།བཟོད་པ་དེ་ཡང་རྣམ་པ་གཉིས་ཡིན་ཏེ། གང་ཡང་ཆོས་མཉམ་པ་ཉིད་ཀྱི་ལམ་དུ་འགྲོ་བའི་བསམ་གཏན་པ་རྣམས་ཀྱི་དཀར་པོའི་ཆོས་རྣམས་ལ་ངེས་པར་བསྟེན་པའི་ཕྱིར་ཆོས་ཉིད་ལ་བརྟན་པར་གྱུར་པ་རྣམས་བསམ་གཏན་གྱི་ལམ་གྱི་དགེ་བའི་ཁྱད་པར་གྱིས་ཀྱང་བཟོད་པ་བྱེད་པའི་བཟོད་པ་ནི། དེ་ལྟར་འདིར་ཡང་བྲག་དང་ནགས་དང་ནགས་ཚང་ཚིང་དུ་མ་དང་བཅས་པའི་འཇིག་རྟེན་མ་ལུས་པ་འདི་དག་རྣམས་ས་གཞིའི་སྟེང་ན་གནས་པར་གྱུར་པ་ཡང་བཟོད་པར་བྱེད་དོ། །འབྱིང་བར་ཡང་མི་འགྱུར་རོ། །དེ་བཞིན་དུ་བཟོད་པས་ཀྱང་མྱ་ངན་ལས་འདས་པའི་ཆོས་རྣམས་ཐོབ་པར་བྱེད་པའི་ཆོས་རྣམས་ཐམས་ཅད་ལ་བརྟན་པ་དང་སྙིང་པོ་དང་ཆོས་ཉིད་དང་ཁྱད་པར་དུ་དང་། གཙོ་བོ་དང་དཀར་པོའི་ཆོས་རྣམས་དང་མྱ་ངན་ལས་འདས་པའི་ལམ་ཐོབ་པར་འགྱུར་བ་རྣམས་ཀྱིས་ཀྱང་བཟོད་པར་བྱེད་དོ། །བཟོད་པ་འདི་དག་ཉིད་བརྟན་པ་དང་ལྡན་པའི་ལམ་མདུན་དུ་བསར་བའི་འཇིག་རྟེན་ལས་འདས་པ་ཡིན་པ་གང་གི་ཕྱིར་མྱ་ངན་ལས་འདས་པ་ཐོབ་པར་བྱེད་པ་ཡིན་ནོ། །གཞན་ཡང་བཟོད་པ་གཉིས་པ་ཡོད་དོ། །འདི་ལྟ་སྟེ་གང་འགའ་ཞིག་དགེ་སྦྱོང་ངམ་བྲམ་ཟེའམ་རྣམ་པ་དེ་ལྟ་བུ་གཞན་དག་རྣམས་ཀྱང་ཁྲོ་བ་སྐྱེས་པར་གྱུར་པའི་དུག་འཇོམས་པར་བྱེད་དོ། །ཁྲོ་བའི་འབྲས་བུ་རིག་པར་གྱུར་ནས་ཁྲོ་བ་དེའི་གོ་སྐབས་འབྱེད་པར་མི་བྱེད་དོ། །དེ་ལ་ཁྲོ་བ་ཉིད་སྐྱེས་པར་གྱུར་ན་དེ་སྲིད་དུ་སྐྱེས་བུ་རང་ཉིད་ཀྱི་རྟེན་སྲེག་པར་བྱེད་དོ། །བཞིན་འགྱུར་བར་བྱེད་དོ། །ཁྲག་རྣམས་ངོར་ལྡོག་པར་བྱེད་དོ། །གཞན་ལ་བག་མེད་པ་གོ་བར་བྱེད་དོ། །འཇིག་རྟེན་པ་འཇིགས་པ་སྐྱེད་པར་བྱེད་དོ། །ཡུལ་ལྗོངས་པ་རྣམས་ཐམས་ཅད་དང་ཡང་མི་འཐུན་པ་དང་ཡིད་དུ་མི་འོང་བ་དང་སྨེ་བར་ཡང་བྱེད་པར་འགྱུར་རོ། །ཕྱི་ནས་ལུས་ཞིག་པར་གྱུར་ནས་ཀྱང་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བའོ། །གང་དག་ཁྲོ་བས་ཟིལ་གྱིས་མནན་པའི་སྐྱེས་བུ་རྣམས་ཀུན་ཏུ་སྤྱོད་པར་བྱེད་པ་ལས་བྱ་བ་མ་ཡིན་པ་གཞན་དེ་ནི་ཡོད་པ་མ་ཡིན་ཞིང་བྱེད་པ་ཡང་མ་ཡིན་ནོ། །དེའི་ཕྱིར་ཁྲོ་བ་འདི་དག་མེ་བཞིན་དུ་བརྟན་པ་དག་གིས་ཡོངས་སུ་སྤང་བར་གྱིས་ཤིག