ་ཡིན་ན། རོ་ལ་རབ་ཏུ་སྡང་བ་ཞེས་བྱ་བའི་སྲིན་ནི་རོ་གཅིག་འདོད་པ་ཡིན་གྱི་རོ་ལྷག་མ་རྣམས་ལ་ནི་རབ་ཏུ་སྡང་བ་ཡིན་ནོ། །དེ་ཡང་ན་མངར་བ་འདོད་པར་གྱུར་ན་ནི་རོ་ལྷག་མ་རྣམས་ལ་རབ་ཏུ་སྡང་བར་འགྱུར་རོ། །དེ་ཡང་ན་སྐྱུར་བ་འདོད་ན་ནི་རོ་ལྷག་མ་རྣམས་ལ་སྡང་བར་འགྱུར་བ་ཡིན་ནོ། །དེ་ཡང་ན་ཚ་བ་འདོད་པར་གྱུར་ན་ནི་རོ་ལྷག་མ་རྣམས་ལ་རབ་ཏུ་སྡང་བར་འགྱུར་རོ། །དེ་ཡང་ན་ལན་ཚྭ་འདོད་པར་གྱུར་ན་ནི་རོ་ལྷག་མ་རྣམས་ལ་རབ་ཏུ་སྡང་བར་འགྱུར་རོ། །དེ་ཡང་ན་ཁ་བ་འདོད་པར་གྱུར་ན་ནི་རོ་ལྷག་མ་རྣམས་ལ་རབ་ཏུ་སྡང་བར་འགྱུར་རོ། །རབ་ཏུ་སྡང་བར་གྱུར་པའི་སྲིན་དེ་རོ་རྣམས་གང་དང་གང་དག་མངོན་པར་མི་འདོད་པ་དེ་དང་དེ་དག་རྣམས་ཉིད་ང་ཡང་མི་འདོད་པ་ཡིན་ནོ། །རོ་རྒྱུ་བ་ཞེས་བྱ་བའི་བདག་གི་ལྕེའི་རྩེ་མོའི་སྦུབས་ལ་རོ་སྣང་བའི་རྗེས་སུ་འཐུན་པས་དེ་འབྱུང་སྟེ། བདག་གི་ལྕེའི་རྩེ་མོ་སྐམ་པར་འགྱུར་རོ། །བདག་གི་ལྕེ་ཡང་དེ་ཁྲོས་པར་གྱུར་ན་འབྲབ་གཟེར་དུ་བྱེད་པ་དང་ལྕི་བར་འགྱུར་རོ། །མགུལ་པ་ཟིལ་གྱིས་གནོན་པར་གྱུར་ན་ནི་མ་ཁྲོས་པ་ཡིན་ནོ། །ཁྲོས་པར་མ་གྱུར་ན་ནི་ཇི་སྐད་དུ་བཤད་པའི་ནད་དེ་དག་རྣམས་མི་འབྱུང་ངོ་། །གཞན་ཡང་རྣལ་འབྱོར་སྤྱོད་པ་ནང་གི་བདག་ཉིད་ཀྱི་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་བམ་ལྷའི་མིག་གིས་མཐོང་བར་གྱུར་པ་ནི། ཉལ་བ་ལ་དགའ་བ་ཞེས་བྱ་བའི་ངའི་སྲིན་ཕྲ་བར་གྱུར་པ་ཉི་ཟེར་གྱི་རྡུལ་གྱི་ཚད་ཙམ་ཡིན་ནོ། །ཐམས་ཅད་ཀྱིས་མ་ཞུགས་པ་གང་ཡིན་པའི་རྒྱུན་རྣམས་སུ་དེ་མངོན་པར་རྒྱུག་པར་བྱེད་པ་ཡིན་ཏེ། གནད་དང་ལྷ་བའི་གསེབ་རྣམས་དང་ཤའི་གོང་བུའི་གསེབ་རྣམས་དང་མགོ་བོའི་གླད་ཕོར་གྱི་གསེབ་རྣམས་དང་འགྲམ་པའི་རུས་པའི་གསེབ་རྣམས་དང་སོའི་རྩ་བའི་གསེབ་རྣམས་དང་མགུལ་པའི་གསེབ་རྣམས་དང་མགྲིན་པའི་སྦུ་གུའི་གསེབ་རྣམས་དང་རྣ་བའི་གསེབ་རྣམས་དང་མིག་གི་གསེབ་རྣམས་དང་སྣའི་གསེབ་རྣམས་དང་སྐྲ་དང་ཁ་སྤུའི་གསེབ་རྣམས་སུ་རླུང་བཞིན་དུ་རྒྱུ་བར་བྱེད་དོ། །ཉལ་བ་ལ་དགའ་བའི་སྲིན་དེ་གང་གི་ཚེ་ཉིན་མོ་ནད་པར་འགྱུར་བ་དང་ངལ་བར་ཡང་འགྱུར་རོ།