ཚེ་རིང་པོ་ཀུན་ཏུ་འཕེལ་བར་བྱེད་པའི་ལས་རྣམས་ཀྱང་འདི་ལ་མངོན་པར་འཕེལ་བར་འགྱུར་ཏེ། དེ་གང་གི་ཚེ་དམ་པའི་ཆོས་སྒྲོགས་པར་བྱེད་པ་ལ་ཆེད་ཆེར་གྱུར་པ་ན། དེའི་ཚེ་ལས་ཀྱི་འབྲས་བུའི་དེ་ཁོ་ན་ཉིད་མཐོང་བར་གྱུར་ནས་སྲོག་གཅོད་པ་ལ་སོགས་པའི་མི་དགེ་བའི་ལས་རྣམས་མི་བྱེད་དོ། །རྒྱུན་དུ་ཡང་དགེ་བའི་ལས་རྣམས་བསྟེན་ཅིང་བསྒོམས་ལ་ལན་མང་དུ་བྱེད་པར་ཡང་འགྱུར་རོ། །དེ་དགེ་བའི་ལས་དེ་དག་གི་རྣམ་པར་སྨིན་པས་ལྷ་དང་མི་རྣམས་སུ་ཚེ་རིང་བར་འགྱུར་ཏེ། དེས་དེ་ལྟར་དམ་པའི་ཆོས་བསྟེན་ཅིང་བསྒོམས་ལ་ལན་མང་དུ་བྱས་པའི་ཕྱིར་རོ། །དེའི་ཕྱིར་དམ་པའི་ཆོས་བསྒྲགས་པའི་ཡོན་ཏན་འདི་ནི་གཞན་ཡིན་ཏེ། འདི་ལྟ་སྟེ་ཚེ་རིང་པོར་འགྱུར་བའི་ལས་འདིས་ཀུན་ཏུ་སྤེལ་བར་བྱེད་པའོ། །དམ་པའི་ཆོས་བསྒྲགས་པའི་ཡོན་ཏན་གྱི་རྒྱུ་འདིས། དེ་དག་ཐོས་ནས་ཀྱང་ལྷ་དང་མི་རྣམས་སུ་སྐྱེ་བར་འགྱུར་རོ། །མིའི་འཇིག་རྟེན་དུ་སྐྱེས་པར་གྱུར་ནས་ཀྱང་དེ་གལ་ཏེ་ལྷ་རྣམས་ཀྱི་ནང་དུ་སྐྱེ་བར་འགྱུར་ན་ཚེ་རིང་བའི་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཁྱད་པར་དུ་ཡང་མདོག་དང་གཟུགས་དང་འོད་དང་རྩེད་མོས་རྣམ་པར་རྒྱུ་བ་དང་ལྡན་པར་འགྱུར་རོ། །དམ་པའི་ཆོས་བསྒྲགས་པ་དེས་གལ་ཏེ་མི་རྣམས་སུ་སྐྱེས་པར་གྱུར་ན་ཡང་། དེའི་རིགས་དང་གཟུགས་དང་ཕུན་སུམ་ཚོགས་པ་དང་ཡོན་ཏན་དང་ཚེ་ཡང་རིང་བར་འགྱུར་རོ། །ཡུལ་ལྗོངས་བཟང་པོར་ཡང་འདི་སྐྱེ་བར་འགྱུར་རོ། །དེ་ཡང་དག་པའི་ལྟ་བ་ཅན་དུ་ཡང་འགྱུར་རོ། །དམ་པའི་ཆོས་དེ་བསྟེན་ཅིང་བསྒོམས་ལ་ལན་མང་དུ་བྱས་པ་འདི་ནི་སྡུག་བསྔལ་ལས་ངེས་པར་འབྱུང་བ་གཞན་ཡིན་ཏེ། འདི་ལྟ་སྟེ་རབ་ཏུ་དང་བའི་ཡིད་ཀྱིས་དམ་པའི་ཆོས་བསྒྲགས་པ་ལ་གོམ་པ་འདོར་བས་ཚངས་པའི་བསོད་ནམས་རབ་ཏུ་འབྱུང་ངོ་། །དམ་པའི་ཆོས་སྒྲོགས་པ་ལས་གང་དག་གིས་དམ་པར་བྱས་ཏེ་འགྲོ་བར་བྱེད་པ་ན། དེ་དག་ནི་ལུས་ཀྱི་ལེགས་པར་སྤྱོད་པ་རྣམས་ལ་ཡང་དག་པར་སྦྱོར་བ་ཡིན་ནོ། །གང་དག་གིས་ཐོས་པའི་བློ་དེས་དེ་དག་གིས་ལེགས་པར་སྤྱོད་པ་དང་ཡང་དག་པར་ལྡན་པར་འགྱུར་རོ། །གང་ཐོས་པར་གྱུར་ནས་ཡིད་རབ་ཏུ་དད་པ་སྐྱེས་པར་གྱུར་པས་ནི། དེས་ཡིད་ཀྱིས་ལེགས་པར་སྤྱོད་པ་རྣམས་དང་ཡང་དག་པར་ལྡན་པར་འགྱུར་རོ།