།ལྷ་དེ་དག་རྣམས་ཀྱང་སླར་ཡང་ཡུལ་གྱི་བདེ་བ་རྣམས་ལ་དོན་དམ་དུ་བྱེད་པས་ཕན་ཚུན་དུ་རྩེ་བར་བྱེད་དེ་ཤིན་ཏུ་མི་བཟད་པ་མཆོག་ཏུ་འཇིགས་པར་གྱུར་པ་དེ་དག་རྣམས་འབྱུང་བར་འགྱུར་བ་ནི་དེ་རྨོངས་པའི་ཕྱིར་དེ་དག་གིས་རྟོགས་པ་ཡང་མ་ཡིན་ནོ། །ཇི་སྲིད་དུས་རྩིས་སུ་ཡང་འཇུག་པར་མི་བྱེད་པར་རྨོངས་པར་འགྱུར་བའི་ཕྱིར་ན་འཇིགས་པ་དང་བྲལ་བས་དགའ་བར་བྱ་སྟེ་གླང་པོའི་གསེབ་ཏུ་སོང་ཞིང་། པད་མའི་གསེབ་ཏུ་སོང་ནས་ལྷན་ཅིག་སྤྱོད་པ་དང་བཅས་པ་དེ་དག་རྣམས་ཡུལ་དེར་དུས་ཤིན་ཏུ་རིང་བར་རྩེ་བར་གྱུར་ནས། གཞན་ཡང་དེ་ཁོ་ན་བཞིན་དུ་གཟུགས་བརྒྱ་སྟོང་དུ་མར་གྱུར་པའི་ལྷ་རྫས་ཀྱི་གསེར་དང་བཻ་ཌཱུརྱ་དང་དངུལ་དང་པད་མ་རཱ་ག་རྣམས་ཀྱིས་ལེགས་པར་རྣམ་པར་ཕྱེ་བར་གྱུར་པའི་ཆ་ཤས་དང་རྟ་བབས་དང་ཁང་བུ་བརྒྱ་སྟོང་དང་ལྡན་པ་པད་མ་བརྒྱ་སྟོང་གིས་ཉེ་བར་མཛེས་པར་གྱུར་པ་རྒྱ་ཆེན་པོའི་བདེ་བ་ལ་དམིགས་པ་ཞེས་བྱ་བའི་རི་ལ་འཛེག་པར་བྱེད་དོ། །རི་ཐམས་ཅད་ལ་ཡང་མཆོག་ཏུ་བདེ་བར་གྱུར་པའི་འདོད་པ་རྣམས་ཀྱིས་ཡོངས་སུ་ཁྱབ་པ་རྔ་སྐད་བརྒྱ་སྟོང་སྒྲོགས་པར་གྱུར་པས་གང་བ་སྒྲ་འབྱིན་པའི་སྒྲ་རྣམ་པ་སྣ་ཚོགས་པ་རྣམས་དང་ཁ་དོག་སྣ་ཚོགས་པ་ནང་དུ་རེག་བྱར་སྣང་བའི་གཟི་བརྗིད་ཅན་དེ་དག་གིས་སྟོད་གཡོགས་བགོས་པར་གྱུར་པ་ཕན་ཚུན་དུ་བཞིན་ཀུན་ཏུ་ལྟ་བ་ལ་ཆེད་ཆེར་བྱེད་པ། སྒྲ་དང་། རེག་བྱ་དང་། རོ་དང་། གཟུགས་དང་། དྲིའི་ཡུལ་རྣམས་ཇི་ལྟར་འདོད་པ་བཞིན་དུ་རྗེས་སུ་མྱོང་བར་བྱེད་པ་རང་འདོད་པ་བཞིན་དུ་འགྲོ་ཞིང་རབ་ཏུ་རྣམ་པར་རྒྱུ་བར་བྱེད་པ་དཔེ་མེད་པའི་བདེ་བ་རྣམས་ལ་ཆགས་པར་གྱུར་པས། སྤྱོད་པ་རྣམ་པ་སྣ་ཚོགས་པའི་ཆུ་ཀླུང་དང་འབབ་ཆུ་དང་ནགས་དང་ཉེ་བའི་ནགས་རྣམས་ལེགས་པར་ལྟ་བར་བྱེད་ཅིང་བདེ་བར་རྒྱུ་བར་གྱུར་པས། ཁ་ཅིག་ནི་ཁྱོགས་ཀྱི་ཁང་བུའི་སྟེང་ནས་ཁ་ཅིག་ནི་ངང་པའི་རྒྱབ་ནས་ཁ་ཅིག་ནི་པད་མའི་ནང་དུ་ཞུགས་ནས། ཁ་ཅིག་ལ་ནི་སྙིང་པོ་ལ་ལྷ་མོ་རྣམས་དང་བཅས་པར་ཉེ་བར་གནས་ནས་ཁ་ཅིག་ནི་མེ་ཏོག་ཀུ་བ་ལ་ཡའི་འདབ་མའི་ནང་དུ་སོང་ནས་དགའ་བར་བྱེད་ཅིང་། གླུ་ལེན་པར་གྱུར་པས་མཆོག་ཏུ་སྙན་པའི་རྔ་སྐད་ཡན་ལག་ལྔ་པ་རྣམས་ཀྱིས་བདེ་བར་ཉེ་བར་གནས་པར་གྱུར་ནས། ནམ་མཁའི་དཀྱིལ་ནས་འགྲོ་བར་བྱེད་པ་ལ་སྤྲོ་བར་གྱུར་པས་བདེ་བའི་ཕྲེང་བ་རྒྱ་ཆེ་བའི་རི་ལ་འཁོད་པར་གྱུར་ནས་ལྷ་ཡུལ་གྱི་གནས་དཔེ་མེད་པར་གྱུར་པ་རྣམས་ལ་ལྟ་བར་བྱེད་དེ། མཆོག་ཏུ་དགའ་བར་གྱུར་པའི་མཐོ་རིས་ཀྱི་ཡུལ་ཕྱོགས་ཁ་ཅིག་ནི་རབ་ཏུ་འབར་བ་བཞིན་དུ་འབར་བར་གྱུར་པའི་གསེར་མདོག་བཟང་པོ་དང་པད་མ་རཱ་གའི་འོད་དང་ལྡན་པ་དང་།