།བྱ་བརྒྱ་ཕྲག་སྟོང་རྣམས་ཀྱིས་རྩེ་བར་བྱེད་པ་སྒྲ་འཁྲོལ་བར་གྱུར་པ་གསེར་གྱི་མདོག་དང་ལྡན་པ་པད་མའི་ནགས་རྣམས་ཀྱིས་ཀྱང་ཉེ་བར་མཛེས་པར་གྱུར་པ་རྣམས་སུ་མཆོག་ཏུ་རྣམ་པར་རྒྱུ་བ་ན་ངོ་མཚར་བ་སྐྱེ་བར་བྱེད་པ་གོང་ནས་གོང་དུ་དགའ་བར་གྱུར་པ་མཆོག་གི་གཟུགས་རྣམས་དང་ལྡན་པར་གྱུར་ཅིང་ལྡན་པ་ལས་ཀྱང་རྣམ་པར་སྣང་བར་བྱེད་དོ། །སྒྲ་དང་རོ་དང་གཟུགས་དང་དྲི་རྣམས་ཀྱང་དངོས་པོ་དུ་མ་རྣམས་དང་ལྡན་པར་གྱུར་པས་རྣམ་པར་གསལ་བར་སྣང་ངོ་། །དབང་པོ་དྲུག་གི་བདེ་བ་རྣམས་དང་ཉེ་འཁོར་ན་ལྡན་པས་རིའི་མཆོག་དེ་རྣམ་པར་གསལ་བར་གྱུར་ཏོ། །ལྷ་དེ་དགའ་བའི་འདོད་སྲེད་ཀྱིས་གདུངས་པར་གྱུར་ནས་དེ་དག་ཏུ་ཉེ་བར་ལེགས་པར་འགྲོའོ། །ཉེ་འཁོར་ཀུན་ཏུ་ཡང་གླུ་དང་གར་དང་ལྡན་པར་གྱུར་པ་པད་མའི་ཕྲེང་བས་ཀུན་ཏུ་བཅིངས་པས་ཆེས་ལྷག་པར་དགའ་བར་གྱུར་པ་རྟག་ཏུ་རྒྱགས་པར་གྱུར་པ་རྟག་པར་ཡང་རབ་ཏུ་རངས་པ་ཡུལ་ལྔ་ལ་རྣམ་པར་ཆགས་པས་འདོད་པ་རྣམས་ལ་དགའ་བར་གྱུར་པས། མེ་ལྔ་བཞིན་དུ་སྲེག་པར་གྱུར་པས་རྣམ་པར་རྒྱུ་བར་བྱེད་པ། སྲེད་པའི་རྡུལ་རྣམས་ཀྱིས་ཀུན་ནས་བཅིངས་པར་གྱུར་ནས་གང་ན་རི་དེའི་མཐོ་བ་པོ་ཡོད་པ་དེར་ཉེ་བར་འགྲོའོ། །ཡུལ་ལ་འཆུམས་པར་གྱུར་པས་ལྟ་བ་ལ་ཆེད་ཆེར་བྱེད་པའི་ཡིད་ཀྱིས་ཀྱང་རི་དེ་མཐོང་བར་གྱུར་ཏོ། །ཀུན་ཏུ་རྟོག་པ་རྣམ་པ་སྣ་ཚོགས་རྣམ་པ་དུ་མར་དགའ་བར་གྱུར་པའི་རི་དེའི་ཅུང་ཟད་མཐོ་བ་ལ་ཀུན་ཏུ་འཛེགས་པར་གྱུར་ནས་ལྟ་བར་བྱེད་དོ། །ཐོ་འཁོར་ཀུན་ན་ཡང་བཻ་ཌཱུརྱའི་རང་བཞིན་གྱི་ཕུག་མཆོག་ཏུ་དགའ་བར་གྱུར་པ་རྣམས་སོ། །དེ་དག་གི་གྲངས་ནི་འདི་ཡིན་ཏེ། འདི་ལྟར་སྟོང་ཕྲག་བཅུའོ། །འོད་སྔོན་པོ་རྣམས་ཀྱིས་བརྒྱན་པར་གྱུར་པ་ཉེ་འཁོར་རྣམས་ན་བདེ་བ་མཆོག་གི་སྒྲོན་མ་རྣམས་ནི་མཆོད་པ་ལྟ་བུར་གྱུར་པའི་འོད་རྣམས་མཆོག་ཏུ་དགའ་བར་གྱུར་པ་ནི་ཕུག་དེ་དག་རྣམས་ནའོ། །གང་ན་རིའི་མཆོག་དེ་ལ་ཀུན་ཏུ་གནས་པའི་ལྷ་དེ་དག་ཕུག་དེ་དག་ཏུ་ཞུགས་ནས་དགའ་བར་བྱེད་དོ། །ཇི་ལྟ་ཇི་ལྟར་ལྷ་དེ་དག་རབ་ཏུ་ཞུགས་པ་དེ་ལྟ་དེ་ལྟར་ཡང་ཕུག་དེ་དག་གཡོ་བར་འགྱུར་རོ། །ཇི་ལྟར་ཡང་ལྷ་དེ་དག་ཡིད་ཀྱིས་སྒོམ་པར་བྱེད་པར་གྱུར་པ་དེ་བཞིན་དུ་བསམ་པ་དེ་དག་ཐམས་ཅད་ཕུག་དེ་དག་རྣམས་ཉིད་ལས་ཐོབ་པར་འགྱུར་རོ།