དེ་ལྟར་དགའ་ལྡན་གྱི་ལྷ་དེ་དག་རྣམས་འཐབ་བྲལ་བ་དེ་དག་གི་དྲུང་ན་ཡང་བླ་ལྷག་པ་ཡིན་ནོ། །ཁ་ཅིག་ནི་མ་མཐོང་བའི་ཕྱིར་དང་ངོ་མཚར་བར་གྱུར་པའི་ཕྱིར་ཡང་དགའ་ལྡན་གྱི་ལྷ་དེ་དག་རྣམས་ཉིད་ལ་ཀུན་ནས་མངོན་པར་ལྟ་ཞིང་གནས་པར་གྱུར་ཏོ། །ཁ་ཅིག་ནི་སླར་ཉིད་ཀྱང་རིའི་རྩེ་མོ་དེ་དག་ཉིད་ལ་རྩེ་བའི་དོན་དུ་མངོན་པར་འཁོད་པར་བྱེད་དོ། །དེ་ནས་དགའ་ལྡན་པ་དེ་དག་དང་འཐབ་བྲལ་བ་དེ་དག་རྣམས་ཀྱིས་རྨ་བྱའི་རྒྱལ་པོ་དེ་ལ་ཡོངས་སུ་བསྐོར་ནས་དེ་ན་གནས་སོ། །དེ་ནས་བྱང་ཆུབ་སེམས་དཔའ་དེས་དེ་དག་ལ་འདི་སྐད་ཅེས་སྨྲས་སོ། །ལྷ་དག་ཇི་ལྟར་ཆོས་ལ་གུས་པ་ལ་གོམས་པའི་དབང་གིས་ལྷ་དང་མི་རྣམས་ལ་ཕན་པའི་དོན་གང་ཡིན་པ་དང་མཆོག་ཏུ་བདེ་བ་དང་སེམས་ཅན་རྣམས་ཐམས་ཅད་ལ་ཕན་པ་དང་སེམས་ཅན་ཐམས་ཅད་ལྷ་དང་མི་རྣམས་ལ་ཡང་དག་པར་འགོད་པ་ནི་འདི་ལྟ་སྟེ། ཆོས་ཉི་ཤུ་རྩ་གཉིས་པོ་འདི་དག་རྣམས་ཀྱིས་ནི་ལྷ་དང་མི་རྣམས་འཇིག་རྟེན་འདི་དང་ཕ་རོལ་ཏུ་ཡང་ཕན་པ་དང་བདེ་བ་དང་སྡུག་པ་དང་ཡིད་དུ་འོང་བ་གང་ཡིན་པར་འགྱུར་རོ། །ཆོས་ཉི་ཤུ་རྩ་གཉིས་པོ་གང་གིས་བག་མེད་པ་རྣམས་ཀུན་ནས་འདོར་བ་དང་། ཆུད་གསོན་པར་བྱེད་པ་དང་མེད་པར་བྱེད་པ་དང་དེ་དང་བྲལ་བས་ཀྱང་བདེ་བ་མཐའ་ཡས་པར་གྱུར་པ་ལྷ་དང་མི་རྣམས་མྱ་ངན་ལས་འདས་པའི་མཐར་ཐུག་པར་བྱེད་པ་དང་། ཇི་ལྟར་མས་མ་ཡིན་ཞིང་ཕས་ཀྱང་མ་ཡིན་པ་རྣམས་ཆོས་ཀྱིས་དེ་བཞིན་དུ་ཕན་པར་འགྱུར་བ་དེ་དག་གང་ཞེ་ན་འདི་ལྟ་སྟེ། འགྱོད་པ་དང་ངན་སོང་གི་འཇིགས་པ་དང་བཟོད་པ་དང་བརྩོན་འགྲུས་དང་། ཆོས་སྟོན་པ་དང་སྙིང་རྗེ་དང་སེམས་རབ་ཏུ་འདུལ་བ་དང་རབ་ཏུ་རྟེན་པ་དང་ལས་ལ་དད་པ་དང་ལྡན་པ་དང་། གྲགས་པ་མ་ཡིན་པས་འཇིགས་པ་དང་མངོན་པར་ཞེན་པ་མེད་པ་དང་གཅིག་པུར་དགའ་བ་དང་སེམས་རྣམ་པར་མ་གཡེངས་པ་དང་འཆི་བ་རྗེས་སུ་དྲན་པ་དང་གཟུགས་དང་དབང་ཕྱུག་དང་རིགས་དང་ནད་མེད་པའི་རྒྱགས་པ་དང་བྲལ་བ་དང་མི་གནས་པས་ཉེ་བར་བཅོམ་པ་དང་བརྟན་པ་དང་ངག་འཇམ་པོ་དང་། སེམས་ཅན་ཐམས་ཅད་ལ་མཉམ་པ་ཉིད་དང་ཆོག་ཤེས་པ་དང་ཡུལ་རྣམས་ལ་འཇིགས་པར་ལྟ་བ་དང་སེམས་ལ་ཡིད་ཆེས་པར་མི་བྱེད་དོ།