Degé Kangyur volume 68, F.166.a

།དེ་ལ་ལྕགས་ཀྱི་ཤིང་ལྗོན་པ་དང་། ལྕགས་ཀྱི་ཁྭ་རབ་ཏུ་འབར་བ་དག་གིས་གང་སྟེ། རི་དེ་ཐམས་ཅད་ཀྱང་རབ་ཏུ་འབར་བ་མེ་ལྕེ་གཅིག་ཏུ་གྱུར་ཅིང་། ཀུན་ནས་དེའི་ལས་ཀྱིས་བྱས་པའི་མེས་རྒྱུན་མི་འཆད་པར་རབ་ཏུ་འབར་བ་ན། ཉེས་པར་བྱས་པའི་ལས་ཀྱིས་རི་དེ་པད་མའི་ཚལ་གྱིས་ཁེབས་པར་མཐོང་ཞིང་། པད་མའི་འདབ་མ་དེ་དག་འོད་འཕྲོ་བར་མཐོང་ནས། དེ་དག་གཅིག་ལ་གཅིག་བོས་ཏེ། གྲོགས་པོ་དག་ཚུར་ཤོག །​ཚུར་ཤོག །​རི་ཚལ་གྲིབ་མ་བསིལ་བ་ཅན་དུ་འདོང་། ཚལ་སྡུག་པ་དག་ཉེ་བར་བསྟེན་པར་བྱའོ་ཞེས་སྨྲའོ། །​དེ་ནས་སེམས་ཅན་དམྱལ་བ་པ་དེ་དག་ལ་གཤིན་རྗེའི་མི་རྣམས་ཀྱིས་རྡོའི་ཆར་དག་གིས་རྡེག་པ་ན། སྐྱོབ་པ་འདོད་པ། སྐྱབས་འདོད་པ། མགོན་འདོད་པ་དག་རི་ག་ལ་བ་དེར་དེ་དག་རྒྱུག་གོ། །​ཇི་ལྟར་རི་དེ་ལ་དེ་ལྟར་འཛེགས་པ་དང་། རི་དེ་ཡང་འབར་བའི་ཕྲེང་བས་འཁྲུགས་ཤིང་ཀུན་ནས་རབ་ཏུ་འབར་ལ། ཁྭ་རབ་ཏུ་འབར་བ་མཆུ་ཤིན་ཏུ་རྣོ་བ་རྣམས་ཀྱིས་སེམས་ཅན་དམྱལ་བ་ཤིན་ཏུ་གང་བ་དེ་དག་མཐོང་ནས་རྒྱུག་ཅིང་། སེམས་ཅན་དམྱལ་བ་དེ་དག་ལ་ཟ་བར་བྱེད་དེ། ཁ་ཅིག་ནི་གླད་པ་དང་གླད་རྒྱས་ལ་འཐོག །​ཁ་ཅིག་ནི་མིག་ལ། ཁ་ཅིག་ནི་སྣ་ལ། ཁ་ཅིག་ནི་འགྲམ་པའི་པགས་པ་ལ། ཁ་ཅིག་ནི་རྐེད་པའི་ངོས་ལ། ཁ་ཅིག་ནི་ལྕེ་ལ། ཁ་ཅིག་ནི་མགྲིན་པ་ལ། ཁ་ཅིག་ནི་མགྲིན་པའི་པགས་པ་ལ། ཁ་ཅིག་ནི་མིད་པ་ལ། ཁ་ཅིག་ནི་སྙིང་ལ། ཁ་ཅིག་ནི་གློ་བ་ལ། ཁ་ཅིག་ནི་མཚེར་པ་ལ། ཁ་ཅིག་ནི་རྒྱུ་མ་ལ། ཁ་ཅིག་ནི་གཉེ་མ་སྦོམ་པོ་ལ། ཁ་ཅིག་ནི་ལྟོ་བའི་པགས་པ་ལ། ཁ་ཅིག་ནི་རྣ་བའི་རུས་པ་ལ། ཁ་ཅིག་ནི་བརླ་ལ། ཁ་ཅིག་ནི་བརླའི་སྦུབས་ལ། ཁ་ཅིག་ནི་རྐང་པའི་རྟིང་པ་ལ། ཁ་ཅིག་ནི་རྟིང་པའི་པགས་པ་ལ། ཁ་ཅིག་ནི་རྐང་མཐིལ་ལ། ཁ་ཅིག་ནི་གཞང་ལ། ཁ་ཅིག་ནི་རྐང་པའི་སོར་མོ་ལ་འཐོག་གོ།