ཇི་ལྟར་རིས་བསྒྲིབས་པའི་གཟུགས་རྣམས་ཉིད་མཐོང་བ་དེ་བཞིན་དུ་སྒྲ་རིས་བསྒྲིབས་པར་གྱུར་པ་ཡང་ཐོས་པ་ཡིན་ཏེ། ཆོས་ཉིད་ཀྱི་ཁྱད་པར་གྱིས་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་འཛམ་བུའི་གླིང་པ་རྣམས་དང་བྱང་གི་སྒྲ་མི་སྙན་པ་རྣམས་དང་ཤར་གྱི་ལུས་འཕགས་པོའི་མི་རྣམས་ཀྱི་སྣའི་རྣམ་པར་ཤེས་པ་འཇུག་པར་འགྱུར་བས་མི་རྣམས་ཀྱི་གནས་གསུམ་ན་མིག་ལ་སོགས་པ་རྣམས་སོ་སོར་ཐ་དད་པར་འཇུག་པ་ཡིན་པ་དེ་ཁོ་ན་བཞིན་དུ་བ་ལང་སྤྱོད་པ་རྣམས་ཀྱི་སྣའི་རྣམ་པར་ཤེས་པ་ཡང་འཇུག་པ་ཡིན་ནམ་ཅི། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ། དེས་ན་གང་དག་མེ་ཏོག་རྣམས་སམ་གཞན་ཡང་རུང་སྟེ། དངོས་པོ་མིག་གིས་མཐོང་བ་རྣམས་དེས་དྲི་ཡང་འཛིན་པར་བྱེད་དོ། །འདི་ལྟ་སྟེ། ཆོས་ཉིད་ཀྱི་ཁྱད་པར་གྱིས་མཐོང་བའི་དངོས་པོ་རྣམས་ཀྱི་དྲི་འཛིན་པར་བྱེད་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་བ་ལང་སྤྱོད་པ་རྣམས་ཀྱི་ལྕེའི་རྣམ་པར་ཤེས་པ་འཇུག་པ་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་དེ་དག་ན་སཱ་མ་ཀཱའི་ཟས་ཟ་བ་དང་བ་ལང་གི་འོ་མ་དང་ཞོ་དང་དར་བ་རྣམས་ཀྱིས་རྟག་ཏུ་ཡང་སྐོམ་གྱི་བྱ་བ་བྱེད་དེ། ཇི་ལྟར་འཛམ་བུའི་གླིང་པ་རྣམས་བུ་རམ་ཆང་དང་རྒུན་ཆང་དང་མངར་ཆང་དང་ཟན་ཆང་རྣམས་ཡིན་པ་དེ་ལྟར་བ་ལང་སྤྱོད་པ་རྣམས་ཀྱི་བ་ལང་གི་འོ་མ་དང་ཞོ་དང་དར་བ་རྣམས་ཡིན་ནོ། །ཇི་ལྟར་འབྲས་ཤ་ལི་ཡིས་ཚིམ་པར་གྱུར་པ་དེ་ལྟར་བ་ལང་སྤྱོད་པ་རྣམས་སཱ་མ་ཀཱ་ཡིས་ཚིམ་པ་ཡིན་ནོ། །གཞན་ཡང་རྣལ་འབྱོར་སྤྱོད་པ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ཇི་ལྟར་བ་ལང་སྤྱོད་པ་རྣམས་ཀྱི་ལུས་ཡིན་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་མཐོང་བར་གྱུར་པ་དེ་ནི་ཏ་ལ་ཙམ་དུ་མཐོ་བར་གྱུར་པ་ཡིན་ཏེ། རང་གི་ལས་ཀྱིས་ཡིན་པས་ཇི་ལྟར་ལས་རྣམས་དང་འདྲ་བའི་གཟུགས་ཡིན་ནོ། །གཞན་ཡང་རྣལ་འབྱོར་སྤྱོད་པས་སྐྱེས་བུའི་གནས་བཞི་ན་མཚུངས་ཤིང་འདྲ་བར་གྱུར་པའི་ཡིད་དང་མཚུངས་ཤིང་འདྲ་བར་གྱུར་པའི་སྐྱེ་བ་དང་མཚུངས་ཤིང་འདྲ་བར་གྱུར་པའི་རྟེན་རྣམས་ཀྱང་ཕན་ཚུན་དུ་བལྟས་པར་གྱུར་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་སམ་ལྷའི་མིག་གིས་ཤེས་པས་ཀྱང་སྐྱེས་བུ་གཅིག་ཀྱང་ཡོད་པར་མ་མཐོང་ངོ་།