།དེ་དག་ཐམས་ཅད་ཀྱང་རྣམ་པ་དེ་སྲིད་ཀྱི་གཟུགས་དང་ཕུན་སུམ་ཚོགས་པ་རྣམས་ཀྱིས་ཀྱང་ཕུན་སུམ་ཚོགས་པར་གྱུར་ནས་ཕྱི་ནས་ཡང་རྒྱལ་པོ་རྣམས་ལུས་གོག་པོར་སོང་བ། མགོ་བོ་ཀུན་སྐྲ་དཀར་རྣམས་ཀྱིས་གཡོགས་པར་གྱུར་པ། ལུས་པོ་རྣམས་ཀུན་ནས་འཁུམས་པ། ལུས་ལ་གཉེར་མ་དང་སྐྲ་དཀར་རྣམས་ཀྱིས་ཀུན་དུ་གང་བ་ལུས་དབྱུག་པ་ལ་ཀུན་ནས་རྟེན་པ་མཆོག་ཏུ་རྗུད་པར་གྱུར་པའི་ལུས་པོ་ཅན་རྣམས་ལས་རྣམ་པ་ཐམས་ཅད་ལ་ནུས་པ་མེད་པར་གྱུར་པ། གཞན་ལ་ཀུན་ནས་རྟེན་ནས་འགྲོ་བར་བྱེད་པ། སྐྱེ་བོ་རྣམས་ཐམས་ཅད་བཞད་གད་དུ་གྱུར་པ་སྒྲ་ངར་ངར་པོར་གྱུར་པའི་དབུགས་ཕྱིར་འབྱུང་བ་ལུས་ཀུན་ལ་བསྙེ་བས་ཉམས་པར་བྱས་པ། དབང་པོ་རྣམས་ཤིན་ཏུ་རྙིངས་པར་གྱུར་པ་ཐམས་ཅད་ལ་ཡང་སྤྲོ་བ་མེད་པ། སྐྱེ་བོ་རྣམས་ཐམས་ཅད་སྐྱུག་ཟློག་པར་བྱེད་པ། འཁྱོར་ཞིང་འགྲོ་བར་གྱུར་པ་དུས་ཤིན་ཏུ་ཉེ་བར་གྱུར་པ་དེ་དག་རྣམས་མཚོ་འདི་ཉིད་ན་རྒྱུ་བར་བྱེད་དེ། སྟོབས་ཤིན་ཏུ་ཡང་ཆུང་བར་གྱུར་པ་གཞན་དག་གི་ལག་པ་ལ་འཕྱངས་ནས་གོམ་པ་རྣམས་འབོར་བར་བྱེད་པ་ཤིན་ཏུ་ཡང་འཇིགས་སུ་རུང་བའི་གཟུགས་དང་ལྡན་པ་རྣམས་ཡིན་ནོ། །དེ་དང་དེ་ལྟར་རྒྱུ་བར་བྱེད་པ་རྣམས་ཀྱི་ལུས་རྣམས་ལ་དུས་གཞན་འགའ་ཞིག་གི་ཚེ་ན། གཟུགས་མང་པོ་རྣམ་པ་སྣ་ཚོགས་པའི་ནད་རྣམས་ཀུན་དུ་སྐྱེ་བ་ནི། རིམས་ཚ་བ་དང་། ཧ་ཅང་ཐལ་ཆེས་པར་འཁྲུ་བ་དང་། གློ་ལུ་བ་དང་། དབུགས་མི་བདེ་བ་དང་། སྐྱིགས་བུ་དང་། སྐྲང་གློ་དང་། མཛེ་སྔོན་དུ་འགྲོ་བར་གྱུར་པ་རྣམས་ཀྱིས་ཤིན་ཏུ་མི་བཟད་པར་གྱུར་པ། ཉེ་བར་འཚེ་བ་རྣམས་དང་བཅས་པ། འཆི་བའི་མཐར་ཐུག་པར་བྱེད་པ། ཤིན་ཏུ་སྐྱུག་བྲོ་བར་གྱུར་པའི་ནད་ཁྱད་པར་དུ་དྲག་པོ་དེ་དག་རྣམས་ཀུན་དུ་འབྱུང་བར་གྱུར་པའི་སྟོབས་ཀྱིས། གསོ་དཔྱད་མེད་པ་དང་མི་འདོད་པ་རྣམས་མཐར་ཐུག་པར་བྱས་པས་རྒྱལ་པོ་དེ་དག་རྣམས་ཐམས་ཅད་ཉིད་ཁྲིད་པར་གྱུར་ནས་ཤིན་ཏུ་སྡུག་བསྔལ་བ་ཁོ་ནར་འཆི་བར་བྱེད་དོ། །ཤི་བ་དེ་དག་རྣམས་ཀྱི་ལུས་དེ་དག་རྣམས་ཟགས་ཤིང་དྲི་མི་ཞིམ་པར་གྱུར་པ་ལ་སྲིན་བུ་བརྒྱ་སྟོང་གིས་ཁྱབ་པར་གྱུར་པས་ཟ་བར་བྱེད་བཞིན་པའི་ལུས་དེ་དག་རྣམས་རང་བཞིན་པའི་ལྷ་དེ་དག་རྣམས་ཀྱིས་མཐོང་བར་གྱུར་ཏོ། །དེ་ནས་གང་དག་གིས་དེ་དག་གི་ལུས་རྣམས་འཛིན་པར་བྱེད་པའི་སྤྲུལ་པའི་བྱ་རྣམས་ཀྱང་ཀུན་དུ་འོངས་པར་གྱུར་ནས་ཁ་ཅིག་གིས་ནི་ཟ་བར་བྱེད་དོ།