མཆོག་ཏུ་དགའ་བར་གྱུར་པའི་མཐོ་རིས་ཀྱི་ཡུལ་ཕྱོགས་ཁ་ཅིག་ནི་རབ་ཏུ་འབར་བ་བཞིན་དུ་འབར་བར་གྱུར་པའི་གསེར་མདོག་བཟང་པོ་དང་པད་མ་རཱ་གའི་འོད་དང་ལྡན་པ་དང་། ཡུལ་ཕྱོགས་ཁ་ཅིག་ནི་ཨུད་པ་ལའི་འདབ་མ་སྔོན་པོའི་གྲིབ་མ་སྣུམ་པར་གྱུར་པས་མཆོག་ཏུ་ཡིད་འཕྲོག་པར་བྱེད་པའི་བཻ་ཌཱུརྱ་དང་ཨིན་དྲ་ནཱི་ལའི་འོད་དང་ལྡན་པའོ། །ཡུལ་ཕྱོགས་ཁ་ཅིག་ནི་དངུལ་དང་ཤེལ་དང་མུ་ཏིག་གི་འོད་རྣམས་ཀྱི་མཆོག་ཏུ་ཡིད་དུ་འོང་བར་གྱུར་པ་དེ་དག་རྣམས་ཀྱི་འོད་ཀྱིས་ཤིན་ཏུ་དགའ་བར་སྣང་ངོ་། །རིའི་རྩེ་མོ་རྣམས་དང་འབབ་ཆུ་རྣམས་ཀྱང་མཆོག་ཏུ་གཙང་བ་དྲི་མ་མེད་པར་གྱུར་པ་ཡོན་ཏན་བདུན་དང་ལྡན་པའི་ཆུ་གྲང་མོ་རྣམས་རབ་ཏུ་འབབ་པར་བྱེད་པ་རྣམས་མཐོང་ངོ་། །རྩེ་མོ་མུ་ཏིག་གི་ཚོགས་དང་ལྡན་པར་གྱུར་པ་དེ་བཞིན་དུ་ཡུལ་ཕྱོགས་དེ་ན་མངོན་པར་མཐོང་ངོ་། །གཞན་ཡང་ལྷ་དེ་དག་རྣམས་ནམ་མཁའི་དཀྱིལ་ན་ལེགས་པར་གནས་པར་གྱུར་ནས་ལྟ་བར་བྱེད་པ་རིན་པོ་ཆེ་བདུན་གྱིས་ཉེ་བར་མཛེས་པར་གྱུར་པའི་པད་མའི་རྫིང་བུ་རྣམས་ལ་བུང་བའི་ཚོགས་རྣམས་ཀྱིས་ཉེ་བར་བསྒྲགས་པར་གྱུར་པས་མཆོག་ཏུ་ཡིད་འཕྲོག་པར་གྱུར་པའི་སྒྲ་རབ་ཏུ་སྙན་པ་རྣམས་ཀྱི་གླུས་པད་མའི་ཚལ་དུ་ཉེ་བར་མཚོན་པར་བྱེད་དོ། །ཕལ་ཆེ་བར་གྱུར་པ་ཉིད་དུ་ཡང་ཉེ་བར་རྟོགས་པར་བྱེད་དོ། །ཤིན་ཏུ་རིང་བར་མ་ཡིན་པ་ནས་བུང་བའི་ཚོགས་དེ་དག་མངོན་པར་མཐོང་ནས། ཡུལ་ཕྱོགས་གཞན་དང་གཞན་རྣམས་ཉེ་བར་མཚོན་པར་བྱེད་དེ་ནགས་དང་ཉེ་བའི་ནགས་དང་རྫིང་བུ་དག་དགའ་བར་གྱུར་པ་རྣམས་སོ། །དེ་ལ་དགའ་བར་གྱུར་པའི་ནགས་དེ་དག་རྣམས་ལ་རི་དགས་དང་བྱ་རྣམས་རབ་ཏུ་མཐོང་བར་གྱུར་པ། འདི་ལྟ་སྟེ་རྣམ་པ་སྣ་ཚོགས་པའི་རི་དགས་ཀྱི་ཚོགས་ཁ་དོག་མི་འདྲ་བར་གྱུར་པ་རྣམས་ལ་འགའ་ཞིག་ནི་བལྟ་བར་སྡུག་པའི་དངུལ་གྱི་རང་བཞིན་གྱི་མདོག་ལ་རྭ་དང་མིག་དག་ནི་པད་མ་རཱ་གའོ། །ཁ་ཅིག་ནི་རྒྱབ་གསེར་གྱི་རང་བཞིན་དུ་གྱུར་པ་ལ་ལོགས་དག་དངུལ་ལོ། །རིན་པོ་ཆེ་ཀར་ཀེ་ཏ་ནའི་རྭ་ཤེལ་གྱི་རང་བཞིན་གྱི་མདོག་གི་རྨིག་པའོ། །ཁ་ཅིག་གི་གཞུང་ནི་ལེགས་པར་རྣམ་པར་ཕྱེ་བར་གྱུར་པ་ལ་འཕོངས་དང་རྐང་པ་རྣམས་རིན་པོ་ཆེ་བདུན་གྱི་རང་བཞིན་མདོག་དང་ལྡན་པའི་ཚོགས་རྣམས་འཇིགས་པ་དང་ངལ་དུབ་དང་བྲལ་བར་གྱུར་པའི་ཚོགས་རྣམས་ལ་དགའ་བར་བྱེད་དོ། །ཁ་ཅིག་ནི་མཆོག་ཏུ་མཛེས་པར་གྱུར་པ་མཆོག་གི་ལས་བྱས་པའི་ཟས་རྣམས་ཉེ་བར་ཟ་བར་བྱེད་དོ། །