།དེ་སྐད་ཅེས་བརྗོད་ནས་རིའི་ཕྲེང་བ་དེའི་ནམ་མཁའ་ལ་འཕགས་པར་གྱུར་ཏོ། །མུ་སུ་ལུན་དྷ་ཡང་དེས་བཤད་པ་ལ་མངོན་པར་དགའ་བར་གྱུར་ནས། ལྷ་རྫས་ཀྱི་ཁང་བཟངས་དེ་ཉིད་ལ་མངོན་པར་ཞོན་ཞིང་། ལྷ་དེ་དག་རྣམས་ཀྱིས་དེ་ཡོངས་སུ་བསྐོར་ནས་ནམ་མཁའི་དཀྱིལ་དུ་འཕགས་སོ། །ལྷ་གཞན་དེ་དག་རྣམས་ཀྱང་ལྷན་ཅིག་རྗེས་སུ་སྤྱོད་པའི་ལྷ་དེ་དག་རྣམས་ཉིད་ཀྱིས་ཡོངས་སུ་བསྐོར་ནས་རྩེ་མོ་སྟོང་པའི་རིའི་ཕྲེང་བའི་རི་གང་ཡིན་པའི་རི་ལ་རྩེ་བར་བྱེད་དེ། དེ་དག་ཁོ་ན་བཞིན་དུ་བག་མེད་པའི་དུག་གིས་ཀུན་དུ་རྨོངས་པར་གྱུར་ཅིང་། ཡུལ་སྲེད་པས་ཉེ་བར་བཅོམ་པས་ནགས་དང་ཉེ་བའི་ནགས་དང་རྫིང་བུ་དང་པད་མའི་ནགས་དང་། མཚོ་ཆེན་པོ་རྣམས་དང་དེ་ཡང་དཔག་བསམ་གྱི་ཤིང་གི་ནགས་རྣམས་ལ་ཡང་དེ་ཁོ་ན་བཞིན་དུ་ཕན་ཚུན་དུ་གྲོགས་ཀྱི་བྱ་བ་དང་ལྡན་པས་དགའ་བར་བྱེད་དོ། །རྩེ་བར་ཡང་བྱེད་པ་ནི་ལྷ་རྫས་རྔ་སྐད་ཡན་ལག་ལྔ་དང་ལྡན་པ་དཔེ་མེད་པས་ཟས་སྐོམ་གྱི་ཆུ་ཀླུང་རྣམས་ལ་དགའ་བར་བྱེད་དོ། །ལྷ་རྣམས་རྩེ་བ་ཡང་དུས་ཐམས་ཅད་ཀྱི་མེ་ཏོག་དང་། འབྲས་བུ་དང་བྱ་དག་སྒྲ་ཀུན་ནས་སྒྲོགས་པ་ཕུན་སུམ་ཚོགས་པ་རྣམས་ལ་རང་གི་ལས་ཀྱིས་སྤྲུལ་པའི་བདེ་བ་མཆོག་ལ་ཉེ་བར་ལོངས་སྤྱོད་པར་བྱེད་དེ། ཡིད་དུ་འོང་བར་འགྱུར་བ་བྱས་ཤིང་བསགས་པའི་ལས་རྣམས་ཇི་སྲིད་དུ་ཟད་པར་མ་གྱུར་གྱི་བར་གྱི་དུས་དེ་སྲིད་དུའོ། །གང་གི་ཚེ་ཟད་པར་གྱུར་པ་དེའི་ཚེ་ཇི་ལྟར་བྱས་པའི་རང་གི་ལས་རྣམས་ཀྱིས་དམྱལ་བ་དང་ཡི་དགས་དང་དུད་འགྲོར་སྐྱེ་བར་འགྱུར་རོ། །གང་ཡང་མི་རྣམས་དང་སྐལ་བ་འཐུན་པར་གྱུར་པ་མི་རྣམས་ཀྱི་ནང་དུ་སྐྱེས་ན། དེ་མཆོག་ཏུ་སྐྱིད་དེ་བར་འགྱུར་རོ། །རྒྱ་མཚོའི་ངོས་རྣམས་སུའམ་འབབ་ཆུ་རྣམས་ཀྱིའམ་ཚོང་པའམ་སེམས་སྟོབས་དང་ལྡན་པ་དང་རྒྱལ་པོ་རྣམས་ཐམས་ཅད་ཀྱིས་ཀྱང་རྒྱ་མཚོའི་ངོས་དེ་ཉིད་ལ་རབ་ཏུ་རྒྱུ་བར་མི་བྱེད་པ་དང་ལོངས་སྤྱོད་ཆེ་བའི་མཆོག་དང་ལྡན་པ་དང་སྐྱེ་བོ་ཐམས་ཅད་ཕུན་སུམ་ཚོགས་པར་འགྱུར་ཞིང་འཐུན་པ་དང་ཡིད་དུ་འོང་བ་དང་ལྡན་པར་ལས་དེའི་རྒྱུ་འཐུན་པས་འགྱུར་རོ། །གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ། འཐབ་བྲལ་བའི་ལྷ་རྣམས་ཀྱི་ས་ལ་ཀུན་དུ་ལྟ་བར་བྱེད་པ་ན། འཐབ་བྲལ་གྱི་ལྷ་རྣམས་ཀྱི་ས་རྟག་ཏུ་བདེ་བ་ཞེས་བྱ་བ་ཇི་ལྟ་བ་བཞིན་དུ་ཡོད་པ་དེས་ཐོས་པ་ལས་བྱུང་བའི་ཤེས་རབ་ཀྱིས་ཤེས་སོ།