།ཇི་ལྟར་ཡང་ལྷ་དེ་དག་ཡིད་ཀྱིས་སྒོམ་པར་བྱེད་པར་གྱུར་པ་དེ་བཞིན་དུ་བསམ་པ་དེ་དག་ཐམས་ཅད་ཕུག་དེ་དག་རྣམས་ཉིད་ལས་ཐོབ་པར་འགྱུར་རོ། །ཕུག་དེ་དག་ཡང་གང་འདོད་པར་གྱུར་པ་རྣམས་བྱེད་པ་ཡིན་ནོ། །དེ་དག་རྣམས་ཀྱི་མིང་གིས་ཀྱང་ལྷ་དེ་དག་འདོད་པའི་ཡོན་ཏན་གྱིས་ངོམས་པ་མེད་པར་དགའ་བར་བྱེད་པར་འགྱུར་ཏེ་ལྷན་ཅིག་སྤྱོད་པ་དང་བཅས་པ་རྣམས་དགའ་བའི་རྒྱན་དང་ཆ་བྱད་ཀྱི་མཆོག་འཛིན་པར་གྱུར་པ་ལ་གཅིག་ཏུ་དགེ་བའི་ལས་ཀྱིས་ཁ་ཅིག་ནི་ཤིན་ཏུ་བར་ཡང་ཡིད་འཕྲོག་པར་བྱེད་པའི་རྒྱན་དང་ཆ་བྱད་དང་ལང་ཚོ་དང་འགྱིང་བ་དང་དགོད་པ་དང་གླུ་དང་གར་རྣམས་ཀྱིས་རྣམ་པར་ཆགས་པར་གྱུར་པས་ལྷན་ཅིག་ཏུ་དགའ་བར་བྱེད་དོ། །ཇི་སྲིད་དུ་དགའ་བར་གྱུར་པའི་ཕུག་དེ་དག་རྣམས་ཐམས་ཅད་ཀྱི་སྒོ་ན་ཡང་ལྷ་རྣམས་ལ་ཕན་པར་འདོད་པས་འཐབ་བྲལ་བ་རྣམས་ཀྱི་མངའ་བདག་མུ་སུ་ལུན་དྷས་གཙུག་ལག་གི་ཚིགས་སུ་བཅད་པ་མངོན་པར་བྲིས་པ་ཇི་ལྟར། འཆི་བདག་གིས་ནི་སྐྱེ་བ་འཐུང་། །རྒ་བ་ཡིས་ནི་ལང་ཚོ་འཐུང་། །ནད་རྣམས་ཀྱིས་ནི་ནད་མེད་འཐུང་། །འཇིག་རྟེན་པས་ཀྱང་མི་གོའོ། །སྐྱེས་པ་ཡང་ནི་དུ་མ་རྣམས། །ལྟུང་བ་ཡང་ནི་དུ་མ་ཡིན། །འདི་ཉིད་སྐྱེ་འབྱུང་རྒན་འགྱུར་དང་། །འཆི་འཕོ་དང་ནི་སྐྱེ་བར་འགྱུར། །སྐྱེས་བུ་ཐམས་ཅད་བསྟན་པ་ཡང་། །འཇིག་རྟེན་གྱིས་ནི་མི་གོའོ། །བརྗེ་བསོར་ཇི་ལྟ་བ་ཡི་ཡང་། །སྐད་ཅིག་ཡུད་ཙམ་སྐབས་ཡོད་མིན། །ངག་གིས་གྲོལ་བ་དེར་མནར་བ། །འཇིག་རྟེན་གྱིས་ནི་གོ་བའང་མིན། །སྐྱེ་བ་ཡང་ནི་རྣམ་མང་པོ། །ལྷ་ནི་ཡུལ་གྱིས་རྣམ་རྨོངས་པ། །འཇིག་རྟེན་གྱིས་ནི་མི་གོའོ། །སྲིད་པའི་འཁོར་ལོའི་ཁོག་ཙེ་འདི། །སྲེད་པ་ཡིས་ནི་སྔོན་དུ་བཅུག །དགའ་བའི་འདོད་ཆགས་ཀྱིས་ཡོངས་བསྐོར། །འོན་ཀྱང་འཇིག་རྟེན་པས་མི་གོ། །རྣམ་རྟོག་མཁའ་ལྡིང་གིས་གང་བའི། །སྐྱོན་རྣམས་ཆེས་འཇུག་ཤེས་པར་གྱིས། །སྲེད་པའི་ཆུ་ཀླུང་རྣམ་ཡངས་འདི། །འཇིག་རྟེན་པས་ཀྱང་གོ་བ་མིན། །དེ་ལྟར་ཕུག་གི་སྒོ་དེ་དག་རྣམས་ལ་ལྷ་རྣམས་ལ་ཕན་པར་འདོད་པའི་ཕྱིར་ན་དེ་བཞིན་དུ་བྲིས་པར་གྱུར་ཏོ། །དེ་ལ་ལྷ་ཁ་ཅིག་གིས་མངོན་པར་བརྗོད་ནས་སྔོན་གྱི་སྐྱེ་བ་དྲན་པར་བྱས་པར་གྱུར་ནས་ཡིད་བྱུང་བས་ཡུད་ཙམ་ཅིག་ཏུ་བག་མེད་པས་རྣམ་པར་མི་རྒྱུ་བར་འགྱུར་རོ།