།ཡིད་ནི་རྟག་ཏུ་རྣམ་པར་དག །རྩེ་གཅིག་ཡིད་ལ་མངོན་པར་དགའ། །སེམས་གང་ཤིན་ཏུ་རྩེ་གཅིག་པ། །དེ་ནི་སྐྱོན་གྱིས་འཆིང་བ་མེད། །སྐྱོན་བཅས་འཇིགས་ལས་ངེས་གྲོལ་བ། །འདི་ལ་རང་བཞིན་གནས་ཞེས་བརྗོད། །རྩེ་གཅིག་ལ་ནི་མངོན་དགའི་སེམས། །རྣམ་རྟོག་ཉིད་ཀྱིས་སྒྲུབ་པ་མིན། །རྣམ་པར་རྟོག་ལས་རྣམ་གྲོལ་དེ། །མཛེས་པར་རང་བཞིན་གནས་པར་འགྱུར། །གང་གི་སེམས་ནི་རྟག་ཏུ་ཞི། །རྒྱུན་དུ་མྱ་ངན་འདས་མངོན་དགའ། །དེ་ནི་མི་དགེའི་རྒྱུ་རྣམས་ཀྱི། །དབང་སྐྱེས་སྐྱོན་ནི་འགྱུར་མ་ཡིན། །གང་ཡང་བསམ་གཏན་གྱིས་བྱས་བདེ། །གང་ཡང་ཏིང་འཛིན་ལས་སྐྱེས་བདེ། །དེ་ཀུན་རྩེ་གཅིག་བློ་ཡི་ནི། །རྟག་ཏུ་ལུས་ཅན་རྣམས་ལ་འགྱུར། །རྩེ་གཅིག་དགའ་བའི་སྡོམ་བརྩོན་གྱི། །བདེ་གང་སྙིང་ལ་སྐྱེ་བ་ནི། །དེ་འདིར་བདེ་བར་རྣམ་ཤེས་ཀྱིས། །འཇིག་རྟེན་པ་ཡི་བདེན་མིན་འདོད། །རྩེ་གཅིག་སེམས་ལ་མངོན་པར་དགའ། །རྣམ་པར་དག་པ་བྱས་ཉིད་དེ། །སྐྱོན་དྲི་ལས་ནི་རྣམ་གྲོལ་བའི། །དེས་ནི་ཞི་བ་རྟོགས་པར་འགྱུར། །རྟག་ཏུ་ཡིད་ནི་གཅིག་ཏུ་ངེས། །དབང་པོ་ལྔ་རྣམས་ཀུན་ཏུ་བསྡུས། །སྲེད་པའི་མེས་སྲེག་མི་བཟད་པ། །བློ་ཡི་ཡེ་ཤེས་ཆུ་ཡིས་འཇོམས། །སྲེད་པ་དང་ནི་ལྡན་མིན་ཏེ། །རྣམ་པར་དག་པའི་བདེ་འདོད་པ། །ཟད་མེད་འགྲིབ་པ་མེད་ཉིད་ཀྱི། །གོ་འཕང་མདུན་ན་གནས་དང་འདྲ། །རྣམ་པར་རྟོག་པ་གྱ་གྱུའི་སེམས། །གང་དང་གང་ལ་སྐྱེ་འགྱུར་བ། །གཅིག་ལ་དམིགས་པ་དང་ལྡན་པའི། །ཏིང་འཛིན་དེ་ཡིས་འཛིན་པར་བྱེད། །དེ་ཕྱིར་ཆོས་དེ་དག་གི་མཆོག །མྱ་ངན་འདས་གྲོང་འགྲོ་བ་ཡི། །གང་ནི་རྩེ་གཅིག་ཡིད་བྱས་ལ། །བདུད་ཀྱི་སྒྲུབ་བྱེད་གཞོམ་པར་གྱིས། །རབ་བརྟན་ཡེ་ཤེས་འོད་ཟེར་གྱིས། །ཡིད་ཀྱི་རྟ་ནི་བཏུལ་བཟུང་ནས། །མྱ་ངན་ཉོན་མོངས་བཅོམ་པ་ཡི། །མཆོག་གི་གནས་སུ་འགྲོར་འགྱུར་ཏེ། །སྙིང་པོ་དེ་ནི་བརྟན་རྣམས་ཀྱིས། །རྣལ་འབྱོར་མཆོག་ཏུ་འགྲོ་རྣམས་ཀྱིས། །རྩེ་གཅིག་ཡིད་ནི་གང་བྱས་པས། །གོ་འཕང་འཕོ་བ་མེད་པར་འགྲོ། །དེ་ལྟར་རྨ་བྱའི་བདག་པོ་དེས་རྣམ་པ་དུ་མར་ཆོས་སྟོན་པར་བྱེད་པ་ནི་ལྷ་དེ་དག་རྣམས་ལ་བདེ་བའི་དོན་དུ་དང་ཕན་པར་བྱ་བའི་དོན་དུ་ཡིན་ནོ།