ཕ་དང་མ་དང་དགྲ་བཅོམ་པ་རྣམས་སྲོག་གཅོད་པར་བྱེད་པ་དང་དགེ་འདུན་འབྱེད་པར་བྱེད་པ་དང་། སངས་རྒྱས་བཅོམ་ལྡན་འདས་ལ་ངན་སེམས་ཀྱིས་ཁྲག་འབྱིན་པར་བྱེད་པ་དང་ལས་དེ་རྣམས་ཀྱིས་མནར་མེད་པའི་དམྱལ་བ་ཆེན་པོར་སྐྱེ་བར་འགྱུར་རོ། །དེས་དམྱལ་བ་པ་རྣམས་ཀྱི་ལས་ཀྱི་རྣམ་པར་སྨིན་པ་རྣམས་ལ་བསམས་ནས་སེམས་ཅན་རྣམས་ལ་རྗེས་སུ་སྙིང་བརྩེ་བར་བྱེད་དོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། དེས་ཡི་དགས་ཀྱི་འགྲོ་བར་གཏོགས་པའི་སེམས་ཅན་རྣམས་ཇི་ལྟར་མཐོང་བ་ཡིན་ཞེ་ན། གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། སེར་སྣ་རྣམ་པ་དུ་མས་སྐྱེས་པའི་ཡི་དགས་རྣམས་སམ་དཔག་ཚད་ལྔ་བརྒྱའི་ས་འོག་ཉིད་དུ་སྐྱེས་པར་གྱུར་པ་རྣམས་ལ་རྣམ་པ་དུ་མར་ཡང་ཟས་མེད་པ་ཤིན་ཏུ་སྨེ་བར་གྱུར་པ་ཕན་ཚུན་དུ་ཟས་སུ་གྱུར་པ་ལྟོགས་པ་དང་སྐོམ་པས་ཉམ་ཐག་པས་ཤིན་ཏུ་སྡུག་བསྔལ་བར་གྱུར་པ་རྣམས་མེའི་ཆར་འབབ་པས་སྲེག་པར་བྱེད་པ་རྣམས་ནི། ལས་ཇི་ལྟ་བ་བཞིན་དུ་ཉེ་བར་འགྲོ་བ་དང་ལས་ཀྱི་བགོ་སྐལ་ལ་སྤྱོད་པ་དང་ལས་ཀྱི་སྐྱབས་གནས་པ་རྣམས་ཡིན་ཏེ། ཤིན་ཏུ་ཡང་སྡུག་བསྔལ་བར་གྱུར་པའི་ཡི་དགས་དེ་དག་རྣམས་མཐོང་ནས། གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་པ་ན། དེས་དུད་འགྲོའི་འགྲོ་བར་གཏོགས་པ་རྣམས་ལ་ཀུན་དུ་ལྟ་བར་བྱེད་དོ། །དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་ལ། རྣམ་པ་དུ་མར་གྱུར་པ་རྣམས་མཐོང་བ་ཡིན་ནོ། །མདོར་བསྡུ་ན་གནས་གསུམ་ན་རྒྱུ་བ་རྣམས་ལ་འདི་ལྟ་སྟེ། ཆུ་ལ་རྒྱུ་བར་བྱེད་པ་རྣམས་ནི་ཉ་ལ་སོགས་པའོ། །ཐང་ལ་རྒྱུ་བར་བྱེད་པ་རྣམས་ནི་གླང་པོ་ཆེ་དང་། རྟ་དང་། བ་ལང་དང་། མ་ཧི་ཥ་དང་། རི་དགས་དང་། ཕག་པ་ལ་སོགས་པ་རྣམས་སོ། །ནམ་མཁའ་ལ་རྒྱུ་བ་རྣམས་ཀྱང་རྣམ་པ་དུ་མའོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་པར་བྱེད་པ་ན། མཐོང་བ་དང་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་ཇི་ལྟར་སྐྱེ་གནས་ལས་སྐྱེ་བའི་དུད་འགྲོ་རྣམས་མཐོང་བ་ཡིན་ཞེ་ན།