བདག་གི་སྲིད་པ་གཞན་རྣམས་ནི་རབ་ཏུ་མི་ཤེས་སོ། །དེ་ལ་ཡོན་ཏན་དེ་དག་རྣམས་ཐམས་ཅད་ཀྱང་དམ་པའི་ཆོས་བསྒྲགས་པ་ལས་ཡིན་ནོ། །དེའི་ཕྱིར་ན་རྒྱུན་མི་འཆད་པར་ཆོས་མཉན་པར་བྱའོ། །ཡང་ཐབས་གཞན་གྱིས་ངེས་པར་གྲོལ་བར་བྱེད་པའི་རྒྱུའི་ཡོན་ཏན་གཞན་ཡོད་དོ། །འདི་དག་ཀྱང་གང་ཞེ་ན། འདི་ལྟ་སྟེ། ལོག་པའི་ལྟ་བ་ཅན་རྣམས་ཡང་དག་པའི་ལྟ་བ་ཅན་དུ་བྱེད་དོ། །གང་ཡང་ཐོག་མ་མེད་པའི་དུས་ནས་འཁོར་བའི་བྱ་བ་ངན་པ་རྣམས་ཀྱིས་ཕྱིན་ཅི་ལོག་ལ་རབ་ཏུ་ཞུགས་པའི་འགྲོ་བ་རྣམས་ཐོས་པ་ངན་པ་རྣམས་ལ་ཀུན་ཏུ་འཇུག་པར་འགྱུར་བ་ཡིན་ནོ། །ཐོས་པ་ངན་པས་ཀྱང་དམྱལ་བ་དང་ཡི་དགས་དང་དུད་འགྲོའི་འགྲོ་བ་རྣམས་སུ་སྐྱེ་བར་འགྱུར་བ་ཡིན་ནོ། །གང་གི་ཚེ་དམ་པའི་ཆོས་ཉན་པར་བྱེད་པ་དང་། དམ་པའི་ཆོས་སྒྲོགས་པ་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པ་ན། དེའི་ཚེ་ལོག་པར་ལྟ་བ་དེ་དག་སྟེན་ཅིང་སྒོམ་ལ་ལན་གྲངས་མང་དུ་བྱེད་པར་ཡང་མི་འགྱུར་རོ། །དེའི་ཚེ་འདི་ལ་བདེ་བ་རྣམས་ཀྱི་མཆོག་ཏུ་གྱུར་པ་དང་། སླུ་བ་མེད་པའི་ཡང་དག་པའི་ཡེ་ཤེས་འཆར་བར་འགྱུར་རོ། །དེའི་ཕྱིར་ན་དམ་པའི་ཆོས་བསྟེན་ཅིང་བསྒོམས་ལ་ལན་མང་དུ་བྱས་པར་གྱུར་པའི་ཡོན་ཏན་གཞན་ཡང་འདི་དག་ཡོད་དོ། །འདི་ཡང་གཞན་གང་དག་ཞེ་ན། འདི་ལྟ་སྟེ། སྐྱེས་པར་གྱུར་པའི་མི་དགེ་བའི་རྩ་བའི་རྣམ་པར་རྟོག་པ་རྣམས་སོ་སོར་འཇོམས་པར་བྱེད་དོ། །ཡང་དམ་པའི་ཆོས་བསྒྲགས་པ་བསྟེན་ཅིང་བསྒོམས་ལ་ལན་མང་དུ་བྱས་པའི་ཡོན་ཏན་འདི་དག་ནི་གཞན་ཡིན་ནོ། །འདི་ཡང་གང་ཞེ་ན། འདི་ལྟ་སྟེ། མི་དགེ་བའི་རྣམ་པར་རྟོག་པ་ཉུང་ངུ་ཙམ་ཞིག་ཡིད་ལ་སྐྱེས་པར་གྱུར་ཀྱང་། དེའི་ཚེ་མི་དགེ་བ་གཉེན་པོས་ངེས་པར་འཇོམས་པར་བྱེད་པ་ལ་འདི་ལྟ་སྟེ། གང་གི་ཚེ་འདོད་ཆགས་ཀྱི་རྣམ་པར་རྟོག་པ་སྐྱེས་པར་གྱུར་ན་ནི། དེའི་ཚེ་མི་སྡུག་པའི་གཉེན་པོས་ངེས་པར་འཇོམས་པར་བྱེད་དོ། །གང་གི་ཚེ་ཞེ་སྡང་གི་རྣམ་པར་རྟོག་པ་སྐྱེས་པར་གྱུར་པ་ན། དེའི་ཚེ་བྱམས་པའི་གཉེན་པོས་འཇོམས་པར་བྱེད་དོ། །གལ་ཏེ་གཏི་མུག་གི་རྣམ་པར་རྟོག་པ་སྐྱེས་པར་གྱུར་ན་ནི། དེའི་ཚེ་རྟེན་ཅིང་འབྲེལ་པར་འབྱུང་བའི་གཉེན་པོས་འཇོམས་པར་བྱེད་དོ།