ལེ་ལོའི་སྐྱོན་དེ་དག་རྣམས་དེས་དྲན་པས་རྟག་ཏུ་ཡོན་ཏན་འཛིན་པར་འགྱུར་ཞིང་སྐྱོན་རྣམས་ལ་རྣམ་པར་སྡང་བས་ལེ་ལོ་མེ་བཞིན་དུ་སྤོང་བར་བྱེད་དོ། །མཚོན་ཆ་བཞིན་དུ་ཡང་ཡོངས་སུ་སྤོང་བར་བྱེད་དོ། །ཡང་ཇི་ལྟར་འགའ་ཞིག་གི་དོན་རྣམས་ཉམས་པ་ཉེ་བར་འབྱུང་ན་ཡང་ཐམས་ཅད་ལེ་ལོའི་སྐྱོན་གྱིས་ཡིན་ནོ། །ལེ་ལོ་མེད་པ་དེའི་ཐོས་པའི་དོན་དང་ཐོས་པའི་དོན་རྣམས་འགྲུབ་པའོ། །འདི་ནི་དམ་པའི་ཆོས་བསྒྲགས་པའི་ཡོན་ཏན་གཞན་ཡིན་ནོ། །དམ་པའི་ཆོས་བསྒྲགས་པའི་ཡོན་ཏན་གཞན་ཡང་ཡོད་དོ། །འདི་ཡང་གང་ཞེ་ན་འདི་ལྟ་སྟེ། བྱས་པ་ཤེས་པར་གྱུར་པའོ། །ཆོས་གཞན་ཡང་གཞན་རྣམས་ཐོས་པར་གྱུར་ནས་བྱས་པ་རིག་པ་དང་དེ་ཁོ་ན་ཉིད་ཤེས་པ་དང་བྱས་པ་ཤེས་པའི་ཡང་ཡོན་ཏན་རྣམས་ཐོས་ནས་ཆོས་སྒྲོགས་པ་ལས་རྟག་པ་ཉིད་དུ་བྱས་པ་ཤེས་པར་འགྱུར་རོ། །བྱས་པ་ཤེས་པ་བྱས་པ་རིག་པར་གྱུར་པ་དེའི་གྲོགས་པོ་ཐམས་ཅད་ཤིན་ཏུ་བརྟན་པར་འགྱུར་རོ། །སྐྱེས་བུ་གང་དག་གིས་འདི་ལ་ཡང་གྲོགས་པོར་ཁས་མ་བླངས་པར་གྱུར་པ་དེ་དག་རྣམས་ཐམས་ཅད་ཀྱང་གྲོགས་པོ་ཉིད་དུ་འགྱུར་རོ། །ཡོན་ཏན་དང་ལྡན་པ་འདི་ཞེས་བྱས་ནས་གང་དག་ལ་འདི་ལ་ཕན་པ་ཆུང་ངུས་བྱས་པར་གྱུར་པ་དེ་ཡང་དྲན་པར་བྱེད་དོ། །དེ་བྱས་པ་ཤེས་པ་དེ་དང་ལྡན་པར་གྱུར་པས་ཡོན་ཏན་ཆེན་པོ་རྣམས་ཐོབ་པར་འགྱུར་ཏེ་ཐམས་ཅད་མཁྱེན་པ་ཉིད་དོ། །དམ་པའི་ཆོས་བསྒྲགས་པ་ལ་ཡོན་ཏན་གཞན་ཡང་ཡོད་དོ། །འདི་ཡང་གང་དག་ཞེ་ན་འདི་ལྟ་སྟེ། རྟག་ཏུ་འཆི་བ་རྗེས་སུ་དྲན་པར་བྱེད་པའོ། །རྗེས་སུ་དྲན་པ་དེ་དག་རྣམས་ཀྱི་མཆོག་ཏུ་གྱུར་པ་ནི་འདི་ལྟ་སྟེ། འཆི་བ་རྗེས་སུ་དྲན་པའོ། །འཆི་བ་དཔྱད་པས་ཟིལ་གྱིས་མནན་པས་ནི་སེམས་ཅན་རྣམས་ཐམས་ཅད་འཇིགས་པ་དང་བཅས་པར་འགྱུར་རོ། །འཇིགས་པ་དང་བཅས་པར་གྱུར་ནས་ནི་དོན་མ་ཡིན་པ་རྣམས་ནི་མི་བྱེད་དོ། །མིག་གིས་གཟུགས་རྣམས་མཐོང་ནས་ཀུན་ཏུ་ཆགས་པར་མི་བྱེད་དོ། །ཀུན་ཏུ་རྟོག་པར་ཡང་མི་བྱེད་དོ། །རྣ་བས་སྒྲ་རྣམས་ཐོས་པར་གྱུར་ནས་ཀུན་ཏུ་ཆགས་པར་མི་བྱེད་དོ། །ཀུན་ཏུ་རྟོག་པར་ཡང་མི་བྱེད་དོ། །ལྕེས་རོ་རྣམས་མྱངས་པར་གྱུར་ནས་ཀུན་ཏུ་ཆགས་པར་མི་འགྱུར་ཞིང་ཀུན་ཏུ་རྟོག་པར་ཡང་མི་བྱེད་དོ།