།མཆོག་ཏུ་རངས་པའི་ཡིད་ཅན་འོད་ཀྱི་ཕྲེང་བ་མཆོག་དང་ལྡན་པ་རྣམས་དེ་མེ་ཏོག་གི་ཕྲེང་བའི་ནགས་དེར་ཡང་དུས་རིང་དུ་རྣམ་པ་དུ་མ་རྣམས་དང་གཞན་དང་མི་འདྲ་བ་རྣམས་ཀྱི་མྱོས་བྱེད་ཀྱི་བྱ་བ་དག་བྱས་ནས། སླར་ཉིད་ཀྱང་ཡུལ་གྱིས་ངོམས་པ་མེད་པས་འདོད་པའི་ཡོན་ཏན་ལྔ་པོ་དེས་ཀྱང་བག་མེད་པར་གྱུར་ནས་རྔ་སྐད་ཡན་ལག་ལྔ་དང་ལྡན་པས་ལྷན་ཅིག་ཏུ་གར་བྱེད་པར་གྱུར་ཅིང་། གང་ན་མེ་ཏོག་གི་ཁང་པ་ཞེས་བྱ་བ་ཡོད་པ་དེར་ཉེ་བར་ལེགས་པར་འགྲོ་བར་བྱེད་དེ། བྲོ་གར་དང་གླུ་དང་རོལ་མོའི་སྒྲ་དང་བཅས་ནས་རྒྱགས་པས་རྣམ་པར་རྒྱུ་བ་རྣམས་འགྱིང་བག་གིས་འགྲོ་བར་བྱེད་དོ། །དེ་ནས་མེ་ཏོག་ཆེན་པོ་ཕུན་སུམ་ཚོགས་པའི་ནགས་དེ་ཀུན་ནས་ལྷག་པར་ལྟ་བ་བྱེད་དེ། ལྷ་རྣམས་སྔ་ན་མེད་པའི་ལྟ་བས་གདུངས་པའི་ཕྱིར་རོ། །ལྷ་དེ་དག་རྣམས་ཀྱང་དེ་ལྟར་དགའ་བའི་ནགས་དང་ཉེ་བའི་ནགས་དང་པད་མའི་ཚལ་དང་རིན་པོ་ཆེ་བདུན་གྱི་རིའི་རྩེ་མོ་དང་ལྡན་པའི་ལྷའི་རིས་དེ་དག་རྣམས་མངོན་པར་མཐོང་ནས་མཆོག་ཏུ་ངོ་མཚར་བ་སྐྱེས་པར་གྱུར་ཏེ་ཅ་ཅོ་དང་མིག་ཀྱང་རིག་རིག་པོར་གྱུར་ཅིང་ཉེ་འཁོར་ཀུན་ཏུ་མིག་སྒྱུར་བར་བྱེད་པས་ཀྱང་ངོམས་པར་འགྱུར་བ་ནི་མ་ཡིན་ནོ། །ལྷ་དེ་དག་དང་ལྷ་མོ་རྣམས་ཀྱང་དེ་ཁོ་ན་བཞིན་དུ་སྔ་ན་མེད་པ་མཐོང་བས་གཡོ་ཞིང་ཞེན་པས་དེ་རིམ་གྱིས་རྣམ་པར་རྟོག་པ་བརྒྱ་སྟོང་དུ་མས་མེ་ཏོག་དང་ཉེ་བར་ལྡན་པའི་མེ་ཏོག་གི་ཁང་པ་ཀུན་ཏུ་མངོན་པར་མཐོང་བར་གྱུར་པ་དེས་སླར་ཉིད་ཀྱང་ཡིད་ཆེས་པ་རྩོམ་པ་དང་ལྡན་པ་བཞིན་དུ་གར་བྱེད་པ་དང་དགོད་པར་བྱེད་པ་དང་གླུ་ལེན་པར་ཡང་བྱེད་དེ། དེ་དག་རྣམས་དེ་ཁོ་ན་བཞིན་དུ་བག་མེད་པས་མཆོག་ཏུ་སྡུག་པར་གྱུར་པས། འཁྲི་ཤིང་གི་ཁང་བུ་རྣམས་སུ་ཞུགས་སོ། །ཁྱིམ་དེ་དག་རྣམས་ཀྱང་། འཁྲི་ཤིང་གི་ཤིང་ལྗོན་པ་རྣམས་ཉེ་བར་དུད་པར་གྱུར་པ་འདབ་མ་རྣམ་པར་བཀྲ་བར་མཛེས་པར་གྱུར་པའི་རིན་པོ་ཆེའི་རང་བཞིན་རྣམ་པ་སྣ་ཚོགས་པའི་འཁྲི་ཤིང་གིས་ཉེ་བར་སྒུ་བ་རྣམས་ལ་འདི་ལྟ་སྟེ། བཻ་ཌཱུརྱའི་འཁྲི་ཤིང་གི་ཁང་བུ་གང་ཡིན་པ་དེ་ལ་ནི་གསེར་འབར་བའི་མདོག་གི་འདབ་མས་ཀུན་ཏུ་ཁྱབ་པར་གྱུར་པའོ། །གང་ཡང་གསེར་གྱི་འཁྲི་ཤིང་ཉེ་བར་སྒུ་བའི་ཁང་བུ་གང་ཡིན་པ་དེ་དག་རྣམས་ལ་ནི་བཻ་ཌཱུརྱའི་འདབ་མ་རྣམས་ཀྱིས་གང་བར་གྱུར་ཅིང་ཀར་ཀེ་ཏ་ནའི་མདོག་གི་འབྲས་བུས་ཉེ་བར་མཛེས་པར་བྱས་པའོ།