།གོ་འཕང་བླ་ན་མེད་པར་འགྲོ། །སྙིང་རྗེའི་བཞོན་མ་གང་ལ་ཡོད། །དེ་ནི་མཆོག་གི་འོ་མ་ལྡན། །ཁྲོ་བས་སྲེག་དང་མི་ལྡན་པར། །སྙིང་ལ་ལེགས་པར་རབ་ཏུ་འཇུག །ཐེག་ཆེན་རྐྱལ་པ་ལ་ཞོན་པའི། །བརྩེ་བའི་སྙིང་རྗེ་ལེགས་གནས་ནས། །སྐྱོན་གསུམ་རླབས་ནི་ཤུགས་པོ་ཆེའི། །སྲིད་པའི་རྒྱ་མཚོ་ལས་སྒྲོལ་བྱེད། །ཡོན་ཏན་རྒྱ་ཆེན་རྣམས་ཀྱི་གཙོ། །ནོར་ནི་མ་ཡིན་པ་ཡི་རྒྱན། །བཟང་པོ་རྣམས་ཀྱིས་རྟག་བརྩེ་བ། །འདིར་ནི་སྙིང་རྗེར་བརྗོད་པ་ཡིན། །དེ་ལྟར་དེས་ལྷ་དེ་དག་རྣམས་ལ་ཆོས་སྟོན་པར་བྱེད་དོ། །ཐོག་མ་དང་བར་དང་ཐ་མར་དགེ་བར་གྱུར་པ་དང་། ཐམས་ཅད་དུ་འགལ་བ་མེད་པ་དང་རབ་ཏུ་བསྔགས་པ་དང་ཤིས་པ་དང་ལྷ་རྣམས་ཐམས་ཅད་ཉེ་བར་འཕེལ་བར་བྱེད་པར་འགྱུར་རོ། །གཞན་ཡང་བཅོམ་ལྡན་འདས་དེས་བསྟན་པར་གྱུར་པའི་ཆོས་གཞན་གང་དག་ཡིན་ཞིང་། །ཐེག་པ་ཆེན་པོ་ལ་རབ་ཏུ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་གང་དང་ཡང་དག་པར་ལྡན་པས་སྐྱེས་བུ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་འགྱུར་བ་འདི་ཡང་གང་དག་ཞེ་ན། འདི་ལྟ་སྟེ་དུལ་བའོ། །དུལ་བའི་ཆོས་ཀྱང་གང་གི་ཕྱིར་ཡང་བར་གྱུར་པའི་སྐྱོན་རྣམས་ཡོངས་སུ་སྤངས་པ་དང་ཡོན་ཏན་རྣམས་འཛིན་པར་བྱེད་པ་ཡིན་ནོ། །བསམ་པ་འཇམ་པོ་དང་ལྡན་པའི་སྐྱེས་བུ་ལ་ཡང་དྲི་མ་རྣམས་ཐམས་ཅད་ཡོངས་སུ་སྤངས་པའི་མྱ་ངན་ལས་འདས་པ་ལག་ཏུ་འོང་བར་འགྱུར་རོ། །བསམ་པ་འཇམ་པོའི་སྐྱེས་བུ་ཡང་གཅིག་ཏུ་དགེ་བ་བྱེད་པར་གྱུར་པ་དང་། སྐྱེ་བོ་རྣམས་ཐམས་ཅད་ཡིད་ཆེས་པར་བྱེད་པར་འགྱུར་རོ། །སྙིང་རྩུབ་པར་གྱུར་པའི་སྐྱེས་བུ་ནི་རྡོ་རྗེ་དང་རྡོ་བ་དང་མཚུངས་པ་མཁྲེགས་པའི་འཁོན་དམ་པོ་རྣམས་བློ་ལ་བསྡམས་པ་དང་ཀུན་ནས་མ་བསྡམས་པར་རྒྱུ་བ་སྐྱེ་བོ་རྣམས་ཐམས་ཅད་དང་མི་འཐུན་པར་འགྱུར་རོ། །མི་སྡུག་པ་དང་ཡིད་དུ་མི་འོང་བར་འགྱུར་ཏེ། གང་དང་གང་དག་བཟུང་བར་གྱུར་པ་དེ། དེ་དག་འདིའི་སྙིང་ལས་ཡོངས་སུ་མི་འཕོའོ། །གཅིག་ཏུ་དགའ་བར་མི་འགྱུར་ཞིང་།