།འདས་པའི་ཡུལ་དེ་དག་རྣམས་ལ་འདུན་པའི་འདོད་ཆགས་སྐྱེད་པར་མི་འགྱུར་རོ། །ཀུན་ཏུ་རྟོག་པར་མི་བྱེད་དོ། །ཡང་དག་པ་ཇི་ལྟ་བ་བཞིན་དུ་གྱུར་པས་སྒྲ་རྣམས་ལ་སོ་སོར་རྟོག་པར་ཡང་བྱེད་དོ། །སྒྲ་འདི་དག་ནི་རྟག་པ་མ་ཡིན། བདེ་བ་མ་ཡིན། བདག་དང་བཅས་པ་མ་ཡིན་གྱི། ཀུན་ཏུ་རྟོག་པ་འབའ་ཞིག་གིས་བཅོམ་པར་གྱུར་པའི་བྱིས་པའི་སྲོག་ཆགས་རྣམས་ཀྱིས་ཇི་ལྟར་བདེ་བར་ཀུན་ནས་སྒྱུར་བར་བྱེད་པ་པོར་དེ་ལྟར་ཡོངས་སུ་བརྟགས་ཤིང་ཞེན་པ་རྣམས་ལ་སྒྲ་རྣམས་རྣ་བའི་ཡུལ་དུ་འགྱུར་བས་སེམས་ཀུན་ནས་དཀྲུག་པར་བྱེད་པ་ཡིན་ནོ། །དེ་ལ་ཇི་ལྟ་བ་བཞིན་དུ་རྣམ་པ་དུ་མར་ཚུལ་བཞིན་ཡིད་ལ་བྱེད་པས་ཡང་དག་པ་ཇི་ལྟ་བ་བཞིན་དུ་མཐོང་བས་འདིས་ཇི་ལྟ་བ་བཞིན་དུ་ཀུན་དགའ་བར་བྱེད་པ་ན། སྒྲ་དེ་དག་ཉིད་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པར་བྱེད་དེ། ཇི་ལྟར་སྒྲ་འདི་ནི་ཆང་པ་སྟོང་པ་དང་རྒྱུན་འཆད་པ་དང་སྙིང་པོ་མེད་པ་ཡིན་ཏེ། འདི་ནི་སྙིང་པོ་ཅུང་ཟད་ཅིག་ཀྱང་ཡོད་པ་ནི་མ་ཡིན་གྱི། འཁོར་བར་རྟོག་པ་འབའ་ཞིག་གིས་ཀུན་ཏུ་ཕྲོགས་པའི་བྱིས་པ་སོ་སོའི་སྐྱེ་བོ་རྣམས་ཡིན་ནོ། །དེ་གང་གི་ཚེ་སྒྲ་དེ་ཉིད་ལ་ཀུན་ཏུ་ལྟ་བར་བྱེད་པ་ན། དེའི་ཚེ་ཐམས་ཅད་ཀྱང་སྙན་པ་འདོད་པ་སྡུག་པ་ཡིད་དུ་འོང་བར་གྱུར་པའི་ཁྱད་པར་ཐམས་ཅད་དང་ལྡན་པའི་སྒྲ་རྣམས་ཐམས་ཅད་ཀྱིས་ཀྱང་ཕྲོགས་པར་མི་འགྱུར་རོ། །ཆོག་ཤེས་པ་དེས་ནི་བདེ་བའི་མཆོག་རྣམས་ཐོབ་པར་འགྱུར་རོ། །གཞན་ཡང་དགེ་སྦྱོང་ངམ་བྲམ་ཟེ་རྣམས་དང་དེའི་རིགས་ཅན་གཞན་རྣམས་ཀྱིས་ཀྱང་སྣས་དྲི་རྣམས་སྣོམ་པར་མི་བྱེད་ཅིང་ཀུན་ཏུ་རྟོག་པར་ཡང་མི་བྱེད་དོ། །ཡིད་ཀྱིས་ཀྱང་ཚུལ་བཞིན་མ་ཡིན་པ་ཡིད་ལ་བྱེད་པས་སེམས་པར་མི་བྱེད་དོ། །ཡང་དག་པ་ཇི་ལྟ་བ་བཞིན་དུ་སྣས་དྲི་འདི་དག་རྣམས་སྣོམ་པར་བྱེད་པ་རྣམས་ཀྱིས་ནི་ཡང་དག་པ་ཇི་ལྟ་བར་མཐོང་བར་བྱེད་པ་ཡིན་ཏེ། ཇི་ལྟར་དྲི་འདི་དག་རྣམས་ནི་རྟག་པའམ་བརྟན་པའམ། ཐེར་ཟུག་གམ་རྣམ་པར་མི་འགྱུར་བའི་ཆོས་ཅན་ནི་མ་ཡིན་གྱི་དྲི་གང་ལ་ཀུན་ཏུ་ཆགས་པར་བྱེད་པ་དང་། དེས་རྨོངས་པར་བྱེད་པ་དང་ཚུལ་བཞིན་མ་ཡིན་པའི་ཡིད་ལ་བྱེད་པས་སེམས་ཀྱི་རྒྱུན་དཀྲུགས་པ་དྲི་ལ་ཆགས་པ་གང་ཡིན་པ་རྣམས་ནི། མི་རྟག་པ་དང་འདི་དག་ནི་སྙིང་པོ་མེད་པ་དང་གསོག་དང་གསོབ་ཡིན་ནོ།