།ཉིན་མོ་དང་མཚན་མོར་ཡང་འདི་དག་མཆོད་པས་མཆོད་པར་བྱེད་པ་རྣམས་ལ་ནི། ལས་རྣམས་ཐམས་ཅད་ལ་ཡང་ལྷན་ཅིག་རང་དབང་དུ་འགྱུར་རོ། །རྨི་ལམ་ཡང་བཟང་པོ་དང་ངན་པ་མྱོང་བར་འགྱུར་བ་རྣམས་ངེས་པར་ལེགས་པར་སྟོན་པར་འགྱུར་རོ། །ཡུལ་ལྗོངས་འཇིག་པར་འགྱུར་བ་ཡང་འདི་དག་གིས་སྲུང་བར་བྱེད་དོ། །དགེ་བའི་ལས་རྣམས་རྟག་ཏུ་སྐུལ་བར་བྱེད་དོ། །འདི་ལྟ་སྟེ། དགེ་བ་དག་ལ་སོ་སོར་ངེས་པར་འཇུག་པར་བྱེད་པ་ན་འདི་དག་གིས་ཉིན་མོ་དང་མཚན་མོར་ཡང་སྲུང་བར་བྱེད་དོ། །ཕ་དང་མ་བཞིན་དུ་ཐབས་དུ་མས་དགེ་བར་བྱེད་པའི་ལྷ་མཆོད་པར་བྱ་བར་འོས་པ་ཡང་ཡིན་ནོ། །དེའི་ཕྱིར་ན་རྒྱལ་པོས་རྟག་ཏུ་ལྷ་དག་མཆོད་པར་བྱ་བ་ཡིན་ཏེ། ཆོས་དང་ལྡན་པའི་ཆོ་ག་དག་གིས་དང་མངོན་པར་འདོད་པ་རྣམས་དང་དམ་ཚིག་གིས་དང་སྡིག་པའི་ལས་རྣམས་དང་རྣམ་པར་བྲལ་བས་དེང་འཚེ་བ་མེད་པ་དང་ལོག་པར་ལྟ་བ་ཅན་གྱི་ཡི་དམ་གྱིས་མ་ཡིན་པ་དང་། འགྲོ་བ་ཐམས་ཅད་ཀྱི་ལས་དང་སྡུག་བསྔལ་བྱེད་པ་པོར་གྱུར་པའི་རྒྱུ་དེ་དང་བློ་དེ་དག་དང་ཇི་ལྟ་བར་བྲལ་བར་གྱུར་པ་དེ་ལྟར་ལྷ་དག་མཆོད་པར་བྱའོ། །གྲོགས་བྱེད་པའི་ཡོན་ཏན་རྣམས་ཀྱིས་དེ་ལྟར་མཆོད་པར་བྱེད་པའི་རྒྱལ་པོ་ནི་དོན་དག་ལས་ཡོངས་སུ་ཉམས་པར་མི་འགྱུར་རོ། །རྒྱུ་དང་འབྲས་བུ་ལ་སྐུར་པ་མི་འདེབས་སོ། །ལོག་པར་ལྟ་བ་དང་ལྡན་པར་མི་འགྱུར་རོ། །རྟག་ཏུ་ཡང་མཆོད་པར་བྱ་བར་འགྱུར་རོ། །ལུས་ཞིག་ནས་ཀྱང་ལས་དེའི་རྒྱུ་དང་རྐྱེན་དག་གིས་བདེ་འགྲོ་མཐོ་རིས་ཀྱི་འཇིག་རྟེན་གྱི་ལྷ་རྣམས་ལས་འཐབ་བྲལ་གྱི་ནང་དུ་སྐྱེས་ནས་འཐབ་བྲལ་གྱི་ལྷ་རྣམས་ཀྱི་རྒྱལ་པོར་འགྱུར་རོ། །ཆོས་གཞན་ཡང་རྒྱལ་པོས་བྱ་བར་བྱའོ། །འདི་ཡང་གང་ཞེ་ན་འདི་ལྟ་སྟེ། ལེགས་པར་སྐྱེ་དགུ་རྣམས་བསྐྱང་བར་བྱའོ། །རྒྱལ་པོས་ཡང་དག་པར་སྐྱེ་དགུ་སྐྱོང་བར་བྱེད་པ་ནི་ཆོས་བྱེད་ཆོས་ཀྱི་རྗེས་སུ་འཇུག་པར་གྱུར་པ་མ་དང་ཕ་དང་མཚུངས་པར་མི་འཇིགས་པ་སྦྱིན་པར་བྱེད་པ་ཡིན་ནོ། །འཇིགས་པ་རྣམས་ཐམས་ཅད་ལས་དེས་མི་འཇིགས་པ་སྦྱིན་པར་བྱེད་པས་ཉིན་དང་མཚན་དུ་ཡང་དགེ་བའི་ཆོས་རྣམས་ཀྱི་ཆུ་ཀླུང་རབ་ཏུ་འཇུག་པར་འགྱུར་བའི་ཕྱིར་རབ་ཏུ་རྒྱས་པར་འགྱུར་རོ།