།གང་ཕྱིར་སེམས་ནི་རྩེ་གཅིག་མིན། །ཆོས་རྣམས་དཔྱོད་བྱེད་པ་ཡང་མིན། །དགེ་སློང་ཆང་ནི་སྟེན་པ་ན། །དགོན་པར་དགའ་བར་འགྱུར་མ་ཡིན། །ཆང་གིས་ཡིད་ནི་གཡེང་བར་བྱེད། །སྙིང་ཡང་རྒོད་བག་དང་བཅས་འགྱུར། །ཆོས་ལའང་དགའ་བར་འགྱུར་མ་ཡིན། །འཇིག་རྟེན་འདི་མེད་ཕ་རོལ་མེད། །སྤྱོད་ལམ་ཤེས་པ་མ་ཡིན་ལ། །སྟོན་པའི་དུས་ཀྱང་ཤེས་མ་ཡིན། །དམ་པའི་ཆོས་ཉིད་དང་འགལ་ཞིང་། །སྟོན་པས་ཀྱང་ནི་ཅི་ཞིག་བཤད། །རེ་ཞིག་རང་གིས་མི་ཤེས་ན། །བདག་གིས་འདིར་ནི་ཅི་ཞིག་སྨྲ། །མཛེས་མིན་ངག་གི་སྤུ་གྲིའི་མཚོན། །གཞན་གྱིས་ཇི་ལྟར་ཡོངས་སུ་ཤེས། །འཇིག་རྟེན་དོན་ལ་ཡང་འགྱུར་ཞིང་། །ཆོས་ལས་ཀྱང་ནི་ཡོངས་སུ་ཉམས། །འབར་བའི་ཆང་ནི་བསྟེན་པ་ན། །སྐྱེས་བུ་ནོར་མེད་མཐོང་བ་ཡིན། །འདས་པའི་དོན་ཀུན་དྲན་མིན་དང་། །ད་ལྟར་བ་ལ་རྨོངས་པར་འགྱུར། །མ་འོངས་བསམ་པ་ཅི་ལ་ཡོད། །ཆང་གིས་དུས་གསུམ་ཆུད་གཟོན་བྱེད། །སྣ་ཚོགས་གཟུགས་ཀྱང་རྣམ་པར་འཇོམས། །ལུས་ཅན་རྣམས་ཀྱིས་སེམས་ཀྱང་འཇོམས། །སྐྱེས་པའི་སྐྱོན་ནི་སྐྱེད་བྱེད་པའི། །ཆང་གིས་ཆོས་ནི་རབ་སུན་འདོན། །དེ་ལྟར་ཕུག་གི་ནང་ན་གནས་པར་གྱུར་པའི་བྱ་དེ་དག་རྣམས་རྟག་པར་རབ་ཏུ་དགའ་བ་དང་ལྡན་ཞིང་། སྟོན་པར་བྱེད་པའི་རྩ་བར་གྱུར་པ་ལས་དམ་པ་རྣམས་ཀྱིས་ལེགས་པར་བསྐུལ་བས་ལྷ་རྣམས་ལ་འཆད་དོ། །དེ་ཐོས་ནས་ཀྱང་ལྷ་གང་དག་ལེགས་པར་བྱས་པའི་ལས་རྣམས་ཆེས་ལྷག་པར་གྱུར་པ་དེ་དག་རྣམས་ཀྱིས་སྐྱེ་བ་གཞན་རྗེས་སུ་དྲན་པར་འགྱུར་བ་དང་། ཆང་གི་སྐྱོན་རྣམས་ཀྱང་ཤེས་སོ། །རྒྱུ་དེས་ཀྱང་ཆང་མི་འཐུང་ངོ་། །དེ་དག་རྣམས་འདིར་བག་མེད་པར་ཡང་མི་འགྱུར་རོ། །དེ་ལྟ་དེ་ལྟར་མྱོས་བྱེད་འཐུང་བར་བྱེད་པ་དེ་དག་རྣམས་སླར་ཡང་ལྷ་དེ་དག་རབ་ཏུ་དགའ་བའི་ཡིད་ཀྱིས་རབ་ཏུ་རྩེ་བར་བྱེད་དེ་རྔ་སྐད་ཡན་ལག་ལྔ་དང་ལྡན་པ་ཤིན་ཏུ་ཆགས་པ་དང་ཤིན་ཏུ་སྙན་པ་དང་རྒྱུན་དུ་དགའ་བར་གྱུར་པ་དག་གིས་དགའ་བར་བྱེད་དོ། །དེ་དག་རྣམས་དུས་ཡུན་རིང་པོ་ཕུག་དེ་དག་ཏུ་ལྷ་རྫས་ཀྱི་མཆོག་རྣམས་སྣ་ཚོགས་པ་ཡིད་འཕྲོག་པར་བྱེད་པ་རྣམས་ཀྱིས་རྩེད་མོ་རྩེས་པར་གྱུར་ནས་གང་ཁོ་ནས་ཇི་ལྟར་ཞུགས་པར་གྱུར་པ་དེ་ཁོ་ན་བཞིན་དུ་ཕྱིར་འགྲོའོ།