རྣམ་པར་ཐ་དད་པར་གྱུར་པ་དང་། སྔ་ཕྱི་རྣམ་པར་འགལ་བ་དང་། བསམ་པ་ཕན་ཚུན་མ་རུངས་པར་སོང་བར་གྱུར་པ་དང་། ཕྱོགས་ཆ་འཛིན་པར་གྱུར་པས་ཀྱང་སྨྲས་པར་གྱུར་པ་དང་། ཉེ་བར་བསྐྱེད་འདོད་པའི་དངོས་པོས་སྨྲས་པར་གྱུར་པ་དང་། སྔོན་ཕན་པར་བྱས་པ་དང་། གནོད་པར་བྱས་པར་གྱུར་པས་སྨྲ་བར་འགྱུར་བ་དང་། ཕན་ཚུན་དུ་ནོར་དང་དབྲལ་བར་འདོད་པས་རྒྱལ་པོ་ལ་རྗོད་པར་བྱེད་པ་དེ་དག་སྔར་བརྗོད་པར་གྱུར་པའི་རྒྱུས་ཕན་ཚུན་དུ་རབ་ཏུ་སྡང་བར་ཞུགས་པས་རྗོད་པར་བྱེད་དོ། །དེ་དག་ལ་རྒྱལ་པོས་དད་པར་མི་བྱའོ། །དེ་ལྟར་ན་འདིའི་ཡུལ་ལྗོངས་རྣམས་འཇིག་པར་མི་འགྱུར་རོ། །རང་བཞིན་གྱིས་ཀྱང་མི་སྐྱེ་ལ་གནས་མ་ཡིན་པ་ལ་ཡང་ཁྲོ་བར་མི་བྱེད་དོ། །འབྱེད་པར་བྱེད་པ་རྣམས་ལ་དད་པར་བྱེད་པ་ཡང་མ་ཡིན་ནོ། །རྒྱལ་པོ་དེ་ནི་ཡོན་ཏན་དང་ལྡན་པར་གྱུར་པ་གཞན་གྱི་རྐྱེན་གྱིས་མི་འགྲོ་བར་རང་གི་འདུན་པར་གྱུར་པ། འཇུག་པར་གྱུར་པ། ཁྲོ་བ་ཤས་ཆུང་བ་སྐྱེ་བོ་རྣམས་ཐམས་ཅད་དང་ལྷ་རྣམས་ཀྱང་བློ་འཐུན་པ་སྟེ། ལེགས་པར་དཔྱད་ནས་བྱེད་པ་པོ་ཆོས་བྱེད་དྲང་པོར་གྱུར་པ་གྲོང་ཁྱེར་ལ་གཅེས་ཤིང་འདོད་པ་ནི་ལུས་ཞིག་པ་ན་མཐོ་རིས་འཐབ་བྲལ་བའི་ལྷ་རྣམས་ཀྱི་ན་ནང་དུ་སྐྱེའོ། །གཞན་ཡང་ཆོས་གཞན་དང་ཡང་དག་པར་ལྡན་པའི་རྒྱལ་རིགས་རྒྱལ་པོ་སྤྱི་བོ་ནས་དབང་བསྐུར་བ་ལུས་ཞིག་ནས་མཐོ་རིས་བདེ་འགྲོའི་འཇིག་རྟེན་འཐབ་བྲལ་བའི་ལྷ་རྣམས་ཀྱི་མངའ་བདག་ཏུ་འགྱུར་རོ། །འདི་ཡང་གང་ཞེ་ན། འདི་ལྟ་སྟེ། སྙན་གྲགས་ལ་སྲེད་པ་སྐྱེད་པར་བྱེད་པའོ། །རྒྱལ་པོ་གང་རྫས་ཀྱིས་ནི་མ་ཡིན་ལ་བརྐམ་ཆགས་ཅན་དུ་གྱུར་པ་ཡང་མ་ཡིན་ཏེ། ལག་པ་རབ་ཏུ་འཁུམས་པ་ནི་མ་ཡིན་ལ་བཞིན་རྣམ་པར་བསྡུས་པར་འགྱུར་བ་ཡང་མ་ཡིན་ཞིང་མིག་ཆུང་བ་ཡང་མ་ཡིན་ནོ། །གདོང་ཆུང་བ་མ་ཡིན་ནོ། །གློ་བུར་དུ་ཁྲོ་བ་མ་ཡིན་པ་དང་། གློ་བུར་དུ་དང་བར་འགྱུར་བ་ཡང་མ་ཡིན་པ་དང་། ཤིན་ཏུ་བརྟན་པའི་བློར་གྱུར་པ་དང་། དེ་ནི་སྙན་གྲགས་དང་ཡང་དག་པར་ལྡན་པར་འགྱུར་ལ། ནོར་རྫས་རྣམས་དང་ཡང་ལྡན་པར་འགྱུར་རོ། །འོན་ཀྱང་དེ་བཞིན་དུ་ནོར་ལ་འདོད་པ་མི་སྐྱེད་དེ་ཇི་ལྟར་སྐྱེ་དགུ་རྣམས་ལ་སྙན་གྲགས་སུ་འགྱུར་བར་རྒྱལ་པོ་དེས་སྒྱུར་བར་བྱེད་དོ།