འཐབ་བྲལ་གྱི་མངའ་བདག་དེའི་བ་སྤུའི་ཁུང་བུ་རྣམས་ཐམས་ཅད་ལས་དང་། ལུས་ཀྱི་མཐའ་རྣམས་མ་ལུས་པ་ནས་འབྱུང་བ་ནི་ཇི་ལྟར་རྗེས་སུ་འཐུན་པ་དང་གནས་སྐབས་ཇི་ལྟ་བ་དང་། དེ་དག་གི་རིགས་རྣམས་དང་རྗེས་སུ་སྤྱོད་པ་རྣམས་ཇི་ལྟ་བའི་འཁོར་གྱིས་གླུ་ལེན་པར་བྱེད་པ་དང་གར་བྱེད་པ་དང་དགོད་པར་བྱེད་པ་ཡིན་ནོ། །མི་རྣམས་ནི་མི་རྣམས་དང་རྗེས་སུ་འཚམ་པར་གྱུར་པའི་ལོངས་སྤྱོད་མཆོག་ཏུ་ཡིད་འཕྲོག་པར་བྱེད་པ་རྣམས་དང་། ཡང་དག་པར་ལྡན་པས་གར་བྱེད་པ་དང་དགོད་པར་བྱེད་པས་ཀྱང་མི་རྣམས་ཀྱི་རྒྱལ་པོ་བདེ་བ་རྣམས་ལ་ཉེ་བར་ལོངས་སྤྱོད་པར་བྱེད་པ་ཡིན་ནོ། །དེ་བཞིན་དུ་རྣམ་པ་སྣ་ཚོགས་པའི་རྒྱན་དང་ཆ་བྱད་ཅན་གྱི་ཀླུ་རྣམས་ཀྱང་ཁ་ཅིག་ནི་མགོ་གཅིག་པ། ཁ་ཅིག་ནི་མགོ་གཉིས་པ། ཁ་ཅིག་ནི་མགོ་གསུམ་པ། ཁ་ཅིག་ནི་མགོ་བཞི་པ། ཁ་ཅིག་ནི་མགོ་ལྔ་པ། ཁ་ཅིག་ནི་མགོ་དྲུག་པ། ཁ་ཅིག་ནི་མགོ་བདུན་པ་རྣམས་ཡིན་ཏེ། མདོག་དང་དབྱིབས་སྣ་ཚོགས་པའི་ཅོད་པན་བཅིངས་པའི་མགོ་བོ་རྣམས་ཡིན་ནོ། །རིན་པོ་ཆེ་སྣ་ཚོགས་པའི་འོད་ཟེར་གྱིས་མཆོག་ཏུ་གསལ་བར་བྱས་པའི་མགོ་བོ་ཅན་རྣམས་སྣ་ཚོགས་པའི་རོལ་མོའི་སྒྲ་དང་། གླུ་དང་། དགོད་པ་དང་། འགྱིང་བ་དང་། རྩེ་དགའ་བས་རྗེས་སུ་ཆགས་པའི་ཡིད་ཀྱིས་བདེ་བ་རྣམས་ལ་ཉེ་བར་ལོངས་སྤྱོད་པར་བྱེད་དོ། །དེ་བཞིན་དུ་ལྷ་མ་ཡིན་ཡང་བརྟན་པ་ལ་སོགས་པ་སྒྲ་གཅན་འཛིན་གྱི་མཐར་ཐུག་པས་གཞིར་གཏོགས་པ་རྣམས་སྤྲུལ་པར་བྱེད་དོ། །འཐབ་བྲལ་གྱི་བདག་པོ་དེས་བསྐལ་པ་གཞན་གྱི་བརྒྱ་བྱིན་གྱི་རྩ་ལག་ལྷན་ཅིག་རྗེས་སུ་སྤྱོད་པ་རྣམས་ཀྱི་རྗེས་སུ་འབྲང་བར་གྱུར་པ། མཆོག་ཏུ་གཟུགས་དང་རྒྱན་དང་ཆ་བྱད་དང་རབ་ཏུ་དང་བའི་ལྷ་མ་ཡིན་གྱི་བུ་མོས་རྗེས་སུ་འབྲང་བར་གྱུར་པས། རྔ་སྐད་ཡན་ལག་ལྔ་པ་རྣམས་ཐོས་ནས་དགའ་བར་འགྱུར་བས་ཡིད་ཆེས་སུ་འབྲེལ་བས་མཆོག་ཏུ་སྐྱིད་པ་རྣམས་དང་། ལྷ་མ་ཡིན་གྱི་མངའ་བདག་རྣམས་ཀྱང་ཁང་བུ་ན་ལེགས་པར་གནས་ནས་མུ་སུ་ལུན་དྷའི་ལུས་དང་ཁ་ནས་ཀུན་ཏུ་འབྱུང་སྟེ། སྤྲུལ་པ་རྣམས་ཐམས་ཅད་ཀྱང་རྩེ་བར་བྱེད་བཞིན་པས་མཆོག་ཏུ་ཡང་དཔེ་མེད་པའི་བདེ་བ་རྣམས་ལ་ཉེ་བར་ལོངས་སྤྱོད་པར་བྱེད་དོ།