།གང་ཡང་གསེར་གྱི་འཁྲི་ཤིང་ཉེ་བར་སྒུ་བའི་ཁང་བུ་གང་ཡིན་པ་དེ་དག་རྣམས་ལ་ནི་བཻ་ཌཱུརྱའི་འདབ་མ་རྣམས་ཀྱིས་གང་བར་གྱུར་ཅིང་ཀར་ཀེ་ཏ་ནའི་མདོག་གི་འབྲས་བུས་ཉེ་བར་མཛེས་པར་བྱས་པའོ། །ཨིན་དྲ་ནཱི་ལའི་རང་བཞིན་གྱི་འཁྲི་ཤིང་གིས་མཛེས་པར་བྱས་པའི་འཁྲི་ཤིང་གི་ཁྱིམ་གང་ཡིན་པ་དེ་ལ་ནི་དངུལ་གྱི་རང་བཞིན་གྱི་འདབ་མ་རྣམས་ཀྱིས་ཕུབས་སུ་གྱུར་པར་བྱས་ཤིང་། ཤེལ་གྱི་རང་བཞིན་ཅན་རྣམས་ལ་ནི་གསེར་གྱི་འབྲས་བུ་དང་ལྡན་པའོ། །ཀར་ཀེ་ཏ་ནའི་ཤིང་འཁྲིལ་བ་རྣམས་གང་ཡིན་པ་དེ་ལ་ནི་ཨིན་དྲ་ནཱི་ལའི་རང་བཞིན་གྱི་འདབ་མ་རྣམས་ཀྱིས་ཉེ་བར་མཛེས་པར་གྱུར་ཅིང་གསེར་གྱི་རང་བཞིན་གྱི་འབྲས་བུས་མཛེས་པར་བྱས་པའོ། །ཤེལ་གྱི་འཁྲི་ཤིང་རྣམ་པར་བརྒྱངས་པ་ཉེ་བར་ཕུབ་པར་གྱུར་པའི་འཁྲི་ཤིང་གི་ཁང་པ་གང་ཡིན་པ་དེའི་ཚེ་ནི་དེ་ལ་གསེར་གྱི་འདབ་མ་རྣམས་ཀྱིས་ཉེ་བར་མཛེས་པར་གྱུར་པ་དང་། སྔོན་པོ་ཆེན་པོའི་ཁ་དོག་གི་འབྲས་བུས་མཛེས་པར་གྱུར་པའོ། །དེ་ན་ཡང་རྣམ་པར་རྟག་པར་མཛེས་པའི་བུང་བའི་ཚོགས་རྣམས་ཀྱིས་ཡིད་འཕྲོག་པར་བྱེད་པའི་སྒྲའི་མཆོག་རྣམས་ཉེ་བར་སྒྲོགས་པར་བྱེད་པ་མེ་ཏོག་ཆེན་པོའི་ཁང་པ་ཞེས་བྱ་བའི་ནགས་དེ་ན་ནི་ནང་རྣམས་ཀྱང་དེ་ལྟར་མཆོག་ཏུ་དགའ་བར་གྱུར་པ་ཡིན་ཏེ། གང་ན་ལྷ་དག་མྱོས་པ་ལ་དོན་གཅིག་པས་དགའ་བར་བྱེད་པའོ། །ནགས་དེའི་ཕྱི་རོལ་རྣམས་ན་ཡང་མཆོག་ཏུ་དགའ་བར་གྱུར་པ་རྣམས་ཡོད་པ་ལ་འདི་ལྟ་སྟེ། པད་མའི་རྫིང་བུ་དག་ན་གསེར་གྱི་འདབ་མ་རྣམས་དང་བཻ་ཌཱུརྱ་སྔོན་པོ་རྣམས་དང་ཨིན་དྲ་ནཱི་ལའི་ཟེའུ་འབྲུ་དང་། དངུལ་གྱི་རང་བཞིན་གྱི་སྙིང་པོ་ཅན་གྱི་ཉེ་འཁོར་རྣམས་ཁྱབ་པར་གྱུར་པ་དང་། བུང་བའི་ཚོགས་རྣམས་ཀྱིས་ཀྱང་ནགས་དེ་ཉེ་བར་མཛེས་པར་བྱས་པ་ངང་པ་དང་ཀཱ་རཎྜ་བ་དང་། ངང་ངུར་དང་། ཀ་དམྤའི་སྒྲ་ཀུན་ཏུ་སྒྲོགས་པར་བྱེད་པས་སྒྲ་ཡིད་འཕྲོག་པར་གྱུར་པ་རྣམས་ཀྱིས་ཉེ་བར་མཛེས་པར་གྱུར་ཅིང་ཡོངས་སུ་བསྐོར་ནས་ནགས་དེ་ཆེས་ལྷག་པར་རྣམ་པར་མཛེས་སོ། །མེ་ཏོག་གི་ཕྲེང་བ་རྣམས་ཉིད་ཀྱི་པད་མའི་ནགས་དེའི་ཉེ་འཁོར་ཀུན་ནས་འཁོར་བར་གྱུར་པ་ལ་དེས་ཀྱང་མེ་ཏོག་གི་ཁང་པའི་ནགས་ཆེན་པོ་ཡོངས་སུ་བསྐོར་ནས་མཛེས་སོ། །པད་མའི་ཕྲེང་བ་དེ་དག་རྣམས་ཀྱི་ཕྱི་རོལ་གྱི་ཤིང་གི་ནགས་གང་དག་ལ་རི་དགས་དང་བྱའི་ཚོགས་རྣམས་མཆོག་གི་རབ་ཏུ་དགའ་བར་གྱུར་པས་ཁ་ཅིག་ནི་ཤིང་གི་རྩ་བ་ནས་བྱུང་ནས་སྡོད་དོ།