དོན་ལ་རྗེས་སུ་ཆགས་པའི་འཇིགས་པ་ལྔ་ཡོངས་སུ་སྤངས་པ་དང་ཡང་དག་པར་ཉེ་བར་འཚོ་བ་དང་ཐུན་མོང་མ་ཡིན་པར་འགྱུར་བ་དང་། ལུས་ཞིག་པར་གྱུར་ནས་ཤི་བའི་འོག་ཏུ་ཡང་བདེ་འགྲོ་ལྷར་སྐྱེ་བར་འགྱུར་རོ། །དམ་པའི་ཆོས་བསྒྲགས་པ་འདིའི་ཡོན་ཏན་གཞན་ཡིན་ཏེ། འདི་ཡང་གང་དག་ཞེ་ན་འདི་ལྟ་སྟེ། འདི་ཡང་ཆོས་དང་ལྡན་པའི་ལོངས་སྤྱོད་ཅན་དུ་འགྱུར་བའོ། །དེ་ལྟ་དེ་ལྟ་བུའི་ཡོན་ཏན་དང་ལྡན་པའི་ཆོས་སྒྲོགས་པ་སྐྱེ་བོ་གང་ཚུལ་ཁྲིམས་དང་བཅས་པ་དེ་ལ་ཉེ་བར་སྟེན་པར་བྱེད་དོ། །དེ་ཚུལ་ཁྲིམས་ཀྱིས་ཕན་ཚུན་དུ་ཆ་སྐལ་སྦྱིན་པར་བྱེད་དོ། །དེ་དག་ཀྱང་གཞན་རྗེས་སུ་བཅོམ་པ་མ་ཡིན་ཞིང་གཞན་རྣམས་ངོ་མཚར་བར་བྱས་པ་མ་ཡིན་པར་ཆོས་པ་རྣམས་ཀྱི་དྲུང་ནས་རྙེད་པའི་སྐལ་བ་དེ་ཆོས་པ་དག་ལ་རབ་ཏུ་སྦྱིན་པར་བྱེད་པས་དེ་དག་རྣམས་གོང་ནས་གོང་དུ་ཁྱད་པར་དུ་འཕེལ་བར་འགྱུར་རོ། །འཇིག་རྟེན་གཉིས་ལ་ཕན་པ་དང་འཇིག་རྟེན་གཉིས་སུ་བདེ་བར་ཡང་འགྱུར་རོ། །འདི་ནི་དམ་པའི་ཆོས་བསྒྲགས་པའི་ཡོན་ཏན་གཞན་ཡིན་ལ། དམ་པའི་ཆོས་བསྒྲགས་པའི་ཡོན་ཏན་གཞན་ཡང་ཡོད་དོ། །འདི་ཡང་གང་ཞེ་ན་འདི་ལྟ་སྟེ། ལེ་ལོ་མེད་པར་གྱུར་པའོ། །མཁས་པའི་རང་བཞིན་གྱི་སྐྱེས་བུ་དག་གང་གི་ཚེ་ཆོས་བསྒྲགས་པ་ཉན་པར་བྱེད་པ་དེའི་ཚེ་ལེ་ལོའི་སྐྱོན་གྱིས་ཉན་པར་བྱེད་ན། གང་གི་ཚེ་གང་འཇིག་རྟེན་པ་དང་འཇིག་རྟེན་ལས་འདས་པའི་དོན་མི་འགྲུབ་པའོ། །དེ་དག་ཐམས་ཅད་ཀྱང་ལེ་ལོའི་སྐྱོན་གྱིས་ཡིན་ལ། ལེ་ལོའི་སྐྱོན་ཐོས་པར་གྱུར་ནས་ཡོངས་སུ་སྤོང་བར་བྱེད་དོ། །བརྩོན་འགྲུས་བརྩམས་པ་དང་དྲན་པ་དང་ལྡན་པར་འགྱུར་བ་དང་ཤེས་བཞིན་དང་ལྡན་པ་དང་དོན་རྣམས་ཐམས་ཅད་ལ་ཡང་ལེ་ལོ་དང་རྣམ་པར་བྲལ་བས་མྱུར་བར་བྱེད་པ་དང་དུས་སུ་བྱེད་པར་འགྱུར་བ་དང་སྡིག་པ་མེད་པར་བྱེད་པ་དང་འདོར་བ་མེད་པར་བྱེད་པ་ནི་དོན་རྣམས་ཐམས་ཅད་ཕུན་སུམ་ཚོགས་པར་འགྱུར་རོ། །འཇིག་རྟེན་གཉིས་ལ་ཕན་པར་བྱེད་པ་པོ་ལེ་ལོ་དང་བྲལ་བ་པོ་རྟག་ཏུ་གྲིམས་པར་གྱུར་པ། བརྩོན་འགྲུས་བརྩམས་པ་རྣམས་ནི་དོན་རྣམས་ཐམས་ཅད་ཀྱི་ཕ་རོལ་ཏུ་ཕྱིན་པར་འགྱུར་རོ། །རྩོམ་པ་ཐམས་ཅད་ཀྱང་ཡང་དག་པར་འཛིན་པར་བྱེད་དོ། །གལ་ཏེ་ཡང་འདི་ལ་བརྒྱ་ཞིག་ལ་ལེ་ལོས་སྙིང་ལ་ཞུགས་པར་གྱུར་ན་དམ་པའི་ཆོས་བསྒྲགས་པ་གང་ཡིན་པ་དེ་དེས་ཐོས་ནས། ལེ་ལོའི་སྐྱོན་དེ་དག་རྣམས་དེས་དྲན་པས་རྟག་ཏུ་ཡོན་ཏན་འཛིན་པར་འགྱུར་ཞིང་སྐྱོན་རྣམས་ལ་རྣམ་པར་སྡང་བས་ལེ་ལོ་མེ་བཞིན་དུ་སྤོང་བར་བྱེད་དོ།