།དེ་དག་རྣམས་དུས་ཡུན་རིང་པོ་ཕུག་དེ་དག་ཏུ་ལྷ་རྫས་ཀྱི་མཆོག་རྣམས་སྣ་ཚོགས་པ་ཡིད་འཕྲོག་པར་བྱེད་པ་རྣམས་ཀྱིས་རྩེད་མོ་རྩེས་པར་གྱུར་ནས་གང་ཁོ་ནས་ཇི་ལྟར་ཞུགས་པར་གྱུར་པ་དེ་ཁོ་ན་བཞིན་དུ་ཕྱིར་འགྲོའོ། །ཕྱིར་སོང་ནས་ཀྱང་གཞན་ཡང་ཡུལ་རྣམས་ལ་སྲེད་པར་གྱུར་པས་བག་མེད་པར་རྣམ་པར་རྒྱུ་བ་རྣམས་ནགས་དང་ཉེ་བའི་ནགས་དག་ལྟ་བ་ལ་དགའ་བའི་ཡིད་ཀྱིས་ལྷན་ཅིག་སྤྱོད་པ་དང་བཅས་པས་པད་མའི་ཚལ་གྱི་ནང་དང་ཆུ་ཀླུང་དང་ཚང་ཚིང་དག་ཏུ་དགའ་བར་བྱེད་དོ། །ལྷ་དེ་དག་ལེགས་པར་བྱས་པའི་ལས་ཀྱི་འབྲས་བུ་ལ་ལོངས་སྤྱོད་པས་དེ་དག་རྣམ་པ་དེ་སྲིད་ཀྱི་དཔེ་མེད་པའི་ལྷ་རྫས་ཀྱི་བདེ་བ་རྣམས་ཕུན་སུམ་ཚོགས་པར་འགྱུར་བ་རྣམས་ལ་ཡུལ་གྱིས་ངོམས་པ་སྐྱེ་བ་མེད་དེ། རྣམ་པར་གཡེངས་པའི་སྐྱོན་གྱིས་རྣམ་པར་གཡེངས་པའི་མུན་པའི་རང་བཞིན་ཁོ་ནས་ཏེ། དེ་དག་གིས་རང་བཞིན་ནི་ནམ་ཡང་ཀུན་ནས་འཁུམ་པར་མི་འགྱུར་རོ། །ཡུལ་གྱི་བདེ་བ་རྣམས་ཀྱིས་ངོམས་པར་འགྱུར་བའམ་རྣམ་པར་གཡེངས་པར་གྱུར་པའི་ངོ་བོས་ཀྱང་དབང་པོ་རྣམས་ནི་ནམ་ཡང་སྲེད་པ་དང་བྲལ་བར་མི་འགྱུར་རོ། །ལྷ་རྣམས་ལྷ་རྫས་ཀྱི་འདོད་པའི་ཡོན་ཏན་ལྔ་ཡིས་ཉི་མ་རེ་རེ་ཞིང་རབ་ཏུ་འཕེལ་བར་གྱུར་པའི་སྔ་ཕྱི་རིམ་པས་ངོ་མཚར་བ་རྣམས་སྐྱེད་པར་བྱེད་པ་དང་ཡིད་ཀྱི་རྗེས་སུ་འཐུན་པར་བྱེད་པ་དང་དཔེ་མེད་པ་དང་ཡོན་ཏན་དང་ལྡན་པར་གྱུར་པས་ཀྱང་དེས་དེ་དག་ནམ་ཡང་ངོམས་པ་སྐྱེ་བ་མ་ཡིན་ནོ། །ཇི་ལྟར་ཆུ་རྣམས་ཀྱིས་ནི་རྒྱ་མཚོ་ངོམས་པ་ཡོད་པ་མ་ཡིན་ནོ། །དེ་བཞིན་དུ་ལྷ་རྣམས་ཀྱང་སྟེ་དེ་དག་དུས་དེ་སྲིད་དུ་རིགས་དེ་ཉིད་ལ་དགའ་བར་ཡང་བྱེད་ཅིང་རྣམ་པ་སྣ་ཚོགས་པའི་བདེ་བ་རྣམས་ཀྱིས་རྒྱུ་བ་རྒྱགས་པས་ནགས་དང་ཉེ་བའི་ནགས་རྣམས་ལ་རྣམ་པར་རྒྱུ་བར་བྱེད་པས་འདོད་པའི་ཆུ་བོས་ཀུན་ནས་ཁྱེར་བར་གྱུར་པ་རྣམས་ལྷན་ཅིག་སྤྱོད་པ་དང་བཅས་ནས་དགའ་བར་བྱེད་དེ། ཇི་སྲིད་དུ་འདོད་པ་སྡུག་པའི་ལས་བྱས་ཤིང་བསགས་པར་གྱུར་པ་དེ་དག་རྣམས་ཟད་པར་མ་གྱུར་གྱི་བར་དུའོ། །དེ་ཟད་ནས་ལྷའི་རིགས་དེ་ལས་འཆི་འཕོ་བར་འགྱུར་རོ། །འཕོས་ནས་ཀྱང་ཇི་ལྟར་ལས་ཀྱིས་ཉེ་བར་འགྲོ་བར་བྱེད་པ་ཇི་ལྟར་ལས་ཀྱི་ཐག་པ་དག་གིས་ཀུན་ནས་ལྷ་དེ་བཅིངས་པར་གྱུར་ཅིང་རྣམ་པ་དེ་ལྟ་བུའི་བདེ་བ་ལས་ཀྱང་ཡོངས་སུ་ཉམས་ནས་སླར་ཡང་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེའོ།