འདི་ལྟ་སྟེ་གྲོགས་པོ་རྣམས་ཀྱི་ལ་སེམས་པར་བྱེད་ཅིང་དེ་ཁོ་ན་བཞིན་དུ་དགྲ་བོ་རྣམས་ཀྱི་ལ་ཡང་སྟེ། ཇི་ལྟར་སྲོག་ཆགས་འདི་དག་རྣམས་ཐམས་ཅད་ནི་འཆི་བའི་ཆོས་ཅན་འཆི་བའི་ཆོས་ཉིད་ལས་རྣམ་པར་མ་གྲོལ་བ་ཡིན་ནོ། །སྐྱེ་བ་དང་བཅས་པར་གྱུར་པ་འདི་དག་རྣམས་ཐམས་ཅད་ཀྱང་འཆི་བར་འགྱུར་བ་ཡིན་ནོ། །རང་རང་གི་ལས་རྣམས་ཀྱིས་སེམས་ཅན་འདི་དག་རྣམས་དམྱལ་བ་དང་ཡི་དགས་དང་དུད་འགྲོར་སྐྱེ་བས་སེམས་ཅན་འདི་དག་ནི། ཀྱེ་མ་རིང་བར་འགྱུར་རོ། །དེ་དེ་ལྟར་སྒོམ་པར་བྱེད་པ་དང་སེམས་ཅན་རྣམས་ཐམས་ཅད་ལ་ཡང་ཕན་པར་འདོད་པ་དེ་ནི་མཆོག་ཏུ་ཁྲག་རབ་ཏུ་དང་བར་འགྱུར་རོ། །ཁྲག་རབ་ཏུ་དང་བར་གྱུར་པས་བཞིན་གྱི་མདོག་དང་ངོ་། །དེའི་བཞིན་གྱི་མདོག་རབ་ཏུ་དང་བས་བལྟ་ན་མཛེས་པར་འགྱུར་རོ། །དེས་སེམས་ཅན་རྣམས་ཐམས་ཅད་དགའ་བར་འགྱུར་ཏེ་མཐོང་བའི་ཆོས་ལ་ཡིན་ནོ། །རྣམ་པར་སྨིན་པས་ནི་ལུས་ཞིག་པར་གྱུར་ནས་ཀྱང་མཐོ་རིས་བདེ་འགྲོའི་འཇིག་རྟེན་གྱི་ལྷ་རྣམས་སུ་སྐྱེ་བར་འགྱུར་རོ། །དེ་ལྟར་ཡང་དགེ་སློང་རྣམས་སེམས་ཅན་ཐམས་ཅད་ལ་མཉམ་པ་ཉིད་ཀྱི་དབང་དུ་བྱས་ནས་དགེ་བའི་ལས་ཆེན་པོ་རྣམས་བྱེད་པར་འགྱུར་རོ། །ཡང་རིམ་པ་གཞན་གྱིས་ཀྱང་དགེ་སྦྱོང་ངམ་བྲམ་ཟེའམ་གཞན་ཡང་དེའི་རིགས་ཅན་རྣམས་ཀྱིས་སེམས་ཅན་ཐམས་ཅད་ལ་མཉམ་པ་ཉིད་སྒོམ་པར་བྱེད་དེ། ཇི་ལྟར་སེམས་ཅན་འདི་དག་རྣམས་ཐམས་ཅད་ནི་ལས་ཀྱི་བགོ་སྐལ་ལ་སྤྱོད་པ། ལས་ཀྱི་སྐྱེ་གནས་པ་ལས་བདག་གིར་བྱེད་པར་གྱུར་པས་ཇི་ལྟར་ལས་བྱས་པར་གྱུར་པ་དགེ་བའམ་སྡིག་པ་ཅན་ཡང་རུང་སྟེ་ལས་དེ་དང་དེའི་སྐལ་བ་ཅན་དུ་འགྱུར་བ་ཡིན་ནོ། །ལེགས་པར་བྱས་པ་རྣམས་ཀྱིས་ནི་ལྷ་དང་མི་རྣམས་ཀྱི་ནང་དུའོ། །ཉེས་པར་བྱས་པ་རྣམས་ཀྱིས་ནི་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བར་འགྱུར་རོ། །དགེ་སྦྱོང་དང་བྲམ་ཟེའམ་གཞན་ཡང་དེའི་རིགས་ཅན་དེ་དག་རྣམས་ཀྱིས་དེ་ལྟར་སྒོམ་པར་བྱེད་པ་ན། དེའི་ཚེ་འདིའི་སེམས་ཅན་གྱི་དབང་དུ་བྱས་པའི་སེམས་རབ་ཏུ་དང་བར་གྱུར་པས་བཞིན་གྱི་ཁ་དོག་རབ་ཏུ་དང་བར་འགྱུར་རོ། །བཞིན་གྱི་མདོག་རབ་ཏུ་དང་བར་གྱུར་པས་ཀྱང་སེམས་ཅན་རྣམས་ཐམས་ཅད་ཀྱི་འདོད་པ་སྡུག་པ་ཡིད་དུ་འོང་བར་འགྱུར་རོ།