Degé Kangyur volume 68, F.157.a

པར་བྱེད་དོ། །​དེ་དེར་འདུག་པ་ན་ཚོར་བ་དྲག་ཅིང་རྩུབ་པ་གཞན་དང་མཚུངས་པ་མེད་པ་དཔེ་ཟླ་མེད་པ་དག་མྱོང་བར་འགྱུར་རོ། །​འདི་ལྟ་སྟེ། ཕུར་བུ་རབ་ཏུ་འབར་བའི་ཚོར་བ་ནི་ཕུར་བུ་རབ་ཏུ་འབར་བ་དག་གིས་འབིགས་པར་བྱེད་ཅིང་སེམས་ཅན་དམྱལ་བ་དེ་དག་གཤིན་རྗེའི་མི་དེ་དག་གིས་བཟུང་ནས་དེ་བཞིན་དུ་སྐྱོད་དེ་སེམས་ཅན་དམྱལ་བ་དེ་དག་ཕན་ཚུན་དུ་བསྐྱོད་པས་རྣམ་པར་འཁྲུགས་ཤིང་ངུ་བར་བྱེད་དོ། །​དེ་ན་ཟངས་དམར་པོ་བསྐོལ་ཅིང་བཞུས་པ་རབ་ཏུ་འབར་བས་ལུས་ཤིང་སྐམ་ལྟ་བུར་བྱེད་དེ། རྨོངས་པར་བྱེད་ཅིང་སྲེག་པར་བྱེད་དོ། །​ཕུར་བུས་གང་བའི་ཆུ་བོ་དེར་བསྐོལ་བ་ན། སེམས་ཅན་དམྱལ་བ་དེ་དག་ཁ་ཅིག་ནི་ལུས་རྩྭ་ལྟར་རབ་ཏུ་སྲེག་གོ། །​ཁ་ཅིག་ནི་རྡོ་ལྕི་བ་ལྟར་ནུབ་བོ། །​ཁ་ཅིག་ནི་ལུས་ཉ་ལྕིབས་ལྟར་ཆུ་འགྲམ་དུ་བྱུང་ངོ་། །​ཁ་ཅིག་ནི་ལུས་ཉ་ལྟ་བུ་ལ་བྱ་རྒོད་ཀྱི་མཆུ་རབ་ཏུ་འབར་བ་དེས་ཟའོ། །​ཁ་ཅིག་ནི་ལུས་མར་སར་གྱི་གོང་བུ་ལྟར་ཞུའོ། །​ཁ་ཅིག་ནི་ལྕགས་རབ་ཏུ་འབར་བ་ལྟ་བུའི་རྡོ་བས་ལུས་ཀྱི་ཁོག་པ་བྱེ་མ་སྙིམ་པ་ནས་གཏོར་བ་བཞིན་དུམ་བུ་བརྒྱའམ་སྟོང་དུ་རློག་གོ། །​ཁ་ཅིག་ནི་བ་ཚྭས་སྲེག་པ་ན་ཟངས་སམ་ལྕགས་དག་ནང་དུ་བཅུག་པ་བཞིན་དུ་ཞུའོ། །​ཁ་ཅིག་ནི་ཕྲ་སྐམ་རབ་ཏུ་འབར་བདག་གིས་བཟུང་ནས་ཡང་མཚོན་སྤུ་གྲི་ལྟ་བུས་ཀུན་དུ་གསོད་དོ། །​ཁ་ཅིག་ནི་ལུས་ཐགས་ལྟར་ཆེར་བརྒྱངས་ནས་གསོད་དོ། །​ཁ་ཅིག་ནི་ཁས་བུབ་ཏུ་བཞག་ནས་གསོད་དོ། །​ཁ་ཅིག་ནི་བུམ་པའི་ནང་དུ་འཇུག་པར་བྱེད་དོ། །​ཁ་ཅིག་ནི་བུམ་པ་དེའི་ནང་དུ་བཅུག་ནས་དེར་མོན་སྲན་གྲེའུ་བཙོ་བ་བཞིན་དུ་སྟེང་དུ་འབྱུང་ཞིང་འོག་ཏུ་འཇུག་གོ། །​ཁ་ཅིག་ནི་སྟེང་དུ་བྱུང་ནས་ངུའོ། །​ཁ་ཅིག་ནི་གཅིག་ལ་གཅིག་འཇུས་ནས་ངུའོ། །​མགོན་མེད་པ་ཁ་ཅིག་ནི་བྱ་རྒོད་དང་། ཁྭ་དང་། ཝ་དང་། ཁྱི་རབ་ཏུ་འབར་བ་དག་གིས་ས་གཞི་རབ་ཏུ་འབར་བ་ན་གནས་པ་དག་བཟུང་ནས་ཟ་སྟེ། ཉིན་གཅིག་བཞིན་དུ་ཚོར་བ་རྣམ་པ་སྣ་ཚོགས་མྱོང་ངོ་། །​དེ་ལྟར་རང་གི་སེམས་ཀྱིས་བསླུས་པ་དེ་ལྟ་བུ་དེ་དག་ནི་འདོད་པས་ལོག་པར་གཡེམ་པ་ཀུན་དུ་སྤྱོད་ཅིང་སྲོག་གཅོད་པ་



The English translation of this folio by 84000 Translating the words of the Buddha can be found at:
https://read.84000.co/translation/toh287.html?part=UT22084-068-021-100177#UT22084-068-021-100177