།འཇིགས་པ་རྣམས་ཐམས་ཅད་ལས་དེས་མི་འཇིགས་པ་སྦྱིན་པར་བྱེད་པས་ཉིན་དང་མཚན་དུ་ཡང་དགེ་བའི་ཆོས་རྣམས་ཀྱི་ཆུ་ཀླུང་རབ་ཏུ་འཇུག་པར་འགྱུར་བའི་ཕྱིར་རབ་ཏུ་རྒྱས་པར་འགྱུར་རོ། །འདི་ལ་གྲོང་ཁྱེར་པ་རྣམས་ཐམས་ཅད་རྗེས་སུ་ཆགས་པར་འགྱུར་བ་དང་རྗེས་སུ་ཆགས་པའི་ཡིད་ཅན་དེ་དག་རྣམས་ལས་དེར་ནོར་རྣམས་རྙེད་པར་འགྱུར་བ་དང་སྙན་པ་ལ་ཡང་སྦྱོར་བར་བྱེད་དོ། །ཉིན་དང་མཚན་དུ་ཡང་འདིའི་བདེ་བ་སེམས་པར་བྱེད་དོ། །དེ་དེ་ལྟར་ཞུགས་པར་གྱུར་པའི་རྒྱལ་པོ་ནི་སེམས་ཅན་རྣམས་ཐམས་ཅད་ལ་ཕན་པར་རབ་ཏུ་ཞུགས་པས་ན་དབང་སྒྱུར་བ་ཡང་རབ་ཏུ་འཕེལ་བར་འགྱུར་ཏེ། མངའ་ཐང་འཕེལ་བར་གྱུར་པ་གང་ཡིན་པ་དེ་དག་གིས་ཡང་དག་པ་ཇི་ལྟ་བ་བཞིན་དུ་ལོ་ཏོག་རྣམས་སྐྱེ་བར་འགྱུར་རོ། །ལེགས་པ་ཉིད་དུ་སྐྱེ་དགུ་རྣམས་ཀྱང་འཕེལ་བར་འགྱུར་རོ། །གྲོང་ཁྱེར་དེ་འཕེལ་བར་གྱུར་པས་ཀྱང་ཕྱིར་ཞིང་ཡང་རྒྱལ་པོ་དེ་ཉིད་མངོན་པར་འཕེལ་བར་བྱེད་དོ། །དེ་ལྟར་རྒྱལ་པོ་དེས་སྐྱེ་དགུ་རྣམས་བསྐྱངས་པར་གྱུར་པ་ན་ཆོས་དང་ནོར་དང་སྙན་གྲགས་དང་ཡང་རྟག་ཏུ་ཡང་དག་པར་ལྡན་པར་འགྱུར་རོ། །ལེགས་པར་ལྡན་པས་ཕྱིར་ཞིང་ཡང་རྒྱལ་འབངས་རྣམས་སྐྱོང་བར་བྱེད་དོ། །དེ་རྟག་ཏུ་སྐྱེ་དགུ་རྣམས་ལ་ཕན་པར་འདོད་པ་དང་། གནོད་སེམས་མེད་པ་དང་། བརྣབ་སེམས་མེད་པར་འགྱུར་བས་ཀྱང་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་པ་རྣམས་ལས་འཐབ་བྲལ་གྱི་ལྷ་རྣམས་ཀྱི་མངའ་བདག་ཏུ་འགྱུར་བ་ཡིན་ཏེ། དེས་སྔོན་བྱས་པའི་རྒྱུ་དང་རྐྱེན་རྣམས་ཀྱིས་སོ། །རྒྱལ་པོ་ཆོས་བྱེད་ཆོས་ཀྱི་རྗེས་སུ་ཀུན་ནས་འཇུག་པས་ཆོས་གཞན་ཡང་བྱ་བར་བྱའོ། །འདི་ཡང་གང་ཞེ་ན། འདི་ལྟ་སྟེ། བུ་དང་བུ་མོ་ཡང་དག་པ་ཇི་ལྟ་བའི་བདེ་བས་འཛིན་པའོ། །བུ་དང་བུ་མོ་ཡང་ཡང་དག་པའི་བདེ་བས་འཛིན་པར་བྱེད་པར་འགྱུར་བའི་རྒྱལ་པོའམ་རྒྱལ་པོའི་བློན་པོ་ལ་ཡང་རུང་སྟེ། རྣམ་པ་དུ་མའི་བསོད་ནམས་ཆེན་པོ་རྒྱུན་མི་འཆད་པར་རབ་ཏུ་འཕེལ་བར་འགྱུར་རོ། །གང་འདི་ལ་གྱུར་པ་རྣམས་དེ་དག་ལ་འགྱུར་བར་བྱེད་པ་དང་། རྣམ་པ་གང་དག་གིས་ཡིན་པ་དང་། ཡོད་པ་རྣམས་ཀྱང་ཇི་སྲིད་ཀྱི་བར་དུ་དང་། དུས་གང་གི་ཚེ་ན་ཡོད་པ་དེ་དག་རྣམས་ཀྱང་དེ་བཞིན་དུ་དེས་དེ་ལ་ཐམས་ཅད་ནས་སྟེར་བར་བྱེད་པ་སྟེ། རྫས་དང་ཟས་དང་སྐོམ་དང་གོས་དང་ཡོངས་སུ་འཁྱུད་པ་དང་སྙན་པར་སྨྲ་བ་དང་ཡིད་ཆེས་པར་བྱ་བ་དང་དགའ་བར་བྱ་བ་དང་མི་འཇིགས་པ་སྦྱིན་པ་རྣམས་ཀྱང་ཤུགས་བཏོན་ནས་རབ་ཏུ་སྦྱིན་པར་བྱེད་དོ།