།དེ་ནས་གང་དག་གིས་དེ་དག་གི་ལུས་རྣམས་འཛིན་པར་བྱེད་པའི་སྤྲུལ་པའི་བྱ་རྣམས་ཀྱང་ཀུན་དུ་འོངས་པར་གྱུར་ནས་ཁ་ཅིག་གིས་ནི་ཟ་བར་བྱེད་དོ། །ཁ་ཅིག་གིས་ནི་བཟུང་བར་གྱུར་པ་མཐོང་ནས་འབྲོས་པར་བྱེད་དེ། དེ་དག་རྣམས་ཀྱང་མཆོག་ཏུ་སྐྱོ་བ་སྐྱེ་བར་འགྱུར་བའི་གནས་སུ་ལེགས་པར་མཐོང་བས་ལྷ་རང་བཞིན་པ་དེ་དག་རྣམས་ཤིན་ཏུ་ལེགས་པར་མཉམ་པར་བཞག་པའི་ཡིད་དུ་འགྱུར་རོ། །གཞན་ཡང་ལྷ་དེ་དག་རྣམས་ཉིད་ལ་ཕན་པར་བྱ་བའི་དོན་དུ་འཐབ་བྲལ་གྱི་བདག་པོ་བརྟན་པས་མགོ་དྲངས་པའི་ལྷ་མ་ཡིན་གྱི་རྒྱལ་པོ་གང་ཡིན་པ་དེ་དག་རྣམས་སྒྲ་གཅན་འཛིན་གྱི་མཐར་ཐུག་པར་གྱུར་པའི་ས་འོག་ན་གནས་པ་དེ་དག་རྣམས་གང་གི་ཚེ་མུ་སུ་ལུན་དྷ་ལས་མི་རིང་བ་ན་ཀུན་ནས་གནས་པར་གྱུར་ལ། དེའི་ཚེ་རྣམ་པར་ཁྲོས་པར་གྱུར་པས་ཀྱང་ཐམས་ཅད་ཀྱི་སྐད་ཆེན་པོ་ཀུན་དུ་བཏོན་ཞིང་ཕན་ཚུན་དུ་ཡང་བོས་པར་གྱུར་ནས་ས་གཞི་ལ་ཀུན་ནས་འགྱེལ་བ་ནི་སྟ་རེས་ཤིང་ཀར་ཎི་ཀཱ་ར་སྟ་རེས་རྩ་བ་ནས་བཅད་པ་བཞིན་དུ་ས་གཞི་ལ་འགྱེལ་བར་གྱུར་ཏོ། །འགྱེལ་ནས་ཀྱང་ཤི་བར་གྱུར་པས་ཐམས་ཅད་ཤིང་དང་རྡོ་བ་རྣམས་བཞིན་དུ་རྣམ་པར་འགྱུར་བ་དང་བྲལ་བར་འགྱུར་རོ། །དེ་དག་རྣམས་མངོན་པར་མཐོང་ནས་ལྷ་མ་ཡིན་གྱི་བུ་མོ་དེ་དག་རྣམས་ཤིན་ཏུ་སྡུག་བསྔལ་གྱིས་གཟིར་ནས་ཀྱང་རྣམ་པར་ཁྲོ་བར་བྱེད་པ་དང་ངུ་བར་ཡང་བྱེད་དོ། །ཡོངས་སུ་བསྐོར་བར་གྱུར་ནས་དེ་དག་རྣམས་ཐམས་ཅད་ཀྱང་དེ་ལྟར་ངུ་བར་བྱེད་པ་རྣམས་ལ་བྱ་དག་ཀུན་དུ་འོང་བར་གྱུར་ནས་དེ་དག་གིས་དེ་དག་རྣམས་ཀྱི་ལུས་ཤིང་སྐམ་དང་རྡོ་བ་དང་ཤིང་བུ་དང་མཚུངས་པར་བྱེད་པ་མེད་པ་རྣམས་ཀུན་ནས་འདྲེན་པར་བྱེད་དོ། །སྙིང་རྗེ་རྣམ་པར་འཁྲུགས་པར་གྱུར་པའི་ལྷ་མ་ཡིན་གྱི་བུ་མོ་དེ་དག་རྣམས་དེ་ནས་དེ་ལྟར་རྣམ་པར་འཁྲུགས་པའི་རྟིང་ཐོགས་ཉིད་ལ་དེ་དག་རྣམས་ཐམས་ཅད་ཀྱང་ཤི་བར་གྱུར་ཏོ། །དེ་དག་རྣམས་ཀྱི་རོ་དེ་དག་རྣམས་ཀྱང་བྱ་རྣམས་ཉིད་ཀྱིས་འཛིན་པར་བྱེད་དོ། །བཟུང་བར་གྱུར་ནས་ཀྱང་ཁྭ་ཏ་དང་འུག་པ་དང་བྱ་རྒོད་རྣམས་ནམ་མཁའ་ལ་འཕུར་བར་འགྱུར་ཏེ། མཐོང་བའི་ཡུལ་ལས་འདས་ནས་འགྲོ་བར་བྱེད་དོ།