ཟས་བཟའ་བར་འདོད་པས་དེ་དེ་དག་རྣམས་ཀྱི་དྲུང་དུ་ཉེ་བར་ཕྱིན་ནས་བདུད་རྩི་དེ་དག་མིད་པར་བྱེད་དོ། །དེ་ཡང་ལག་ཏུ་བླངས་ནས་སམ་སྣོད་དུ་བཅུག་ནས་ཀྱང་རུང་སྟེ། ཇི་ལྟར་ལས་ཀྱི་རྗེས་སུ་འཐུན་པའི་ཆ་འདྲ་བ་རྣམས་ཡིན་ནོ། །དེ་དག་མིད་པར་གྱུར་ནས་སླར་ཡང་གང་ཁོ་ན་མཚོ་དེ་ཉིད་ཡིན་པ་དེར་ཉེ་བར་ལེགས་པར་ཕྱིན་པ་ན། དེས་མཐོང་བ་ནི་པད་མ་ཆེན་པོ་དེའི་འོད་ཟེར་རྣམས་དང་ལྡན་པ་ཡང་ཉི་མ་བརྒྱ་སྟོང་རྣམས་པས་ཆེས་ལྷག་པར་འབར་བར་གྱུར་པ་གང་ལ་མཐོ་རིས་ཀྱི་རིན་པོ་ཆེའི་འོད་རྣམས་ཐམས་ཅད་ཀྱིས་བཅུ་དྲུག་ཆར་ཡང་མི་ཕོད་པ་ཡིན་ནོ། །དེ་ནས་ལྷ་དེ་དག་གིས་པད་མ་ཆེན་པོ་དེ་ཀུན་ནས་མངོན་པར་མཐོང་བས། མཆོག་གི་རབ་ཏུ་དགའ་བའི་ཡིད་ཀྱིས་ལྷའི་ཚོགས་རྣམས་ཀྱིས་ཡོངས་སུ་བསྐོར་ནས་རྔ་སྐད་ཡན་ལག་ལྔ་དང་ལྡན་པས་གར་བྱེད་པར་གྱུར་ཅིང་མཚོ་ཆེན་པོ་རྣམ་པར་རྒྱས་པ་དེའི་ཉེ་འཁོར་རྣམས་ཀུན་དུ་ཡོངས་སུ་འཆག་གོ། །དེ་དག་རྣམས་ཇི་ལྟ་ཇི་ལྟར་ཡོངས་སུ་འཆག་པར་བྱེད་པ་དེ་ལྟ་དེ་ལྟར་ཕྱིར་ཞིང་ཉིད་ཀྱང་མཆོག་ཏུ་བལྟ་ན་སྡུག་པ་རྨད་དུ་བྱུང་བའི་ཁྱད་པར་གཞན་རྣམ་པ་སྣ་ཚོགས་པ་རྣམས་མཚོ་དེ་དག་ཏུ་ལེགས་པར་མཐོང་ངོ་། །པད་མ་ཆེན་པོ་དེའི་རྣམ་པ་དེ་ལྟ་བུ་རྣམས་གང་ཞེ་ན། འདི་ལྟ་སྟེ་དགའ་བར་གྱུར་པ་དང་། ངོ་མཚར་བར་གྱུར་པ་རྣམས་ལ། ཁ་ཅིག་ནི་པད་མ་ཆེན་པོ་འདིའི་སྟེང་ན་མདོག་དང་དབྱིབས་སྣ་ཚོགས་པའི་བུང་བ་རྣམས་ཏེ། རིན་པོ་ཆེ་བདུན་གྱི་རང་བཞིན་གྱི་གཤོག་པ་ཅན་གྱི་བུང་བ་དང་བུང་བ་མོ་དག་ལྷན་ཅིག་ཏུ་དགའ་བར་སྤྱོད་དོ། །དེ་ཁོ་ན་བཞིན་དུ་རིན་པོ་ཆེ་བདུན་གྱི་རང་བཞིན་གྱི་བུང་བ་མོ་དེ་དག་དང་བུང་བ་དེ་དག་རྣམས་ལྷན་ཅིག་ཏུ་མེ་ཏོག་གི་རྩི་དཔེ་མེད་པའི་རང་བཞིན་གྱི་པད་མའི་རྩི་རྣམས་འཐུངས་པར་གྱུར་པ་ན་དེ་ཚིགས་སུ་བཅད་པ་བརྗོད་པ། ཇི་ལྟར། རྣམ་པ་སྣ་ཚོགས་ལས་བསྐྱེད་པའི། །སྣ་ཚོགས་འབྲས་དང་ཡང་དག་ལྡན། །གང་འདི་བཀྲ་བར་འགྲོ་བ་ཡི། །སེམས་ཀྱིས་ཇི་ལྟར་ལེགས་འདོད་བཞིན། །ཐམས་ཅད་སེམས་ཀྱིས་བཀྲ་བར་བྱས། །རྣམ་པར་བཀྲ་བར་རྟེན་པར་བྱེད། །ལས་ཞིག་ནས་ནི་རྣམ་འཇིགས་པ། །རིང་པོ་མིན་པར་འབྱུང་བར་འགྱུར། །