།དེའི་ཕྱིར་ཁྲོ་བ་འདི་དག་མེ་བཞིན་དུ་བརྟན་པ་དག་གིས་ཡོངས་སུ་སྤང་བར་གྱིས་ཤིག །ཕན་པ་བྱེད་པའི་སྐྱེས་བུ་དེ་དག་རྣམས་ཀྱིས་ནི་རྣམ་པ་དེ་ལྟར་སྐྱོན་གྱི་འབྲས་བུ་རྣམས་རྟོགས་ནས་རང་ལ་ཕན་པ་དང་གཞན་རྣམས་ལ་ཕན་པ་ལ་རབ་ཏུ་ཞུགས་པས་བཟོད་པ་བྱེད་ཅིང་འཇིལ་བར་བྱེད་དེ། ཇི་ལྟར་སྐྱེས་བུ་འགའ་ཞིག་གི་ཁྱིམ་ལ་མེ་ཤོར་བར་གྱུར་ན་མེ་ཞི་བར་བྱེད་པ་ལྟར། ཡེ་ཤེས་ཀྱི་ཆུ་དག་གིས་བློ་དང་ལྡན་པ་རྣམས་ཁྲོ་བ་ཀུན་ནས་ཞི་བར་བྱེད་པའི་བཟོད་པ་ཕུན་སུམ་ཚོགས་པ་མཆོག་ཏུ་དགེ་བའི་ཡིད་ཅན་དང་། བཟོད་པ་དང་ལྡན་པ་ཁྲོ་བ་རྣམ་པར་སྤངས་པའི་སྐྱེས་བུ་ལ་སྐྱེ་བོ་རྣམས་ཐམས་ཅད་དང་འཐུན་པར་འགྱུར་རོ། །ཡིད་དུ་འོང་བ་དང་མཐོང་ན་དགའ་བར་ཡང་འགྱུར་རོ། །མཆོག་ཏུ་ཡིད་ཆེས་པའི་ས་དང་བཞིན་གྱི་མདངས་རབ་ཏུ་དང་བ་དང་སེམས་རབ་ཏུ་དང་བར་ཡང་འགྱུར་རོ། །སེམས་ཤིན་ཏུ་ལེགས་པར་གནས་པ་དང་མཆོག་ཏུ་དགེ་བའི་བསམ་པ་དང་ལྡན་པར་འགྱུར་རོ། །ལུས་ཀྱི་ཉེས་པ་དང་བྲལ་བ་དང་། ངག་གི་སྐྱོན་དང་བྲལ་བ་དང་། ཡིད་ཀྱི་གདུང་བ་དང་བྲལ་བ་དང་། ངན་འགྲོའི་འཇིགས་པ་དང་བྲལ་བ་དང་། ཞེ་འགྲས་པའི་སྐྱེ་བོ་རྣམས་དང་བྲལ་བ་དང་། དགྲ་རྣམས་དང་བྲལ་བ་དང་། མི་སྙན་པའི་དྲི་མ་རྣམས་དང་བྲལ་བ་དང་། གནོད་སེམས་དང་བྲལ་བ་དང་། སྙིང་ལ་ཀུན་ཏུ་གཅགས་པ་དང་བྲལ་བ་དང་། རྒྱལ་པོའི་ཆད་པའི་འཇིགས་པ་རྣམས་དང་བྲལ་བ་དང་། མ་བསྒྲུངས་པའི་ཚིག་ངན་པ་རྣམས་བརྗོད་པའི་འཇིགས་པ་དང་བྲལ་བ་དང་། ཀུན་ནས་འགྱོད་པའི་འཇིགས་པ་དང་བྲལ་བ་དང་། ཀུན་ནས་བརྗོད་པའི་འཇིགས་པ་དང་བྲལ་བ་དང་། རྙེད་པའི་འཇིགས་པ་དང་བྲལ་བ་དང་། སྡུག་བསྔལ་གྱི་འཇིགས་པ་དང་བྲལ་བ་དང་། རྒྱགས་པའི་འཇིགས་པ་རྣམས་དང་བྲལ་བའི་སྐྱེས་བུ་ཡོན་ཏན་ཐམས་ཅད་དང་ལྡན་པར་འགྱུར་རོ། །འགྲོ་བ་ཐམས་ཅད་དུ་འདི་སྙན་པར་གྲགས་པ་དང་ཡང་མི་འབྲལ་བར་འགྱུར་རོ། །འཇིག་རྟེན་འདི་དང་ཕ་རོལ་གཉིས་ཀར་སོང་བ་ན་ཡང་སྐྱིད་པར་ཡང་འགྱུར་རོ། །