།བཞིན་གྱི་མདོག་རབ་ཏུ་དང་བར་གྱུར་པས་ཀྱང་སེམས་ཅན་རྣམས་ཐམས་ཅད་ཀྱི་འདོད་པ་སྡུག་པ་ཡིད་དུ་འོང་བར་འགྱུར་རོ། །ལུས་ཞིག་ནས་ཀྱང་མཐོ་རིས་བདེ་འགྲོའི་འཇིག་རྟེན་པ་ལྷ་རྣམས་སུ་སྐྱེ་བར་འགྱུར་ལ། ཐ་མར་ཡང་ཡོངས་སུ་མྱ་ངན་ལས་འདའ་བ་ཡིན་ནོ། །དེའི་སེམས་རབ་ཏུ་དང་བར་གྱུར་པ་དང་། སེམས་ཅན་རྣམས་ཐམས་ཅད་ལ་མཉམ་པ་ཉིད་དུ་གྱུར་པའི་དགེ་སྦྱོང་དང་བྲམ་ཟེ་དག་རྣམས་ཀྱི་ཡང་འབྲས་བུ་དེ་ལྟ་བུར་འགྱུར་བ་ཡིན་ནོ། །ཡང་རིམ་པ་གཞན་གྱིས་དགེ་སྦྱོང་ངམ་བྲམ་ཟེ་རྣམས་ཀྱང་སེམས་ཅན་རྣམས་ཐམས་ཅད་ལ་མཉམ་པ་ཉིད་སྒོམ་པར་བྱེད་དོ། །གང་ཞེ་ན་འདི་ལྟ་སྟེ། སེམས་ཅན་རྣམས་ཐམས་ཅད་ལ་ཡང་སེམས་ཅན་རྣམས་ཐམས་ཅད་ནི་སྡུག་པ་དང་ཡིད་དུ་འོང་བ་རྣམས་དང་ཐ་དད་དུ་འབྲལ་བར་འགྱུར་རོ། །མེད་པར་འགྱུར་རོ། །རྣམ་པར་འཐོར་བར་འགྱུར་རོ། །རྣམ་པར་འབྲལ་བར་འགྱུར་རོ། །སོ་སོར་འབྱུང་བར་འགྱུར་རོ། །འཁོར་བར་གཏོགས་པའི་སེམས་ཅན་རྣམས་ཐམས་ཅད་ལ་ཡང་སྡུག་པ་ཡིད་དུ་འོང་བ་འདོད་པ་རྣམས་ཐམས་ཅད་དང་ཡང་ལྷན་ཅིག་ཏུ་བྲལ་བར་མ་གྱུར་ཅིང་འབྲལ་བར་མི་འགྱུར་བ་རྣམས་ནི་འདི་ན་འགའ་ཞིག་ཀྱང་ཡོད་པ་མ་ཡིན་ནོ། །སྡུག་པ་རྣམས་དང་རབ་ཏུ་རྣམ་པར་བྲལ་བ་ནི་ཤིན་ཏུ་ཡང་སྡུག་བསྔལ་བ་ཡིན་ནོ། །དེ་དེ་ལྟར་སྒོམ་པར་བྱེད་པས་སེམས་རབ་ཏུ་དང་བར་འགྱུར་ཞིང་སེམས་ཀུན་ནས་རབ་ཏུ་དང་བས་གདོང་གི་མདངས་གསལ་བར་འགྱུར་རོ། །དེའི་བཞིན་གྱི་མདངས་གསལ་བར་གྱུར་པས་ཀྱང་མངོན་པར་དགའ་བའི་གཟུགས་སུ་འགྱུར་རོ། །དེའི་གཟུགས་བཟང་བས་སྐྱེ་བོ་རྣམས་ཐམས་ཅད་རབ་ཏུ་དང་བར་འགྱུར་རོ། །འདོད་པ་དང་སྡུག་པ་དང་ཡིད་དུ་འོང་བར་ཡང་འགྱུར་རོ། །དེ་སེམས་ཅན་རྣམས་ཐམས་ཅད་ལ་མཉམ་པ་ཉིད་ཀྱི་མཐུ་སྟོབས་ཀྱི་མཐོང་བའི་ཆོས་ཀྱི་འབྲས་བུ་ནི་འདི་དག་ཡིན་ནོ། །ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་དུ་ལྷ་རྣམས་སུ་སྐྱེ་བར་འགྱུར་རོ། །ལས་ཀྱི་ལྷག་མ་རྣམས་ཀྱིས་ཀྱང་ཡོངས་སུ་མྱ་ངན་ལས་འདའ་བར་འགྱུར་རོ། །ཡང་རྣམ་གྲངས་གཞན་གྱིས་ཀྱང་དགེ་སྦྱོང་ངམ་བྲམ་ཟེ་རྣམས་ཀྱིས་སེམས་ཅན་ཐམས་ཅད་ལ་མཉམ་པ་ཉིད་ཀྱི་སེམས་བསྒོམ་པར་བྱ་བ་ཡིན་ནོ། །