རྒྱ་ཆེ་བའི་དབང་དུ་བྱས་ནས་ནི་ཇི་ལྟར་འདོད་པར་ལྷ་དེ་དག་རྩེ་བར་འགྱུར་བ་དེ་བཞིན་དུ་ཡང་པད་མ་ཆེན་པོ་དེ་ཁ་དབྱེ་བ་དང་འཁུམ་པར་ཡང་འགྱུར་རོ། །ལྷ་རྣམས་ཀྱིས་ཀྱང་ཇི་ལྟར་ཀུན་ཏུ་རྟོག་པར་བྱེད་པ་དང་། གང་ཡང་ཀུན་ཏུ་རྟོག་པར་བྱེད་པ་དང་རྣམ་པ་གང་དག་གིས་ཀྱང་ཀུན་ཏུ་རྟོག་པར་བྱེད་པ་ན་དེ་དག་རྣམས་ཐམས་ཅད་ཀྱང་མཚོ་ཆེན་པོ་དེ་དང་པད་མ་ཆེན་པོ་དག་ལས་རྙེད་པར་འགྱུར་རོ། །དེ་ལྟར་ན་ཡང་མཚོ་ཆེན་པོ་དེ་ནི་ཀུན་བརྟགས་པར་དགའ་བ་ཞེས་བྱ་བ་ཡིན་པ་དང་པད་མ་དེ་ཡང་ཀུན་བརྟགས་པའི་པད་མ་ཞེས་བྱ་བ་ཡིན་ཏེ། དེ་དག་གཉིས་ཀྱི་མིང་ཡིན་ནོ། །དེས་ན་ལྷ་དེ་དག་རྣམས་གང་དང་པོ་ཉིད་ཁོ་ནར་མཚོ་དེ་དང་པད་མ་འདི་ཞེས་དེ་དག་གཉིས་ཀའི་མིང་དུ་བྱེད་པ་ཡིན་ནོ། །དེ་ནས་ལྷ་དེ་དག་རྣམས་ཐོག་མ་ཉིད་ཁོ་ནར་མཚོ་དེ་གང་ཡིན་པ་དེ་མཐོང་བར་གྱུར་ནས། དེ་བརྒྱ་འགྱུར་གྱིས་ལྷག་པར་ཆེས་རབ་ཏུ་དགའ་བར་འགྱུར་བའི་ཡིད་ཀྱིས་མཚོ་དེའི་འགྲམ་དུ་གར་བྱེད་པ་དང་འགྱིང་བག་ཀྱང་བྱེད་དོ། །གླུ་ཡང་ལེན་པར་བྱེད་དོ། །ཕན་ཚུན་གཡོག་བྱེད་པར་གྱུར་ཅིང་རྔ་སྐད་ཡན་ལག་ལྔ་དང་ལྡན་པས་དེ་ལྟར་ལྷ་རྫས་ཀྱི་འདོད་པ་རྣམས་ལ་ཉེ་བར་ལོངས་སྤྱོད་པར་བྱེད་དོ། །རང་གི་ལེགས་པར་བྱས་པའི་ལས་བྱས་པ་དེ་དག་རྣམས་མཚོ་ལ་དུས་དེ་སྙེད་དུ་རྩེད་མོ་བྱས་ནས་ཕྱིས་ཉིད་ཀྱང་མྱོས་པའི་སྐྱོན་རྣམས་དང་བྲལ་བ་དང་མྱོས་པའི་ཡོན་ཏན་རྣམས་དང་ལྡན་པའི་བཏུང་བ་དག་འཐུང་བར་བྱེད་པ་རྣམས་ལ་ཇི་ལྟར་འདོད་པ་བཞིན་དུ་བསིལ་བ་དང་ཇི་ལྟར་འདོད་པའི་དྲི་རྣམས་དང་། ཇི་ལྟར་འདོད་པའི་ཁ་དོག་རྣམས་དང་ཇི་ལྟར་འདོད་པ་བཞིན་གྱི་སྣོད་ཀྱི་དབྱིབས་དང་རིན་པོ་ཆེའི་རང་བཞིན་གྱི་ཡོན་ཏན་རབ་ཀྱི་མཆོག་གིས་ཀུན་ནས་གང་བའི་བཏུང་བའི་མཚོ་ཆེན་པོ་དེ་ཉིད་ཀྱི་དྲུང་ནས་བྱུང་ནས། མ་ལུས་པ་རྣམས་ལ་འགྲོ་བར་བྱེད་པ་དང་གང་དག་ཡིན་པའི་ལྷ་དེ་དག་རྣམས་འཐུང་བར་བྱེད་དོ། །གཞན་ཡང་ཐག་ཉེ་བ་ན་གནས་པའི་ལྷ་གཞན་དག་རྣམས་ཀྱང་མཚོ་ཆེན་པོ་དེ་ཉིད་དུ་སོང་ནས་གར་བྱེད་པར་གྱུར་པ་ན། བདུད་རྩིའི་ཁུ་བ་དག་ལྷ་རྫས་ཀྱི་དྲི་དང་རོ་དང་རེག་བྱ་དང་ཁ་དོག་མཆོག་དང་ལྡན་པ་རྣམས་དེ་དག་གིས་མཐོང་བར་གྱུར་ནས། དེ་དེ་དག་རྣམས་ལ་དགའ་བའི་ཡིད་ཀྱིས་རྩེ་བར་བྱེད་དེ། ཟས་བཟའ་བར་འདོད་པས་དེ་དེ་དག་རྣམས་ཀྱི་དྲུང་དུ་ཉེ་བར་ཕྱིན་ནས་བདུད་རྩི་དེ་དག་མིད་པར་བྱེད་དོ།