དེས་ཡིད་ཀྱིས་ལེགས་པར་སྤྱོད་པ་རྣམས་དང་ཡང་དག་པར་ལྡན་པར་འགྱུར་རོ། །དེ་ལྟར་ཆོས་བསྒྲགས་པ་རྣམས་ལེགས་པར་སྤྱོད་པ་གསུམ་དང་ཡང་དག་པར་ལྡན་པར་གང་གི་ཚེ་གྱུར་པ་ན། དེའི་ཚེ་ལྷ་དང་མི་རྣམས་ཀྱི་ནང་དུ་སྐྱེས་པར་གྱུར་ནས་མཆོག་ཏུ་སྐྱིད་པར་འགྱུར་རོ། །ཚེ་རིང་བ་དང་ལྡན་པར་ཡང་འགྱུར་རོ། །དེ་ཡོངས་སུ་མྱ་ངན་ལས་འདའ་བར་ཡང་འགྱུར་རོ། །ཡོན་ཏན་རྣམས་ཐམས་ཅད་ནི་ཆོས་བསྒྲགས་པས་འཐོབ་པར་འགྱུར་གྱི་གཞན་རྣམས་ཀྱིས་ནི་མ་ཡིན་ནོ། །དེའི་ཕྱིར་བདེ་ལེགས་རྣམས་ཀྱི་རྩེ་མོ་རྣམས་སུ་འགྱུར་བ་ནི་གང་དམ་པའི་ཆོས་བསྒྲགས་པ་ལས་ཡིན་ནོ། །གཞན་ཡང་དམ་པའི་ཆོས་བསྒྲགས་པའི་ཡོན་ཏན་ཡོད་དོ། །འདི་ཡང་གང་ཞེ་ན་འདི་ལྟ་སྟེ། འཇིག་རྟེན་པ་རྣམས་ཀྱིས་རབ་ཏུ་བསྔགས་པར་འགྱུར་བ་ཡིན་ནོ། །ཐམས་ཅད་ཀྱང་ཆོས་བསྒྲགས་པ་ལས་ཡིན་ཏེ། ཚུལ་ཁྲིམས་དང་ལྡན་པ་དང་ཡོན་ཏན་དང་ལྡན་པ་དང་མང་དུ་ཐོས་པ་དང་རྣམ་པར་དུལ་བ་དང་བློ་གྲོས་རྒྱ་ཆེན་པོར་གྱུར་པ་དང་སྐྱེ་བོ་རྣམས་ཐམས་ཅད་ཀྱིས་ཀྱང་མངོན་པར་བརྗོད་པར་བྱ་བ་དང་། ཕྱག་འཚལ་བ་དང་སྙན་པར་སྨྲ་བའི་རང་བཞིན་དུ་འགྱུར་བ་དང་དྲང་པོ་དང་དྲང་པོའི་རང་བཞིན་ཅན་དུ་འགྱུར་བ་དང་ཐམས་ཅད་ཀྱང་ཆོས་སྒྲོགས་པ་ལས་ཡིན་ནོ། །དེ་ཡོན་ཏན་དེ་ལྟ་བུ་རྣམས་དང་ལྡན་པ་ནི་ཁ་ན་མ་ཐོ་བ་ཕྲ་རབ་ཙམ་ལ་ཡང་འཇིགས་པར་ལྟ་བའི་ཕྱིར་སྐྱེ་བོ་རྣམས་ཐམས་ཅད་ཀྱང་གྲོགས་པོར་འགྱུར་རོ། །ཐམས་ཅད་ཀྱིས་ཀྱང་འདི་རབ་ཏུ་བསྔགས་པར་བྱེད་དོ། །འདི་ལ་འཇིགས་པའམ་སྡུག་བསྔལ་བྱུང་བ་རྣམས་ཐམས་ཅད་ཀྱིས་ཀྱང་གྲོགས་བྱེད་པར་འགྱུར་རོ། །དེ་ལྟར་དམ་པའི་ཆོས་སྒྲོགས་པར་བྱེད་པ་རྣམས་འཇིག་རྟེན་པས་རབ་ཏུ་བསྔགས་པར་འགྱུར་རོ། །དེ་ལྟར་དམ་པའི་ཆོས་སྒྲོགས་པར་བྱེད་པ་དེ་དག་རྣམས་ལ་ཡོན་ཏན་གཞན་ཡང་ཡོད་དོ། །འདི་ཡང་གང་ཞེ་ན་འདི་ལྟ་སྟེ། ལྷ་རྣམས་ཀྱིས་འདི་དག་ལ་མངོན་པར་སྲུང་བར་བྱེད་པ་ཡིན་ནོ། །དེ་ལ་ཡོན་ཏན་དེ་ལྟ་བུ་དང་ལྡན་པར་གྱུར་པའི་ཆོས་སྒྲོགས་པ་པོ་ནི་ལུས་ཀྱིས་ལེགས་པར་སྤྱོད་པ་རྣམས་དང་ཡང་དག་པར་ལྡན་པའི་ཕྱིར་ན་ལྷ་རྣམས་ཀྱིས་མངོན་པར་སྲུང་བར་བྱེད་དོ། །ཇི་ལྟར་འདི་ཡོན་ཏན་དང་ལྡན་པར་གྱུར་པ་དང་འདི་དག་རྣམས་ཀྱིས་མངོན་པར་བསྲུངས་པས་སྐྱེ་བོའི་ཚོགས་ཆེན་པོ་རྣམས་ཀྱིས་ཀྱང་ཡོན་ཏན་བྱེད་པར་འགྱུར་རོ། །སྐྱེ་བོའི་ཚོགས་ཆེན་པོ་རྣམས་ཀྱིས་འདིའི་བར་དུ་གཅོད་པ་ཡང་ནུབ་པར་འགྱུར་ལ།