།དེ་ལྟར་རྨ་བྱའི་བདག་པོ་དེས་རྣམ་པ་དུ་མར་ཆོས་སྟོན་པར་བྱེད་པ་ནི་ལྷ་དེ་དག་རྣམས་ལ་བདེ་བའི་དོན་དུ་དང་ཕན་པར་བྱ་བའི་དོན་དུ་ཡིན་ནོ། །དེ་ནས་རྨ་བྱ་རྣམས་ཀྱི་མངའ་བདག་དེས་འཐབ་བྲལ་བ་དེ་དང་དགའ་ལྡན་པ་དེ་དག་རྣམས་ལ་སླར་ཡང་ཆོས་དེ་ཉིད་སྟོན་པར་བྱེད་དེ། མ་སྐྱེས་པ་ན་དགའ་བར་བྱེད་པ་དགེ་བ་དང་མྱ་ངན་ལས་འདས་པར་འགྲོ་བའོ། །ཡང་ཆོས་གཞན་ཡང་སྟོན་པར་བྱེད་དེ། ཀྱེ་ཧེ་ལྷ་དག་ཇི་ལྟར་ཆོས་གཞན་དག་ཉོན་དང་ཇི་ལྟར་དགེ་བའི་ཆོས་རྣམས་ཐམས་ཅད་ཀྱི་ཉིང་ཁུ་ནི་འདི་ཡིན་ཏེ། འདི་ལྟར་གཅིག་པུ་དགའ་བའོ། །དགེ་སློང་གཅིག་པུ་ལ་དགའ་བ་ཡང་ཤིན་ཏུ་ཀུན་ནས་བསྡམས་པར་རྒྱུ་བ་དང་། ཤིན་ཏུ་ཀུན་ནས་བསྡམས་པར་སྤྱོད་པ་དང་། ལེགས་པར་བསྡམས་པས་རྣམ་པར་གནས་པ་དང་མཆོག་ཏུ་ཞི་བ་དང་མཆོག་ཏུ་གཙང་བར་འགྱུར་རོ། །འདི་ལྟ་སྟེ། གཅིག་པུ་དགའ་བས་མངོན་པར་དགའ་བའི་དགེ་སློང་རྣམས་ནི། གཅིག་ཏུ་ཀུན་ནས་བསྡམས་པར་ལེགས་པར་སྤྱོད་པ་དང་། ཞི་བ་དུལ་བ་ཤིན་ཏུ་བརྟན་པས་གཅིག་པུ་དགའ་བས་དགའ་བ་རྣམས་ནི་ཐམས་ཅད་དུ་དགའ་བར་འགྱུར་ཏེ། ཞི་བའི་གནས་སུ་གྱུར་པའི་རི་ཁྲོད་དག་དང་རིའི་ཕུག་དང་དུར་ཁྲོད་དང་སོག་མའི་ཕུང་པོ་རྣམས་དང་ཐམས་ཅད་ལ་ཡང་མཚུངས་པར་བློ་ཀུན་ནས་བསྡམས་པར་འགྱུར་རོ། །གཅིག་པུ་རྣམ་པར་རྒྱུ་བ་གཅིག་པུ་དགའ་བའི་དགེ་སློང་ལ་ཡང་ཆོས་བདུན་གཅེས་པར་བྱེད་པར་འགྱུར་བ་ཡིན་ཏེ། གང་ཞེ་ན། འདི་ལྟ་སྟེ། རྟག་ཏུ་ཡིད་རབ་ཏུ་བདེ་བར་འགྱུར་རོ། །རྟག་ཏུ་ཡང་སེམས་རབ་ཏུ་དང་བར་འགྱུར་རོ། །འཇིག་རྟེན་པ་རྣམས་ཀྱིས་ཀྱང་འདི་མཉན་པར་བྱེད་ཅིང་། ལྷ་དག་གིས་ཀྱང་འདི་མངོན་པར་སྲུང་བར་བྱེད་དོ། །དྲི་མ་རྣམས་དང་ཡང་ཡོངས་སུ་བྲལ་བར་འགྱུར་རོ། །དགེ་བའི་ཆོས་རྣམས་ཀྱང་མངོན་པར་འཕེལ་ལོ། །དེའི་སེམས་ཤིན་ཏུ་མཉམ་པར་བཞག་པའི་མཆོག་ཏུ་འགྱུར་ཞིང་། རབ་ཏུ་དང་བའི་ལུས་དང་ངག་དང་ཡིད་ཀྱི་ལས་ཀྱི་མཐའ་རྣམས་ཀྱིས་ཐར་པའི་ལམ་མངོན་སུམ་དུ་བྱེད་པར་འགྱུར་རོ། །དྲི་མ་རྣམས་ཀྱང་འདིས་རིང་དུ་བྱེད་པར་འགྱུར་རོ། །ཐ་མར་ཡང་འདིའི་དཀར་པོའི་ཆོས་རྣམས་ཀྱི་ཐ་སྙད་ཀྱིས་འཇིག་རྟེན་པ་རྣམས་དང་ལྷན་ཅིག་ཏུ་མངོན་པར་དགའ་བར་འགྱུར་རོ།