།ཤིས་པ་ཐབས་སུ་གྱུར་པ་མྱ་ངན་ལས་འདས་པའི་གྲོང་ཁྱེར་ལེགས་པར་འཐོབ་པར་བྱེད་པ་ཐམས་ཅད་ཀྱིས་སྔར་མ་མཐོང་བ་གང་བདག་སྐྱེ་བ་གཞན་ཞིག་ཏུ་མིར་གྱུར་པ་ན། བཅོམ་ལྡན་འདས་འཁོར་བ་འཇིག་གི་སྤྱན་སྔ་ནས་ཐོས་པ་དེ་སྐྱེ་བ་གཞན་རྗེས་སུ་དྲན་པ་དང་སྨོན་ལམ་གྱི་དབང་གིས་ངས་ད་རུང་དྲན་ཞིང་། གཞན་དག་རྣམས་ལ་ཡང་ཉེ་བར་སྟོན་པར་བྱེད་དོ། །དེ་ནས་དགའ་ལྡན་གྱི་ལྷ་དེ་དག་རྣམས་ཀྱིས་རྨ་བྱའི་རྒྱལ་པོ་དེའི་དྲུང་ནས་ཚིག་དག་ཉེ་བར་ཐོས་ནས་ནམ་མཁའི་དཀྱིལ་ནས་བབས་ཏེ། དམ་པའི་ཆོས་ལ་གུས་པས་ཚིམ་པར་གྱུར་པའི་ཡིད་ཀྱིས་ཐམས་ཅད་ཉིད་ཀྱང་རི་དེའི་རྩེ་མོ་འབབ་ཆུ་དང་རྫིང་བུ་ཕལ་ཆེ་བ་དང་ནགས་དང་ཉེ་བའི་ནགས་རྣམས་ཕུན་སུམ་ཚོགས་པ་དང་པད་མའི་རྫིང་བུ་དང་རིན་པོ་ཆེའི་ཁམས་རྣམས་དང་ཡང་དག་པར་ལྡན་པ་དང་བྱ་བརྒྱ་སྟོང་དུ་མས་རྣམ་པར་རྗོད་པར་བྱེད་པས་མངོན་པར་དགའ་བ་དང་། རིན་པོ་ཆེའི་ཁམས་ཀྱི་འབྱུང་ཁུང་རྣམས་དང་ལྡན་པའི་ནོར་བུའི་ཆ་ཤས་ཀྱིས་རྣམ་པར་བཀྲ་བའི་རིའི་རྩེ་མོ་དེ་ལ་ལྷ་དེ་དག་གིས་རྨ་བྱའི་རྒྱལ་པོ་དེ་ཡོངས་སུ་བསྐོར་ནས་ཀུན་ཏུ་གནས་སོ། །གཟུགས་དང་བརྟན་པ་དང་རྒྱ་ཆེན་པོར་གྱུར་པ་ཕུན་སུམ་ཚོགས་པའི་ངོ་བོ་རྣམས་ཐམས་ཅད་ལས་འདི་ལྷག་པར་གྱུར་པས་འཐབ་བྲལ་གྱི་ལྷ་དེ་དག་གི་དྲུང་ན་ཆེས་ལྷག་པར་གྱུར་པ་ནི། ཇི་ལྟར་འཛམ་བུའི་གླིང་གི་མི་རྣམས་ཀྱི་ཁྱད་པར་གྱིས་འཐབ་བྲལ་བ་རྣམས་ཐབས་ཐམས་ཅད་ཀྱིས་བླ་ལྷག་པ་ཡིན་ནོ། །དེ་བཞིན་དུ་དགའ་ལྡན་གྱི་ལྷ་དེ་དག་རྣམས་འཐབ་བྲལ་བའི་དྲུང་ན་བླ་ལྷག་པར་གྱུར་པ་ཡིན་ནོ། །དེ་ནས་འཐབ་བྲལ་བ་དེ་དག་གིས་དགའ་ལྡན་པ་དེ་དག་རྣམས་མངོན་པར་མཐོང་ནས་གཟུགས་ཀྱི་རྒྱགས་པ་དང་དབང་ཕྱུག་དང་རྒྱ་ཆེན་པོ་ཉེ་བར་བཅོམ་པར་གྱུར་པས། གང་ན་རྨ་བྱའི་མངའ་བདག་ཡོད་པར་གྱུར་པ་དེར་ཉེ་བར་འགྲོའོ། །འགའ་ཞིག་དང་འགའ་ཞིག་ནི་རྩེ་བ་ལ་དགའ་བར་གྱུར་པས་ནགས་དང་ཉེ་བའི་ནགས་དག་ཏུ་ཞུགས་སོ། །ཇི་ལྟར་འཛམ་བུའི་གླིང་གི་མི་རྣམས་ཀྱི་ཁྱད་པར་གྱིས་འཐབ་བྲལ་བ་རྣམས་ཚུལ་ཐམས་ཅད་ཀྱིས་ཁྱད་པར་དུ་འཕགས་པ་ཡིན་ལ། དེ་ལྟར་དགའ་ལྡན་གྱི་ལྷ་དེ་དག་རྣམས་འཐབ་བྲལ་བ་དེ་དག་གི་དྲུང་ན་ཡང་བླ་ལྷག་པ་ཡིན་ནོ།